ସୁନ୍ଦରଗଡରେ ଚିନ୍ତା ବଢାଉଛି ରାଉରକେଲାର ସୁପର ସ୍ପ୍ରେଡର । ୧୦୬ ଜଣଙ୍କୁ ଆକ୍ରାନ୍ତ କରିଛନ୍ତି ଜଣେ ବ୍ୟକ୍ତି । ଆଜି ଚିହ୍ନଟ ହୋଇଥିବା ୮୩ ଜଣଙ୍କ ମଧ୍ୟରୁ ୧୬ ଜଣଙ୍କ ସୁପର ସ୍ପ୍ରେଡର ଲିଙ୍କ
କନକ ବ୍ୟୁରୋ : ସୁନ୍ଦରଗଡର ଚିନ୍ତା ବଢାଉଛି ରାଉରକେଲାର ସୁପର ସ୍ପ୍ରେଡର । ଜଣେ ବ୍ୟକ୍ତି ପ୍ରାୟ ୧୦୬ଜଣଙ୍କୁ ସଂକ୍ରମିତ କରିଥିବା ସୂଚନା ମିଳିଛି । ଆଜି ସୁନ୍ଦରଗଡ ଜିଲ୍ଲାରୁ ଚିହ୍ନଟ ହୋଇଥିବା ୮୩ଜଣ ଆକ୍ରାନ୍ତଙ୍କ ମଧ୍ୟରୁ ରାଉରକେଲାର ୧୬ଜଣଙ୍କର ସୁପର ସ୍ପ୍ରେଡର ଲିଙ୍କ ଥିବା ଜଣାପଡିଛି । ଏହାପୂର୍ବରୁ ରାଉରକେଲା ସେକ୍ଟର ୧୬ର ସୁପର ସ୍ପ୍ରେଡର କୁହାଯାଉଥିବା ଜଣେ ବ୍ୟକ୍ତିଙ୍କ ସଂସ୍ପର୍ଶରେ ଆସି ପ୍ରାୟ ୯୦ଜଣ ଆକ୍ରାନ୍ତ ହୋଇଥିଲେ । ଆଜି ପୁଣି ତାଙ୍କ ଲିଙ୍କରେ ୧୬ଜଣ ଚିହ୍ନଟ ହେବା ପରେ ସୁପର ସ୍ପ୍ରେଡର ଲିଙ୍କରେ ଏପର୍ଯ୍ୟନ୍ତ ୧୦୬ଜଣ ଆକ୍ରାନ୍ତ ହୋଇଥିବା ସୂଚନା ରହିଛି ।
Kanak News is now on WhatsApp
Join and get latest news updates delivered to you via WhatsApp
ରାଉରକେଲାର ୧୬ ନମ୍ବର ସେକ୍ଟରର ଜଣେ ଅଟୋ ଚାଳକ ଝାଡଖଣ୍ଡରୁ ଫେରିବାର କିଛି ଦିନ ପରେ ଅସୁସ୍ଥ ଅନୁଭବ କରିଥିଲେ । ପ୍ରଥମେ ଇଏସଆଇ ହସ୍ପିଟାଲ ଓ ପରେ ତାଙ୍କୁ ଆଇଜିଏଚରେ ଭର୍ତ୍ତି କରାଗଲା । ସ୍ୱାବ୍ ବି ପଠାଗଲା, ଆଉ ପଜିଟିଭ୍ ଚିହ୍ନଟ ହେଲେ ଅଟୋ ଡ୍ରାଇଭର ଜଣଙ୍କ । କିନ୍ତୁ ଉଚ୍ଚ ଡାଇବେଟିସ୍ ରୋଗରେ ପୀଡିତ ଥିବା କାରଣରୁ ତାଙ୍କର ମୃତ୍ୟୁ ହୋଇଗଲା । ସେ ପଜିଟିଭ୍ ଚିହ୍ନଟ ହେବା ପରେ ତାଙ୍କ ସଂସ୍ପର୍ଶରେ ଆସିଥିବା ଏପର୍ଯ୍ୟନ୍ତ ୧୦୬ଜଣ ଆକ୍ରାନ୍ତ ହୋଇସାରିଥିବା ସୂଚନା ମିଳିଛି । ସେହି ଅଂଚଳରେ କଂଟେନମେଂଟ ଜୋନ ବଳବତର ରହିଛି ।