ଫିକା ପଡ଼ିପାରେ ଜିରୋ ନାଇଟ୍ ସେଲିବ୍ରେସନ, ବନ୍ଦ ରହିପାରେ ସ୍ବିଗି-ଜମାଟୋ ଡେଲିଭରି

କନକ ବ୍ୟୁରୋ: ଜିରୋ ନାଇଟର ଚମକ, ଧମକ ଭିତରେ ଏକ ବଡ଼ ସଙ୍କଟ ଏବେ ମୁଣ୍ଡ ଟେକିଛି । ନୂତନ ବର୍ଷର ଠିକ୍ ପୂର୍ବରୁ ଡିସେମ୍ବର ୩୧ ତାରିଖରେ ଜୋମାଟୋ, ସ୍ୱିଗି, ବ୍ଲିଙ୍କିଟ୍, ଜେପ୍ଟୋ, ଫ୍ଲିପକାର୍ଟ, ବିଗବାସ୍କେଟ୍ ଏବଂ ଆମାଜନ ଭଳି ପ୍ରମୁଖ ପ୍ଲାଟଫର୍ମ ଦ୍ୱାରା ନିଯୁକ୍ତ ଗିଗ୍ କର୍ମଚାରୀମାନେ ଦେଶବ୍ୟାପୀ ଧର୍ମଘଟ ଘୋଷଣା କରିଛନ୍ତି । ଖାଦ୍ୟ, କିରାଣା ଏବଂ ଅନ୍ୟାନ୍ୟ ଅନଲାଇନ୍ ବିତରଣର ଚାହିଦା ସାଧାରଣ ଅପେକ୍ଷା ବହୁତ ଅଧିକ ଥିବାରୁ ଏହି ଧର୍ମଘଟ ନୂଆ ବର୍ଷର ପାଳନରେ ବାଧା ଉପୁଜାଇପାରେ । ଯେତେବେଳେ ପୂରା ଦେଶ ଏବଂ ବିଶ୍ୱ ୨୦୨୬ କୁ ସ୍ୱାଗତ କରିବାରେ ବୁଡ଼ି ରହିବ ସେତେବେଳେ ଏହି ଡେଲିଭରି ବୟମାନେ ସେମାନଙ୍କର ହ୍ରାସ ପାଉଥିବା ରୋଜଗାର, ଅସୁରକ୍ଷିତ ୧୦-ମିନିଟ୍ ଡେଲିଭରି ମଡେଲ୍, ସାମାଜିକ ସୁରକ୍ଷାର ଅଭାବ ଏବଂ ଆଲଗୋରିଦମର ଚାପ ବିରୁଦ୍ଧରେ ସ୍ୱର ଉତ୍ତୋଳନ କରିବେ । ୟୁନିଅନଗୁଡ଼ିକ ଦାବି କରିଛନ୍ତି ଯେ ଲକ୍ଷ ଲକ୍ଷ ଡେଲିଭରି ବୟ ଏଥିରେ ଯୋଗଦେବେ । ଯାହା ବଡ଼ ସହରରେ ଡେଲିଭରି ସେବାକୁ ଗୁରୁତର ଭାବରେ ପ୍ରଭାବିତ କରିପାରେ । ଏହି ସମୟରେ କମ୍ପାନିଗୁଡ଼ିକ ଚିନ୍ତାରେ ରହିପାରନ୍ତି କାରଣ ଏହା ବର୍ଷର ସବୁଠାରୁ ବ୍ୟସ୍ତତମ ଦିନ । ଆଉ ଏହି ଦିନ ଧର୍ମଘଟ କ’ଣ ଗିଗ୍ ଅର୍ଥନୀତିର କଠୋର ବାସ୍ତବତାକୁ ପ୍ରକାଶ କରିବ ?

ସାବଧାନ୍ ! ଅତ୍ୟଧିକ ଚା’ ପିଇବା ହୋଇପାରେ ଘାତକ

ଗିଗ୍ କର୍ମଚାରୀମାନେ କୁହନ୍ତି ଯେ ୧୦-୨୦ ମିନିଟର ଡେଲିଭରି ମଡେଲ୍ ଡେଲିଭରି ବୟଙ୍କ ଉପରେ ବିପଜ୍ଜନକ ଚାପ ପକାଇଥାଏ ଯାହା ଫଳରେ ସଡ଼କ ଦୁର୍ଘଟଣାର ଆଶଙ୍କା ବୃଦ୍ଧି ପାଏ । ଆଲଗୋରିଦମ-ଆଧାରିତ ଦଣ୍ଡ ଏବଂ ଆଇଡି ବ୍ଲକ୍ କରିବା ଡେଲିଭରି ବୟଙ୍କ ଜୀବିକାକୁ ପ୍ରଭାବିତ କରିପାରେ । ଭାରତର ପ୍ରଥମ ମହିଳା ନେତୃତ୍ୱାଧୀନ ଜାତୀୟ ଗିଗ୍ କର୍ମଚାରୀ ସଂଘ ଗିଗ୍ ଏବଂ ପ୍ଲାଟଫର୍ମ ସେବା କର୍ମଚାରୀ ସଂଘ ଶ୍ରମ ମନ୍ତ୍ରୀ ମନସୁଖ ମାଣ୍ଡଭିଆଙ୍କୁ ଚିଠି ଲେଖି ଶ୍ରମ ଅଧିକାର, ସାମାଜିକ ସୁରକ୍ଷା ଦେବା ପ୍ରସଙ୍ଗରେ ତୁରନ୍ତ ହସ୍ତକ୍ଷେପ କରିବାକୁ ଅନୁରୋଧ କରିଛି । ତେବେ ଗିଗ୍ କର୍ମଚାରୀଙ୍କ ୧୦ଟି ପ୍ରମୁଖ ଦାବି କିଛି ଏମିତି ରହିଛି । 

