ରଜର ଦୁଇ ଦିନ ପୂର୍ବରୁ ଓଡିଶାବାସୀଙ୍କୁ ସତର୍କ କଲେ ରାଜ୍ୟ ସରକାର : ବାଗଚୀ କହିଲେ, ଜୀବନ ଥିଲେ ବାରମ୍ବାର ଆସିବ ରଜ । ସେପଟେ ଭୁବନେଶ୍ୱରରେ ଭିଡ଼ ଲାଗିଥିବା ସୋରୁମକୁ ସିଲ କଲା ବିଏମସି
କନକ ବ୍ୟୁରୋ : ଆସୁଛି ଓଡିଆଙ୍କ ସବୁଠାରୁ ବଡ ପର୍ବ ରଜ । ଦୁଇ ଦିନ ପରେ ଅର୍ଥାତ ରବିବାର ଠାରୁ ଆରମ୍ଭ ହେବ ରଜ ପର୍ବ । ତେବେ ଏହି ପର୍ବକୁ ସତର୍କତା ସହ ପାଳନ ପାଇଁ ପରାମର୍ଶ ଦେଇଛନ୍ତି ସରକାର । ରଜ କେମିତି ପାଳନ କରିବେ ସେଥିପାଇଁ ପରାମର୍ଶ ଦେବାକୁ ଆଜି ସ୍ୱତନ୍ତ୍ର ଭାବେ ସରକାରଙ୍କ ତରଫରୁ ପ୍ରେସମିଟ୍ ଡକାଯାଇଥିଲା । ଅନ୍ୟପଟେ ରାଜ୍ୟର ବିଭିନ୍ନ ସ୍ଥାନରେ ରଜ ପାଳନ ନେଇ କଟକଣା ଲଗାଇଛି ପ୍ରଶାସନ । ଏପଟେ ଭୁବନେଶ୍ୱରରେ ଭିଡକୁ ଦେଖି ଶୁକ୍ରବାର ରାତି ୧୦ ଟା ପର୍ଯ୍ୟନ୍ତ କର୍ଫ୍ୟୁକୁ କୋହଳ କରିବାକୁ ପ୍ରଶାସନ ନିଷ୍ପତି ନେଇଛି ।
Kanak News is now on WhatsApp
Join and get latest news updates delivered to you via WhatsApp
ଦୁଇ ଦିନ ପରେ ଓଡ଼ିଶାର ଗଣପର୍ବ ରଜ ପାଳନ ହେବାକୁ ଯାଉଥିବା ବେଳେ ସରକାରଙ୍କ କରୋନା ମୁଖପାତ୍ର ସୁବ୍ରତ ବାଗଚୀ ପ୍ରେସମିଟ୍ କରି ସାରା ରାଜ୍ୟକୁ ସତର୍କ କରି ଦେଇଛନ୍ତି । ରଜ ପାଇଁ କିପରି ବଜାରରେ ଭିଡ଼ ଲାଗିଛି, ଏହି ଭିଡ କେତେ ବିପଦ ଆଣିପାରେ ଏହାକୁ ବୁଝାଇବା ସହ କେମିତି ରଜ ପାଳିବେ ଓ କରୋନା ଠାରୁ ଦୂରେଇ ରହିବେ, ସେ ବିଷୟରେ କହିଛନ୍ତି ବାଗଚୀ ।
ଏପଟେ ରଜ ପାଇଁ ରାଜଧାନୀ ବଜାରରେ ଲୋକଙ୍କ ପ୍ରବଳ ଭିଡ଼ ଦେଖିବାକୁ ମିଳିଛି । ଭୁବନେଶ୍ୱରର କିଛି ସୋ’ ରୁମରେ କୋଭିଡ ନିୟମର ଉଂଲଘନ କରାଯାଇ ସାମାଜିକ ଦୂରତା ରକ୍ଷା କରା ଯାଉନଥିବା ଦେଖିବାକୁ ମିଳିଛି । ଭିଡକୁ ଦେଖି ରାଜଧାନୀର କିଛି ସୋ’ରୁମକୁ ସିଲ କରିଛି ବିଏମସି । ମାଷ୍ଟର କ୍ୟାଂଟିନରେ ଥିବା ଅମ୍ବର ସୋ’ରୁମକୁ ସିଲ କରାଯାଇଛି ।
