ତୁରନ୍ତ ଦୂର ହେବ ଏଟିଏମରେ ଟଙ୍କା ଅଭାବ ଜନିତ ସମସ୍ୟା : ରିଜର୍ଭ ବ୍ୟାଙ୍କକୁ ଅର୍ଥ ମନ୍ତ୍ରାଳୟର ନିର୍ଦ୍ଦେଶ
ଦେଶର କେତେକ ସ୍ଥାନରେ ଏଟିଏମ୍ ଗୁଡ଼ିକରେ ଏବେ ଟଙ୍କାର ଅଭାବ ପରିଲକ୍ଷିତ ହେଉଛି । ଏହି ସ୍ଥିତିର ସମୀକ୍ଷା କରିବା ସହିତ ତୁରନ୍ତ ଏହାର ସମାଧାନ କରିବା ଲାଗି ଅର୍ଥ ମନ୍ତ୍ରାଳୟ ପକ୍ଷରୁ ରିଜର୍ଭ ବ୍ୟାଙ୍କକୁ ନିର୍ଦେଶ ଦିଆଯାଇଛି । ରିଜର୍ଭ ବ୍ୟାଙ୍କ ମାଧ୍ୟମରେ ସରକାର ବ୍ୟାଙ୍କ ଗୁଡ଼ିକୁ କହିଛନ୍ତି ଯେଉଁ ଏଟିଏମ୍ରେ ଟଙ୍କା ନାହିଁ ସେଥିରେ ଟଙ୍କା ଭର୍ତ୍ତି କରିବା ସହିତ ଖରାପ ହୋଇ ପଡ଼ିଥିବା ଏଟିଏମ୍ ଗୁଡ଼ିକୁ ତୁରନ୍ତ ଠିକ୍ କର । ଏହାଫଳରେ ଏଟିଏମ୍ରେ ଟଙ୍କା ଅଭାବ ଜନିତ ସମସ୍ୟା ତୁରନ୍ତ ଦୂର ହେବ ବୋଲି ଆଶା ରଖାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଏକ ସୂତ୍ରରୁ ମିଳିଥିବା ସୂଚନା ଅନୁଯାୟୀ, କେତେକ ରାଜ୍ୟରେ ଏଟିଏମ୍ରେ ଟଙ୍କା ଅଭାବ ଦେଖାଦେବାର କେତୋଟି କାରଣ ମଧ୍ୟ ସାମ୍ନାକୁ ଆସିଛି । ସେଥିମଧ୍ୟରେ ଗୋଟିଏ ହେଲା ସରକାରଙ୍କ ପକ୍ଷରୁ ଆର୍ଥିକ ନିୟନ୍ତ୍ରଣ ଏବଂ ଜମା ବୀମା (ଏଫ୍ଆର୍ଡିଆଇ) ବିଲ୍ ଆଣିବା ଯୋଜନା । ଅବଶ୍ୟ ଏହି ବିଲ୍ ଆଣିବା ଯୋଜନାକୁ ବନ୍ଦ କରି ଦିଆଯାଇଛି । ଅନ୍ୟ ଏକ ସୂଚନା ଅନୁଯାୟୀ ଏଟିଏମ୍ ଗୁଡ଼ିକରେ ବ୍ୟାଙ୍କ ଗୁଡ଼ିକ ୨୦୦୦ ଟଙ୍କିଆ ନୋଟ୍ ବଦଳରେ ଛୋଟ ମୂଲ୍ୟର ନୋଟ୍ ଅଧିକ ସଂଖ୍ୟାରେ ରଖୁଛନ୍ତି । ଏଥିପାଇଁ ଏଟିଏମ୍ ଗୁଡ଼ିକ ଶୀଘ୍ର ଖାଲି ହୋଇଯାଉଛି ।
ଏଥିବ୍ୟତୀତ ଅର୍ଥ ମନ୍ତ୍ରାଳୟ ଜାଣିବାକୁ ପାଇଛି ଯେ ଦେଶରେ ସମୁଦାୟ ଏଟିଏମ୍ରୁ ୧୫ ପ୍ରତିଶତ ଏଟିଏମ୍ ଖରାପ ଅଛି । ବଡ଼ ସହରରେ ଖରାପ ଥିବା ଏଟିଏମ୍ ଗୁଡ଼ିକୁ ଶୀଘ୍ର ଠିକ୍ କରି ଦିଆଯାଉଛି । କିନ୍ତୁ ଛୋଟ ସହର ଏବଂ ଗ୍ରାମାଞ୍ଚଳରେ ଖରାପ ଏଟିଏମ୍ ଗୁଡ଼ିକୁ ଠିକ୍ କରିବା ଲାଗି ସମୟ ଲାଗୁଛି । ଏତଦ୍ବ୍ୟତୀତ ଡିଜିଟାଲ ଇଣ୍ଡିଆକୁ ସରକାର ପ୍ରୋତ୍ସାହନ ଦେବା ପରେ ଦେଶରେ ବ୍ୟାଙ୍କ ଗୁଡ଼ିକ ସେମାନଙ୍କ ଏଟିଏମ୍ ପ୍ରସାର ସଂଖ୍ୟାକୁ ସୀମିତ କରି ଦେଇଛନ୍ତି । ଏହାର ପ୍ରଭାବରେ ବି ଏଟିଏମ୍ରେ ଟଙ୍କା ଅଭାବ ଦେଖାଦେଇଛି । ସେହିଭଳି ଦେଶର ବ୍ୟାଙ୍କିଙ୍ଗ ବ୍ୟବସ୍ଥାରେ ଗତ କିଛି ମାସ ପୂର୍ବେ ନୂଆ ୨୦୦ ଟଙ୍କିଆ ନୋଟ୍ ପ୍ରଚଳନ କରାଯାଇଛି । ଏଟିଏମ୍ରେ ଏହି ନୋଟ୍କୁ ଭର୍ତ୍ତି କରିବାରେ ଅସୁବିଧା ଦେଖାଦେଉଛି । ଫଳରେ ଏଟିଏମ୍ରେ ନୋଟ୍ ଅଭାବର ଏହା ମଧ୍ୟ ଏକ କାରଣ ହୋଇପାରେ ବୋଲି କୁହାଯାଉଛି ।