ଜମାକାରୀଙ୍କୁ ଆଶ୍ୱାସନା ଦେଲା ସାହାରା : ଲୋକଙ୍କୁ ବିଭ୍ରାନ୍ତ କରୁଛନ୍ତି କିଛି ବିତାଡିତ ଏଜେଣ୍ଟ, ସମୟ ଲାଗୁଛି ହେଲେ ସୁରକ୍ଷତି ଅଛି ଲୋକଙ୍କ ଟଙ୍କା
କନକ ବ୍ୟୁରୋ : କେବେ ଟଙ୍କା ଫେରିପାଇବେ ସାହାରା କମ୍ପାନୀରେ ଟଙ୍କା ଜମା କରିଥିବା ଜମାକାରୀ ? ଏନେଇ ଆନ୍ଦୋଳନ ପ୍ରତିବାଦ ଆରମ୍ଭ ହୋଇଥିବା ବେଳେ ସାହାରା କମ୍ପାନୀ ପକ୍ଷରୁ ଆଜି ଆସିଛି ସ୍ପଷ୍ଟୀକରଣ । ଯେଉଁଥିରେ କୁହାଯାଇଛି ସାହାରା-ସେବୀ ଖାତାରେ ଟଙ୍କା ଜମା ରହିଛି । କୋର୍ଟଙ୍କ ପ୍ରତିବନ୍ଧ ଯୋଗୁଁ ଜମାକାରୀଙ୍କୁ ଟଙ୍କା ମିଳିବାରେ ବିଳମ୍ବ ହେଉଛି । ଖୁବଶୀଘ୍ର ଏହି ଟଙ୍କା ମିଳିଯିବ ବୋଲି ଏହି ସ୍ପଷ୍ଟୀକରଣରେ କୁହାଯାଇଛି । ତେବେ କମ୍ପାନୀରୁ ବାହାର କରାଯାଇଥିବା କିଛି ଏଜେଂଟ ଅପପ୍ରଚାର କରୁଛନ୍ତି ବୋଲି ଏଥିରେ କୁହାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସାହାରାରେ ଟଙ୍କା ଜମା କରିଥିବା ଜମାକାରୀ ଟଙ୍କା ଫେରି ନପାଇବା ସମ୍ପର୍କିତ ଖବର ପରେ ସ୍ପଷ୍ଟୀକରଣ ରଖିଛି ସାହାରା କମ୍ପାନି । ଏଥିରେ କୁହାଯାଇଛି , ସର୍ବୋଚ୍ଚ ନ୍ୟାୟାଳୟରେ ପ୍ରତିବନ୍ଧ କାରଣରୁ ଏକଜୁଟ କରାଯାଇଥିବା ସମୁଦାୟ ଧନରାଶୀ ସାହାରା ସେବି ଖାତାକୁ ଚାଲିଯାଇଛି । ଯେଉଁ ଧନରାଶୀରୁ ସାହାରା ଟଙ୍କାଟିଏ ମଧ୍ୟ ଖର୍ଚ୍ଚ କରିପାରିବ ନାହିଁ ଏପରିକି ନିବେଶକଙ୍କର ପେମେଂଟ ମଧ୍ୟ କରିପାରିବ ନାହିଁ । ଏ ପର୍ଯ୍ୟନ୍ତ ସାହାରା ସେବି ଖାତାରେ ମୋଟ ସୁଧ ସହ ପ୍ରାୟ ୨୧ହଜାର କୋଟି ଟଙ୍କା ଜମାହୋଇଯାଇଛି । ନ୍ୟାୟାଳୟଙ୍କ ନିର୍ଦ୍ଦେଶ ଅନୁସାରେ ଖାତା ଗୁଡିକର ଯାଂଚ ପରେ ସମସ୍ତ ଧନରାଶୀ ସାହାରାକୁ ଫେରସ୍ତ ମିଳିଯିବ । ଏହାପରେ ନିବେଶକମାନେ ଜମା କରିଥିବା ଅର୍ଥ ଫେରିପାଇବେ ।
ସେପଟେ ଟଙ୍କା ଫେରିପାଇବା ପାଇଁ ଜମାକାରୀମାନେ ଏବେ ଏଜେଂଟଙ୍କ ତଂଟି ଧରିଛନ୍ତି । ଆଉ ଏସବୁ ଭିତରେ ସ୍ପଷ୍ଟୀକରଣ ଦେଇ ସାହାରା ଉଲ୍ଲେଖ କରିଛି, କମ୍ପାନିରୁ ବାହାର କରାଯାଇଥିବା କିଛି ଏଜେଂଟ କୁଜି ନେତାମାନଙ୍କ ସହ ମିଶି ଜମାକାରୀଙ୍କ ମଧ୍ୟରେ ଅପପ୍ରଚାର କରୁଛନ୍ତି । ଅନ୍ୟପକ୍ଷରେ ସବୁ ଜିଲ୍ଲାର ଜମାକାରୀଙ୍କ ସମ୍ପର୍କରେ ତଥ୍ୟ ମାଗିଛନ୍ତି ରାଜ୍ୟ ସମବାୟ ସମିତି ସମୁହ ନିବନ୍ଧକ । ତଥ୍ୟ ମିଳିବାପରେ ତଦନ୍ତ ପାଇଁ ଏହାକୁ ଇକୋନୋମିକ ଅଫେନ୍ସ ୱିଙ୍ଗକୁ ଦିଆଯିବ ବୋଲି କହିଛନ୍ତି ରାଜ୍ୟ ସମବାୟ ସମିତି ସମୁହ ନିବନ୍ଧକ । ଏହାରି ଭିତରେ ଏବେ ବି ଜମାକାରୀ ଅନେଇ ବସିଛନ୍ତି ଟଙ୍କା ଫେରିପାଇବା ପାଇଁ । ହେଲେ ବେସାହାରା କରି ଦେଉଛି ସାହାରା ।
ଆଉ ଇଏ ହେଉଛି ୨୦୧୫ର ସ୍ପଷ୍ଟୀକରଣ । ଏଥିରେ ସାହାରା ମୁଖ୍ୟ ସୁବ୍ରତ ରାୟ ସାହାରା କହିଥିଲେ, ୪ମାସ ମଧ୍ୟରେ ଜମାକାରୀଙ୍କୁ ଟଙ୍କା ମିଳିଯିବ । ଜମାକାରୀଙ୍କ ଟଙ୍କା ତୁଳନାରେ ସାହାରା ପାଖରେ ୩ଗୁଣା ସମ୍ପତି ରହିଛି ତେଣୁ ଜମାକାରୀ ଶାନ୍ତିରେ ଶୁଅନ୍ତୁ ବୋଲି କୁହାଯାଇଥିଲା । ଏବେ ୪ବର୍ଷ ପରେ ସ୍ଥିତି ଯାହାକୁ ସେୟା । ଏବେ ବି ଅପେକ୍ଷା ରହିଛି ଜମାକାରୀଙ୍କୁ କେବେ ମିଳିବ ତାଙ୍କ ହକ ଟଙ୍କା ।