ବାତ୍ୟା ଫୋନିରେ ସୌନ୍ଦର୍ଯ୍ୟ ହରାଇଛି ରାଜଧାନୀ ଭୁବନେଶ୍ୱର : ନଷ୍ଟ ହୋଇଥିବା ଗଛକୁ ପୁନରୁଦ୍ଧାର କରିବା ପାଇଁ ପ୍ରୟାସ କରୁଛି ଉନ୍ମୁକ୍ତ ଫାଉଣ୍ଡେସନ

149
କନକ ବ୍ୟୁରୋ : ପୁଣିଥରେ ଭୁବନେଶ୍ୱରକୁ ସଜାଡିବାର ପ୍ରୟାସ  । ମେ ମାସ ତିନି ତାରିଖରେ ଯେଉଁ ପ୍ରଳୟଙ୍କରୀ ଫୋନି ମାଡି ଆସିଲା ସେଥିରେ ଶ୍ରୀହୀନ ହୋଇଗଲା ରାଜଧାନୀ  । ବାତ୍ୟାର ସେହି କ୍ଷତକୁ ଭରଣା କରିବାକୁ ପୁଣିଥରେ ଲାଗିପଡିଛି ଭୁବନେଶ୍ୱର  । ଆଉ କେତେକ ସହୃଦୟ ବ୍ୟକ୍ତି ଓ ଅନୁଷ୍ଠାନ ଏହାର ମଙ୍ଗ ଧରିଛନ୍ତି ।  ସେହିଭଳି ଏକ ଅନୁଷ୍ଠାନ ହେଉଛି ଉନ୍ମୁକ୍ତ ଫାଉଣ୍ଡେସନ  । ରାଜଧାନୀରେ ବାତ୍ୟା ପ୍ରଭାବରେ ଶୋଇପଡିଥିବା ଗଛମାନଙ୍କୁ ଜିଲ୍ଲା ଜଙ୍ଗଲ ଅଧିକାରୀଙ୍କ ସହାୟତାରେ ପୁନରୁଦ୍ଧାର କରୁଛି ଅନୁଷ୍ଠାନର ଗ୍ରୀନ ଆର୍ମି ଚାପଟର  ।
ପ୍ରାଥମିକ ପର୍ଯ୍ୟାୟରେ ଭୁବନେଶ୍ୱର ଏୟାରପୋର୍ଟରେ ହଜାର ହଜାର ସଂଖ୍ୟାରେ ଭାଙ୍ଗି ଯାଇଥିଲା ବହୁ ପୁରୁଣା ଗଛ, ତାଠାରୁ ଅଧିକ ଛୋଟ ଗଛଗୁଡିକ ଶୋଇ ପଡିଥିଲା ଫୋନିର ପ୍ରଭାବରେ  । ସେହି ସବୁ ଗଛକୁ ପୁନରୁଦ୍ଧାର କରୁଛନ୍ତି ଉନୁ୍ମକ୍ତ ଫାଉଣ୍ଡେସନ  । ଦୁଇଦିନ ମଧ୍ୟରେ ଶହେରୁ ଅଧିକ ଗଛଗୁଡିକୁ ଠିଆ କରି ଏହାର ପୁନରୁଦ୍ଧାର କରୁଛନ୍ତି ଫାଉଣ୍ଡେସନର ସଦସ୍ୟ  । ଆଗକୁ ଏୟାର ପୋର୍ଟର ସମସ୍ତ ଗଛ ଓ ଓୟୁଏଟି ପର୍ଯ୍ୟନ୍ତ ସମସ୍ତ ଗଛଗୁଡିକୁ ପୁନରୁଦ୍ଧାର କରିବାର ଦାୟିତ୍ୱ ନେଇଛି ଫାଉଣ୍ଡେସନ  ।
ରାଜଧାନୀକୁ ସଜାଡିବାରେ ଲାଗିପଡିଥିବା ଉନ୍ମୁକ୍ତ ଫାଉଣ୍ଡେସନ ସୋସିଆଲ ମିଡିଆରେ ଲୋକମାନଙ୍କୁ ତାଙ୍କସହ ଯୋଡି ହେବା ପାଇଁ ଅପିଲ କରିଛନ୍ତି ଆଉ ପୁଣିଥରେ ଭୁବନେଶ୍ୱରକୁ ଗଢି ତୋଳିବାକୁ ଆରମ୍ଭ ହୋଇଛି ପ୍ରୟାସ  ।

Comments are closed.