କନକ ବ୍ୟୁରୋ : ଗୃହରେ ବାଚସ୍ପତିଙ୍କ ଉପରକୁ କାଗଜ ଫୋପାଡ଼ିଲେ କଂଗ୍ରେସ ବିଧାୟକ ତାରା ବାହିନୀପତି । ବିଧି ଅନୁସାରେ ଗୃହ ଚାଲୁ ନଥିବା ଅଭିଯୋଗ କରି ସେ ବାଚସ୍ପତି ସୂର୍ଯ୍ୟ ନାରାୟଣ ପାତ୍ରଙ୍କ ଉପରକୁ କାଗଜ ଫୋପାଡ଼ିଛନ୍ତି । ଆଉ ଏହ ଘଟଣାକୁ ନିଜେ ସ୍ୱୀକାର ମଧ୍ୟ କରିଛନ୍ତି ତାରା । ବାଚସ୍ପତି ନିୟମ ଉପରେ ଯାଉନାହାନ୍ତି ବୋଲି ସେ ଅଭିଯୋଗ କରିଛନ୍ତି । ପବିତ୍ର ଗୃହରେ ଏବେ କିଛି ନିୟମ ନାହିଁ, ନିୟମର ଅବମାନନା କରାଯାଉଛି । ପଦର ବ୍ୟବହାର କରିପାରୁ ନାହାନ୍ତି ବାଚସ୍ପତି । ବିଧାନସଭା ବନ୍ଦ କରିଦେବା ଦରକାର । ସମସ୍ତ ମନ୍ତ୍ରୀମାନେ ଏବେ ପାଟକୁରାରେ ଡେରା ପକାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଜନତା ଅପେକ୍ଷା କରି ବସିଛନ୍ତି ବିଧାନସଭାରେ ବିଧାୟକମାନେ କ’ଣ ପ୍ରଶ୍ନ କରୁଛନ୍ତି ଆଉ ମନ୍ତ୍ରୀମାନେ କ’ଣ ଉତ୍ତର ଦେଉଛନ୍ତି । ହେଲେ ଗୃହରେ ମନ୍ତ୍ରୀ ମରୁଡ଼ି ପଡ଼ିଛି । ମନ୍ତ୍ରୀଙ୍କ ବଦଳରେ ଉତ୍ତର ରଖୁଛନ୍ତ ଭାରପ୍ରାପ୍ତ ମନ୍ତ୍ରୀ । ମନ୍ତ୍ରୀମାନେ ପାଟକୁରା ନିର୍ବାଚନରେ ମାତିଛନ୍ତି । ଏପରିସ୍ଥଳେ ବାଚସ୍ପତି କାହିଁକି ବିଧାନସଭା ଚଳାଇଛନ୍ତି ବୋଲି ପ୍ରଶ୍ନ କରିଛନ୍ତି ତାରା । ତେଣୁ ପଦର ଅମର୍ଯ୍ୟାଦା ହେବା ସ୍ୱାଭାବିକ କଥା । ଭାରପ୍ରାପ୍ତ ମନ୍ତ୍ରୀମାନେ ଠିକ ଭାବରେ ପ୍ରଶ୍ନର ଉତ୍ତର ଦେଇପାରୁ ନାହାନ୍ତି । ଆଜି ବିଧାନସଭାରେ ପାଞ୍ଚଟି-ଛଅଟି ବିଭାଗ ଉପରେ ଆଲୋଚନା ହେଉଥିବା ସ୍ଥଳେ ଉତ୍ତର ରଖିଥିଲେ ମାତ୍ର ୨ ଜଣ ମନ୍ତ୍ରୀ । ମନ୍ତ୍ରୀମାନେ ସଠିକ ଭାବରେ ଗୃହରେ ଉତ୍ତର ରଖିପାରୁ ନାହିଁ ।
ବିଜେପିକୁ ଟାର୍ଗେଟ କରି ତାରା କହିଛନ୍ତି, ବିଜେପିର ୨୩ ଜଣ ବିଧାୟକ ଥିଲେ ହେଁ ତାଙ୍କ ଭିତରେ ତାଳମେଳ ନାହିଁ । ଜଣେ ଧାନ ପ୍ରସଙ୍ଗ ଉଠାଇବା ବେଳେ ଜଣେ କାଳିଆ କଥା ଉଠାଇଛନ୍ତି । ଆଉ କିଏ ପୁଣି ପାଟକୁରା କଥା କହୁଛି । ମୁଖ୍ୟ ବିିରୋଧୀ ଦଳର ସଦସ୍ୟମାନେ ଭିନ୍ନ ଭିନ୍ନ ମତ ଦେଉଛନ୍ତି । କିନ୍ତୁ କଂଗ୍ରେସର ୯ ଜଣ ବିଧାୟକ ଗୋଟିଏ ମତ ଦେଇଛନ୍ତି । କଂଗ୍ରେସ ବିଧାୟକଙ୍କ ସ୍ପଷ୍ଟ ନୀତି ରହିଛି ।