ଆଜିଠୁ ପ୍ରଦୂଷଣ ନିୟନ୍ତ୍ରଣ ସାର୍ଟିଫିକେଟ ନାହିଁ ତ ତେଲ ନାହିଁ: ସରକାରଙ୍କ  କଡା ପଦକ୍ଷେପ

କନକ ବ୍ୟୁରୋ: ପ୍ରଦୂଷଣ ନିୟନ୍ତ୍ରଣ ସାର୍ଟିଫିକେଟ(ପିୟୁସି) ନାହିଁ ତ ତେଲ ନାହିଁ । ପ୍ରଦୂଷଣ ନିୟନ୍ତ୍ରଣ ସାର୍ଟିଫିକେଟ (ପିୟୁସି) ନଥିଲେ ଦିଲ୍ଲୀରେ ପେଟ୍ରୋଲ ଓ ଡିଜେଲ ମିଳିବ ନାହିଁ । ଦିଲ୍ଲୀ ସରକାର ରାଜଧାନୀରେ ବାୟୁ ପ୍ରଦୂଷଣ ସମସ୍ୟାକୁ ମୁକାବିଲା କରିବା ପାଇଁ ଏଭଳି କଡା ପଦକ୍ଷେପ ନେଇଛନ୍ତି । ଏକ ସାମ୍ବାଦିକ ସମ୍ମିଳନୀରେ ସମ୍ବୋଧନ କରି ଦିଲ୍ଲୀ ପରିବେଶ ମନ୍ତ୍ରୀ ମଞ୍ଜିନ୍ଦର ସିଂହ ସିର୍ସା କହିଛନ୍ତି ଯେ, ପିୟୁସି ପ୍ରମାଣପତ୍ର ନଥିବା ଯାନବାହନଗୁଡ଼ିକୁ ଆଜିଠାରୁ ପେଟ୍ରୋଲ ପମ୍ପରେ ଇନ୍ଧନ ଯୋଗାଇ ଦିଆଯିବ ନାହିଁ । 

ମନ୍ତ୍ରୀ କହିଛନ୍ତି, ନିର୍ମାଣ ସାମଗ୍ରୀ ଆଣୁଥିବା ଟ୍ରକଗୁଡ଼ିକୁ ଦିଲ୍ଲୀ ଭିତରକୁ ଆସିବା ଉପରେ ସମ୍ପୂର୍ଣ୍ଣ ନିଷେଧାଦେଶ ଲାଗୁ ହେବ । ଏହା ସହିତ, ଆଜିଠାରୁ ଦିଲ୍ଲୀ ବାହାରୁ ଆସୁଥିବା ବ୍ୟକ୍ତିଗତ ଯାନବାହନଗୁଡ଼ିକୁ ଯଦି ବିଏସ୍‌୬ ବର୍ଗରୁ କମ୍ ହୋଇଥାଏ, ତେବେ ସେଗୁଡ଼ିକୁ ରାଜଧାନୀ ଭିତରକୁ ପ୍ରବେଶ କରିବାକୁ ଅନୁମତି ଦିଆଯିବ ନାହିଁ । ପରିବେଶ ମନ୍ତ୍ରୀ ଆହୁରି କହିଛନ୍ତି ଯେ, କୌଣସି ସରକାର ୯-୧୦ ମାସ ଭିତରେ ପ୍ରଦୂଷଣକୁ ସମ୍ପୂର୍ଣ୍ଣ ରୂପେ ଠିକ୍ କରିପାରିବେ ନାହିଁ । ସେ ପୂର୍ବ ଆପ୍  ସରକାରକୁ ତାର କାର୍ଯ୍ୟକାଳରେ କୌଣସି ଠୋସ୍ ପଦକ୍ଷେପ ନନେବା ପାଇଁ ଦୋଷାରୋପ କରିଛନ୍ତି ।

ରାଜ୍ୟରେ ଶୀତ ସାଙ୍ଗକୁ ଘନ କୁହୁଡି: କୋରାପୁଟ ଦାମନଯୋଡିରେ ସର୍ବନିମ୍ନ ତାପାମତ୍ରା ୨.୯ ଡିଗ୍ରୀ ରେକର୍ଡ

ତେବେ ସରକାରଙ୍କ ଏହି ନିଷ୍ପତ୍ତିକୁ ପେଟ୍ରୋଲ ପମ୍ପ ମାଲିକମାନେ ବିରୋଧ କରିଛନ୍ତି । ଦିଲ୍ଲୀ ପେଟ୍ରୋଲ ଡିଲରସ୍ ଆସୋସିଏସନ (ଡିପିଡିଏ) କହିଛି କେତେକ ଗୁରୁତ୍ୱପୂର୍ଣ୍ଣ ସମସ୍ୟାକୁ ପୂର୍ବରୁ ସମାଧାନ ନକରି ଏହି ନିର୍ଦ୍ଦେଶକୁ ପାଳନ କରିବା ଅତ୍ୟନ୍ତ କଷ୍ଟକର ହେବ । ଡିଲରମାନେ ଉଲ୍ଲେଖ କରିଛନ୍ତି ଯେ, ଦିଲ୍ଲୀର ପ୍ରଦୂଷଣ ସମସ୍ୟା କେବଳ ସହର ନୁହେଁ ସହର ସୀମା ବାହାରୁ ଆସୁଛି । କେବଳ ଦିଲ୍ଲୀ ଭିତରେ ଫ୍ୟୁଏଲ ନିଷେଧ କରିବା ଦ୍ୱାରା ଲାଭ ମିଳିବ ନାହିଁ ଯଦି ଏହି ନୀତି ସମଗ୍ର ଏନସିଆରରେ କାର୍ଯ୍ୟକାରୀ ନହୁଏ ।