ଶ୍ରୀଲଙ୍କାରେ ବାତ୍ୟା ଡିଟୱାର ବଡ଼ ପ୍ରଭାବ; ଗଲାଣି ୭୦ରୁ ଅଧିକ ଜୀବନ, ବ୍ୟାପକ କ୍ଷୟକ୍ଷତି

କନକ ବ୍ୟୁରୋ : ବାତ୍ୟା ଡିଟୱା ପ୍ରଭାବରେ ଶ୍ରୀଲଙ୍କାରେ ଜଳ ପ୍ରଳୟ । ପ୍ରଳୟଙ୍କରୀ ବନ୍ୟା ଓ ଭୂସ୍ଖଳନରେ ଗଲାଣି ୭୦ରୁ ଅଧିକ ଜୀବନ । ୬ଶହରୁ ଅଧିକ ଘର କ୍ଷତିଗ୍ରସ୍ତ ହୋଇଥିବା ବେଳେ, ଶହ ଶହ ସଂଖ୍ୟାରେ ବିପନ୍ନଙ୍କୁ ଉଦ୍ଧାର କରାଯାଉଛି । ୩୦ରୁ ଅଧିକ ଲୋକଙ୍କ ପତ୍ତା ମିଳୁନି । ସମସ୍ତ ସ୍କୁଲ ଓ ସରକାରୀ ଅଫିସ୍ ଛୁଟି ଘୋଷଣା କରିଛନ୍ତି ଶ୍ରୀଲଙ୍କା ସରକାର ।

ଗତ ସପ୍ତାହେ ଧରି ଶ୍ରୀଲଙ୍କାରେ ପାଗ ଖରାପ ଥିବା ବେଳେ, ଗୁରୁବାର ଓ ଶୁକ୍ରବାର ଲଗାଣ ବର୍ଷା ହୋଇଥିଲା । ଏହା ବନ୍ୟା ସ୍ଥିତିକୁ ବହୁଗୁଣ ବଢ଼ାଇବା ସହ ବିଭିନ୍ନ ସ୍ଥାନରେ ଭୟଙ୍କର ଭୂସ୍ଖଳନ ହୋଇଛି । ସମସ୍ତ ନଦୀ ଓ ଜଳଭଣ୍ଡାର ଉଛୁଳିଛି । କିଛି ସ୍ଥାନରେ ପୋଲ ଉପରେ ପ୍ରଖର ସୁଅ ଚାଲୁଥିବା ବେଳେ, ବହୁ ରାସ୍ତାରେ ଯାନବାହାନ ଚଳାଚଳ ବାଧାପ୍ରାପ୍ତ ହୋଇଛି । କିଛି ସ୍ଥାନରେ ରେଳ ଧାରଣା ଉପରେ ଗଛ ଉପୁଡ଼ି ପଡ଼ିଛି ।

ଅଧିକ ପଢ଼ନ୍ତୁ : ଆସୁଛି ବାତ୍ୟା ‘ଡିଟୱା’ : ଓଡ଼ିଶାରେ ପଡ଼ିବନି ପ୍ରଭାବ

ବାୟୁସେନା ଉଦ୍ଧାର କାର୍ଯ୍ୟରେ ନିୟୋଜିତ ହୋଇଥିବା ବେଳେ, ଶ୍ରୀଲଙ୍କାକୁ ସହାୟତାର ହାତ ବଢ଼ାଇଛି ଭାରତ । ଆରମ୍ଭ ହୋଇଛି ଅପରେସନ୍ ସାଗର ବନ୍ଧୁ । ପ୍ରଭାବିତ ଅଞ୍ଚଳକୁ ୬.୫ ଟନ୍ ଖାଦ୍ୟ ସାମଗ୍ରୀ ଓ ଅନ୍ୟ ଅତ୍ୟାବଶ୍ୟକ ସାମଗ୍ରୀ ପଠାଯାଇଛି । ଆଇଏନ୍‌ଏସ୍ ବିକ୍ରାନ୍ତ ଓ ଆଇଏନ୍‌ଏସ୍ ଉଦୟଗିରିରୁ ଏହି ରାସନ୍ ପଠାଯାଇଥିବା ସୂଚନା ଦେଇଛି ଶ୍ରୀଲଙ୍କା ସ୍ଥିତ ଭାରତୀୟ ଦୂତାବାସ । ମୃତକଙ୍କ ପରିବାରକୁ ସମବେଦନା ଜଣାଇବା ସହ ଆବଶ୍ୟକ ପଡ଼ିଲେ ଅଧିକ ସହାୟତା ଯୋଗାଇ ଦିଆଯିବ ବୋଲି ଭରସା ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ।