ରବି ଟକିଜ ନିକଟରେ ଥିବା ଭାଇ ଭାଇ ଟିଫିନ୍ ସେଂଟରକୁ ମଧ୍ୟ ବନ୍ଦ କରି ଦିଆଯାଇଛି । କୋଭିଡ ନିୟମକୁ ଉଲଂଘନ କରି ଏଠାରେ ଜଳଖିଆ ବିକ୍ରି କରାଯାଉଥିଲା । ସେହିପରି ଏକାମ୍ର ରୋଡରେ ଥିବା ଓମଫେଡ ସପ୍କୁ ମଧ୍ୟ ସିଲ୍ କରାଯାଇଛି ।
ରଜ ପାଳନ ପାଇଁ ଅଧିକ ଜନ ସମାଗମ ହେବାକୁ ଥିବାରୁ କଟକଣା ଲଗାଇଛି ପ୍ରଶାସନ । ଉଗ୍ରତାର ପୀଠ ଓ ବରୁଣେଇ ମନ୍ଦିରରେ ଲାଗିବ ୧୪୪ ଧାରା । ୧୪ ତାରିଖରୁ ୨୦ ତାରିଖ ଯାଏଁ ପ୍ରତିବର୍ଷ ଏଠାରେ ରଜ ଉତ୍ସବ ପାଳନ କରାଯାଏ । ଜନ ସମାଗମକୁ ଆଡେଇ ଯିବା ପାଇଁ ୭ ଦିନ ପର୍ଯ୍ୟନ୍ତ ଏହି ଦୁଇ ପୀଠରେ ୧୪୪ ଧାରା ଜାରି କରାଯିବ । ଏହି ସମୟରେ କୌଣସି ଉତ୍ସବ ଓ ସାଂସ୍କୃତିକ କାର୍ଯ୍ୟକ୍ରମ ମନା ।
ସେହିପରି କେନ୍ଦୁଝରରେ ରଜ ପର୍ବ ପାଳନ ପାଇଁ ହେଉଥିବା ସମସ୍ତ ପ୍ରକାର ମେଳା, ମହୋତ୍ସବ ଓ ଦୋଳି ଖେଳ ଉପରେ ରୋକ୍ ଲଗାଇଛି ଜିଲ୍ଲାପ୍ରଶାସନ । ଆସନ୍ତା ୧୧ ତାରିଖରୁ ୧୬ ତାରିଖ ପର୍ଯ୍ୟନ୍ତ କେଉଁଝରରେ କଟକଣା ରହିବ ବୋଲି ପ୍ରଶାସନ ପକ୍ଷରୁ କୁହାଯାଇଛି । ଏହି ସମୟରେ କୌଣସି ପ୍ରକାର ଜନସମାଗମ ହୋଇପାରିବ ନାହିଁ ବୋଲି ନିର୍ଦ୍ଦେଶନାମାରେ କୁହାଯାଇଛି ।
ଅନେକ କଟକଣା ଭିତରେ ଶୁକ୍ରବାର ରାତି କର୍ଫ୍ୟୁରେ ଆଂଶିକ କୋହଳ କରିଛନ୍ତି ରାଜ୍ୟ ସରକାର । ରଜ ପର୍ବକୁ ଦୃଷ୍ଟିରେ ରଖି ଶୁକ୍ରବାର ସଂଧ୍ୟା ୭ଟାରୁ କର୍ଫ୍ୟୁ ଜାରି ହେବ ନାହିଁ । ରାତି ୧୦ଟା ଯାଏଁ ଦୋକାନ ବଜାର ଖୋଲା ରହିବ । ଅର୍ଥାତ ରାତି ୧୦ରୁ ସକାଳ ୫ଟା ପର୍ଯ୍ୟନ୍ତ କର୍ଫ୍ୟୁ ଲାଗୁ ହେବ । ରବିବାର ପହିଲି ରଜ ଥିବା ବେଳେ ଶନିବାର ଓ ରବିବାର ସଟ୍ ଡାଉନ୍ । ତେଣୁ ଶୁକ୍ରବାର ରାତି କର୍ଫ୍ୟୁକୁ ୩ ଘଂଟା କୋହଳ କରିବାକୁ ନିଷ୍ପତି ନିଆଯାଇଛି ।