ଖରା ଆରମ୍ଭ ନହେଉଣୁ ପାଣି ଚିନ୍ତା : ମାଲକାନଗିରି ଜିଲ୍ଲାର ଆଦିବାସୀ ଇଲାକାରେ କାମରେ ଆସୁନି ସୋଲାର ପାଣି ପମ୍ପ, ଚିନ୍ତାରେ ନାମେଲଗୁଡା ଗାଁର ୩୦୦ ପରିବାର
କନକ ବ୍ୟୁରୋ : ଖରା ଆରମ୍ଭ ହୋଇ ଗଲାଣି । ଗାଁ ଗଣ୍ଡାରେ ନଳକୁପ ସମେତ ସମସ୍ତ ପାନୀୟ ଜଳ ପ୍ରକଳ୍ପ ଗୁଡିକ କାର୍ଯ୍ୟକ୍ଷମ କରିବା ପାଇଁ ଚାରିଆଡେ ତତ୍ପତା ପ୍ରକାଶ ପାଇଛି । ହେଲେ ମାଲକାନଗିରି ଜିଲ୍ଲାର ଆଦିବାସୀ ଇଲାକାରେ ପିଇବା ପାଣି ଯୋଗାଇବା ଲାଗି ନିର୍ମିତ ସୋଲାର ପମ୍ପ ଗୁଡିକ ଅଚଳ । ଗ୍ରାମବାସୀ ପ୍ରଶାସନକୁ ବାରମ୍ବାର ଗୁହାରି କଲେ ବି କୌଣସି ସୁଫଳ ମିଳୁନାହିଁ । ଆଗକୁ କେମିତି ମେଂଟିବ ଶୋଷ, ପିଲାଛୁଆ ପିଇବା ପାଇଁ ପାଣି କେଉଁଠୁ ଆଣିବେ ତାକୁ ନେଇ ଚିନ୍ତାରେ ମାଲକାନଗିରି ନାମେଲଗୁଡା ଗାଁର ୩୦୦ ପରିବାର । କେବଳ ନାମେଲଗୁଡା ନୁହେଁ ବରଂ ଜିଲ୍ଲାର ଅଧିକାଂଶ ସ୍ଥାନରେ ସୋଲାର ପାଣି ପମ୍ପ ଅଚଳ ଥିବା ବେଳେ ବିଭାଗୀୟ ଅଧିକରୀ କିନ୍ତୁ ନିରବ ।
Kanak News is now on WhatsApp
Join and get latest news updates delivered to you via WhatsApp
କୋରୁକୋଣ୍ଡା ବ୍ଲକ ନାମେଲଗୁଡା ଗାଁରେ ଆଦିବାସୀଙ୍କୁ ପାନୀୟ ଜଳ ଯୋଗାଇବା ଲାଗି ସୌର ଚାଳିତ ହ୍ୟାଣ୍ଡ ପମ୍ପ ନିର୍ମାଣ ହୋଇଛି । ହେଲେ ନିର୍ମାଣର ଦିନ କେଇଟା ପରେ ଅଚଳ ଏହି ସୌର ଚାଳିତ ପାନୀୟ ଜଳ ପ୍ରକଳ୍ପ । ଏଣେ ଗାଁରେ ଥିବା ନଳକୂଅରୁ ବାହାରୁଛି ଆଇରନ ପାଣି । ଯାହାକୁ ପିଇବା ଅନୁପଯୋଗୀ । ଆଗକୁ ଖରା ଦିନ ଥିବାରୁ ନାଳ, ପୋଖରୀ, ଚୁଆ ସବୁ ସୁଖି ଗଲାଣି । ତେଣୁ ପିଲାଛୁଆଙ୍କ ଶୋଷ ମେଂଟାଇବେ କେମିତି ଏବେ ସେହି ଚିନ୍ତାରେ ନାମେଲଗୁଡା ୩୦୦ ଆଦିବାସୀ ପରିବାର । ସୌର ଚାଳିତ ପାନୀୟ ଜଳ ପ୍ରକଳ୍ପ ଅଚଳ ନେଇ ସ୍ଥାନୀୟ ସରପଂଚ, ବିଡିଓ, ଗ୍ରାମ୍ୟ ଜଳ ଯୋଗାଣ ବିଭାଗ ଓ ଓରେଡାକୁ ଜଣାଇଲେ ବି କେହି ଶୁଣୁନଥିବା ଅଭିଯୋଗ ହୋଇଛି ।
ମାଲାକନଗିରି, କାଲିମେଳା ଓ ଖଇରପୁଟ ବ୍ଲକର ୩୦ରୁ ଅଧିକ ଗାଁରେ ଅଚଳ ସୌର ଚାଳିତ ପାନୀୟ ଜଳ ପ୍ରକଳ୍ପ । ଏନେଇ ସରକାରୀ ସୂଚନା ମଧ୍ୟ ରହିଛି । ହେଲେ ଏଯାଏଁ ମରାମତିର କୌଣସି ଖବର ନାହିଁ । ଗ୍ରାମ୍ୟ ଜଳ ଯୋଗାଣ ବିଭାଗର ଅନୁଦାନରେ ମାଲକାନଗିରି ଜିଲ୍ଲାରେ ୫୦୦ରୁ ଅଧିକ ସୌର ଚାଳିତ ଜଳ ପ୍ରକଳ୍ପ ହୋଇଛି । ଓଡିଶା ଅକ୍ଷୟ ଶକ୍ତି ବିକାଶ ସଂସ୍ଥା ୫ ଲକ୍ଷ ଟଙ୍କା ବ୍ୟୟରେ ବିଭିନ୍ନ ଘରୋଇ ସଂସ୍ଥା ଦ୍ୱାର ଏସବୁ ପ୍ରକଳ୍ପ ନିର୍ମାଣ କରିଛି । ୫ ବର୍ଷ ଧରି ପ୍ରକଳ୍ପର ରକ୍ଷଣାବେକ୍ଷଣ କରିବା ପାଇଁ ଓରେଡା ଚୁକ୍ତି କରିଛି ।
ସରକାରୀ ଭାବେ ୩୦ଟି ପ୍ରକଳ୍ପ ଅଚଳ ଥିବା କୁହାଯାଉଛି, ହେଲେ ଏହି ସଂଖ୍ୟା ଆହୁରି ଅଧିକ ବୋଲି ଅଭିଯୋଗ ହୋଇଛି । ତେବେ ବେଳ ଥାଉ ଥାଉ ଏଗୁଡିକର ମରାମତି କରିବା ଲାଗି ଦାବି ହୋଇଛି ।