ସେ ଶିବ, ସେ ହିଁ ଶକ୍ତି, ଭୋଳାଶଙ୍କର ଭୋଲାଭାଲା ବୋଲି ଆମେ ତାଙ୍କୁ ଭୋକରେ ରଖିଦେଉଛୁ...

କନକ ବ୍ୟୁରୋ: ଭୋଳାନାଥ ସତରେ ତୁମେ ଭାରି ଭୋଲାଭାଲା... ସେଇଥି ପାଇଁ ତ ତୁମକୁ ଭୋକିଲା ରଖିବାକୁ ପଛାଉନାହାନ୍ତି ତୁମ ଆଦ୍ୟ ସେବକ । ସେମାନେ ପରା ତୁମ ପରିବାରର ସଦସ୍ୟ ତୁମ ମନକଥା କେମିତି ବୁଝିପାରୁନାହାନ୍ତି? ତୁମକୁ ଉପାସରେ କେମିତି ରଖିପାରୁଛନ୍ତି? ହଁ ମାନୁଛି ତାଙ୍କର ଅଳି ଆଉ ଜିଦ୍ କେଉଁଠି ନା କେଉଁଠି ପୂରଣ ହେଉନି । ତା’ବୋଲି କ’ଣ ତୁମକୁ ଭୋକରେ ରଖିଦେଲେ ତାଙ୍କ ମନସ୍କାମନା ପୂରଣ ହୋଇଯିବ? ତୁମେ ପରା ସମସ୍ତଙ୍କ ବାବା ବୁଝାଇପାରୁନ କେମିତି ?

ଅଧିକ ପଢ଼ନ୍ତୁ--- ଶିମିଳପାଳ ଅଭୟାରଣ୍ୟ ମଡେଲକୁ ଆପଣେଇବ ମହାରାଷ୍ଟ୍ର

ଯେମିତି ଜଣେ ଶିଶୁଟିଏ ତା’ ବାପା ପାଖରେ ଅଳି ଅଝଟ କରେ ଜିଦ୍ ଧରେ କିନ୍ତୁ ବାପା ପିଲାଟିର ସବୁ ଇଚ୍ଛା ପୂରଣ କରନ୍ତିନାହିଁ । ତା’ ମାନେ ନୁହେଁ ଯେ ବାପା ତାଙ୍କ ପିଲାଙ୍କୁ ଭଲପାଆନ୍ତିନି । ଯଦି ବାପା ନିଜ ଛୁଆକୁ ଭଲ ନପାଇଥାନ୍ତେ ତା’ହେଲେ ଭୋକିଲା ଶୋଇପଡ଼ୁଥିବା ସେ ଛୁଆର ପେଟ ଭରିବାକୁ ଚୁପଚାପ ମା’କୁ ଆକଟ କରି ବିଛଣା ପାଖକୁ ପଠାନ୍ତେ ନାହିଁ । ଠିକ୍ ସେପରି ବାବା ଲିଙ୍ଗରାଜ, ମନକଥା ବୁଝୁଥିବା ମହାଦେବ ମଧ୍ୟ ଆମ ଅଳି ଶୁଣନ୍ତି କିନ୍ତୁ ଯାହା ଆମ ପାଇଁ ଭଲ ସେହିପରି ଆମକୁ ଆଶୀର୍ବାଦ ସ୍ବରୂପ ଅଜାଡ଼ି ଦିଅନ୍ତି । 

ଏତେସବୁ ପରେ ଏକାମ୍ର କ୍ଷେତ୍ରର ଆରାଧ୍ୟ ଦେବତା ପ୍ରଭୁ ଶ୍ରୀଲିଙ୍ଗରାଜଙ୍କୁ ଭୋକରେ ରହିବାକୁ ପଡୁଛି । ଦୀର୍ଘ ବର୍ଷ ଧରି ମନ୍ଦିର ପ୍ରାଶସନିକ ବ୍ୟବସ୍ଥା ଏବଂ ସେବାୟତଙ୍କର ମଧ୍ୟରେ ଉପଯୁକ୍ତ ସମନ୍ବୟ ରହୁ ନଥିବାରୁ ଆମ ବାବା ଭୋଳାନାଥ ଭୋକିଲା ରହୁଛନ୍ତି । ଯେଉଁଥି ପାଇଁ ଶ୍ରଦ୍ଧାଳୁଙ୍କ ମନକୁ ବାରମ୍ବାର କୁଠାରାଘାତ ହେଉଛି । ପବିତ୍ର କାର୍ତ୍ତିକ ମାସରେ ମନର ମହେଶ୍ବରଙ୍କୁ ଏଭଳି ଉପାସରେ ରଖିବା ନେଇ ଭକ୍ତମାନେ ତୀବ୍ର ନିନ୍ଦା କରୁଛନ୍ତି । 

ପୂର୍ବରୁ ମଧ୍ୟ ଅନେକଥର ଉପାସରେ ରହିଛନ୍ତି ବାବା ଲିଙ୍ଗରାଜ । ଚଳିତ ବର୍ଷ ମଧ୍ୟ ଶ୍ରୀଲିଙ୍ଗରାଜ ମହାପ୍ରଭୁଙ୍କ ଶିବ ପବିତ୍ରାରୋପଣ ନୀତି ବନ୍ଦ ହୋଇଯାଇଥିଲା । ଫଳରେ ପ୍ରଭୁଙ୍କୁ ପଇତାଲାଗି ହୋଇପାରି ନଥିଲା । ଯେଉଁଠି ରକ୍ଷାବନ୍ଧନ ଭଳି ଦିନରେ ସାଧାରଣ ଲୋକେ ପଇତା ପିନ୍ଧନ୍ତି, ସେଠି ବାବା ଶ୍ରୀଲିଙ୍ଗରାଜ ପଇତା ପିନ୍ଧିପାରି ନଥିଲେ । ପ୍ରାୟ ୫ବର୍ଷ ହେଲା ଲାଗି ରହିଥିବା ସେବାୟତଙ୍କ ବିବାଦର ସମାଧାନ ହୋଇ ନଥିବାରୁ ଏଭଳି ସ୍ଥିତି ଉପୁଜୁଛି । ପରମବ୍ରହ୍ମ ମହେଶ୍ବରଙ୍କ ଆଦ୍ୟ ସେବକମାନେ ହୁଏ ତ ଭୁଲି ଯାଉଛନ୍ତି ଯେ ସେ ଭଲ ପାଉଥିବା ଯାଏଁ ଭୋଳାଶଙ୍କର, ରାଗିଗଲେ ଭାରି ଭୟଙ୍କର, ତେଣୁ ବାରମ୍ବାର ସୃଷ୍ଟିକର୍ତ୍ତାଙ୍କ ବିଶ୍ବାସ ସହ ଖେଳିବା ଶୋଭନୀୟ ନୁହେଁ ।