ଦକ୍ଷିଣ-ପଶ୍ଚିମ ବଙ୍ଗୋପସାଗର ଉପରେ ସୃଷ୍ଟି ହୋଇଥିବା ଘୂର୍ଣ୍ଣିଝଡ଼ ଡିଟୱା ଆସନ୍ତା ୩୦ ତାରିଖରେ ସ୍ଥଳଭାଗ ଛୁଇଁବ । ଉତ୍ତର ତାମିଲନାଡୁ, ପୁଡୁଚେରୀ ଏବଂ ଦକ୍ଷିଣ ଆନ୍ଧ୍ରପ୍ରଦେଶର ଉପକୂଳରେ ବାତ୍ୟା ସ୍ଥଳଭାଗ ଛୁଇଁବା ନେଇ ଆକଳନ କରାଯାଉଥିବା ଭାରତୀୟ ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି । ଶୁକ୍ରବାର ପୂର୍ବାହ୍ନରେ ଘୂର୍ଣ୍ଣିଝଡ଼ ଶ୍ରୀଲଙ୍କା ଉପକୂଳ ଏବଂ ଦକ୍ଷିଣ-ପଶ୍ଚିମ ବଙ୍ଗୋପସାଗର ଉପରେ ଅବସ୍ଥିତ ଥିଲା । ପରେ ଏହା ଉତ୍ତର-ଉତ୍ତରପଶ୍ଚିମ ଦିଗକୁ ଗତି କରିଛି ।

ବାତ୍ୟା ପ୍ରଭାବରେ ପ୍ରବଳ ପବନ ଏବଂ ବର୍ଷା ହେବାର ସମ୍ଭାବନା ରହିଥିବା ନେଇ ଭାରତ ପାଣିପାଗ ବିଭାଗ ସତର୍କତା ଜାରି କରିଛି । ଆଜି ତାମିଲନାଡୁର କିଛି ଜିଲ୍ଲାରେ ଅତି ପ୍ରବଳ ବର୍ଷା ହେବ । ଡିସେମ୍ବର ୧ ପର୍ୟ୍ୟନ୍ତ ତାମିଲନାଡୁର କିଛି ଜିଲ୍ଲା ଏବଂ ଆନ୍ଧ୍ର ପ୍ରଦେଶର କିଛି ଅଂଶରେ ପ୍ରବଳରୁ ଅତି ପ୍ରବଳ ବର୍ଷା ହେବ । ଉପକୂଳ ଅଞ୍ଚଳ ପାଇଁ ରେଡ୍ ଏବଂ ଅରେଞ୍ଜ ସତର୍କତା ଜାରି କରାଯାଇଛି । ମତ୍ସ୍ୟଜୀବୀମାନଙ୍କୁ ସମୁଦ୍ର ଅଞ୍ଚଳରେ ପ୍ରବେଶ ନ କରିବାକୁ ଏବଂ କୂଳକୁ ଫେରିବାକୁ ପରାମର୍ଶ ଦିଆଯାଇଛି । ସମ୍ଭାବ୍ୟ ସ୍ଥିତିକୁ ଆଖିରେ ରଖି ତାମିଲନାଡୁ ପ୍ରଶାସନ ପକ୍ଷରୁ ପ୍ରସ୍ତୁତି କରାଯାଉଛି । ଭିଲୁପୁଲମ ଜିଲ୍ଲାରେ ଆଜି ସବୁ ସ୍କୁଲ ଛୁଟି ଘୋଷଣା ହୋଇଛି । କୁଡାଲୋର ଜିଲ୍ଲାରେ ମଧ୍ୟ ସତର୍କତା ବଢ଼ାଯାଇଛି ।