୧. ୧୦-୨୦ ମିନିଟ୍ ଡେଲିଭରି ଆବଶ୍ୟକତାକୁ ଉଚ୍ଛେଦ କରାଯିବା ଉଚିତ ।  
୨ . ପ୍ରତି କିଲୋମିଟର ପିଛା ସର୍ବନିମ୍ନ ୨୦ ଟଙ୍କା ଦେୟ କରାଯିବା ଉଚିତ । ଏହା ସମସ୍ତ ପ୍ରମୁଖ ପ୍ଲାଟଫର୍ମରେ ପ୍ରଯୁଜ୍ୟ ହେବା ଉଚିତ ।
୩ . ୨୪ ହଜାର ଟଙ୍କା ମାସିକ ଦରମା ବାବଦକୁ ମିଳୁ । 
୪ . ମନଇଚ୍ଛା ଆଇଡି ବ୍ଲକିଂ ଏବଂ ଆଲଗୋରିଦମିକ୍ ଦଣ୍ଡ ବନ୍ଦ କରିବା , ରେଟିଂ-ଆଧାରିତ ଦଣ୍ଡ ବନ୍ଦ କରିବା ପାଇଁ ମଧ୍ୟ ଦାବି ହେଉଛି ।
୫ . ପିକ୍-ଆୱାର ଚାପ ଏବଂ ସ୍ଲଟ୍ ସିଷ୍ଟମକୁ ଉଚ୍ଛେଦ କରନ୍ତୁ ଯାହା କର୍ମଚାରୀମାନଙ୍କ ମତରେ ମାନସିକ ଏବଂ ଶାରୀରିକ ଚାପ ବୃଦ୍ଧି କରେ ।
୬ . ପ୍ଲାଟଫର୍ମ ଡିଡକ୍ସନ ୨୦% ପର୍ଯ୍ୟନ୍ତ ସୀମିତ ହେବା ଉଚିତ । ଗିଗ୍ କର୍ମଚାରୀମାନେ ମଧ୍ୟ ଅଟୋ-ଆଡଭାନ୍ସ ରିକଭରି ବିରୋଧରେ ପ୍ରତିବାଦ କରୁଛନ୍ତି ।
୭ . ଗ୍ରାହକଙ୍କ ବାତିଲକରଣକୁ କ୍ଷତିପୂରଣ ଦିଆଯିବା ଉଚିତ ଏବଂ କର୍ମଚାରୀଙ୍କ କାର୍ଯ୍ୟଦକ୍ଷତା ମାପକରେ ଅନ୍ତର୍ଭୁକ୍ତ କରାଯିବା ଉଚିତ ନୁହେଁ ।
୮ . ବିତରଣ ସମୟସୀମା ବୃଦ୍ଧି କରାଯିବା ଉଚିତ । AI ସମର୍ଥନକୁ 24x7 ମାନବ ଅଭିଯୋଗ ସମାଧାନ ବ୍ୟବସ୍ଥା ସହିତ ବଦଳାଯିବା ଉଚିତ ।
୯ . 'ସହଭାଗୀ' ନୁହେଁ 'ଶ୍ରମିକ' ଶବ୍ଦର ଆଇନଗତ ସ୍ବୀକୃତି ଉପରେ ଧ୍ୟାନ ଦିଆଯିବା ଉଚିତ ।
୧୦. ଡେଲିଭରି ବୟମାନେ ଶ୍ରମ ଆଇନ ଅନୁଯାୟୀ ସେମାନଙ୍କର ଅଧିକାର ଚାହାନ୍ତି ।
ଶିଳ୍ପ ବିବାଦ ଆଇନ ଅନୁଯାୟୀ ତ୍ରିପାକ୍ଷିକ ଆଲୋଚନା ମାଧ୍ୟମରେ ସମସ୍ୟାର ସମାଧାନ କରିବାକୁ ସଂଘ କେନ୍ଦ୍ର ସରକାରଙ୍କୁ ଅନୁରୋଧ କରୁଛି ।