ବାତ୍ୟା ପରବର୍ତ୍ତୀ ସ୍ଥିତିରେ ସୁଧାର : ପୁରୀକୁ ଛାଡ଼ିଦେଲେ ୯୦% ଅଧିକ ଉପଭୋକ୍ତା ପାଇଲେଣି ବିଜୁଳି, ଶ୍ରୀକ୍ଷେତ୍ର ସ୍ବାଭାବିକ ହେବାକୁ ଲାଗିବ ସମୟ
କନକ ବ୍ୟୁରୋ : ଅତି ପ୍ରଳୟଙ୍କରୀ ବାତ୍ୟା ଫନି ଯୋଗୁଁ ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛି ପୁରୀ ଓ ଖୋର୍ଦ୍ଧା ଜିଲ୍ଲା । ବିଶେଷ କରି ଏସବୁ ଜିଲ୍ଲାର ବିଭିନ୍ନ ଅଞ୍ଚଳରେ ବିଦ୍ୟୁତ୍ ସେବା ସଂପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଥିଲା । ଇତି ମଧ୍ୟରେ ଅବଶିଷ୍ଟ ପ୍ରଭାବିତ ଜିଲ୍ଲାଗୁଡ଼ିକରେ ପାଖାପାଖି ବାତ୍ୟା ପୂର୍ବ ସ୍ଥିତି ଫେରି ଆସିଲାଣି । ପୁରୀକୁ ଛାଡ଼ିଦେଲେ ବାତ୍ୟା କ୍ଷତିଗ୍ରସ୍ତ ସମସ୍ତ ଜିଲ୍ଲାରେ ବିଦ୍ୟୁତ୍ ଭିତ୍ତିଭୂମିକୁ ସଜଡ଼ା ଯାଇ ପ୍ରାୟ ୯୦%ରୁ ଅଧିକ ଉପଭୋକ୍ତାଙ୍କୁ ପୁନଃବିଦ୍ୟୁତ୍ ସଂଯୋଗ ଦିଆଯାଇଛି । ତେବେ ପୁରୀ ଜିଲ୍ଲାରେ ସ୍ବାଭାବିକ ଅବସ୍ଥା ଫେରିବାକୁ ଆଉ ବେଶ୍ କିଛି ଦିନ ସମୟ ଲାଗିବ । ରାଜ୍ୟ ସରକାରଙ୍କ ପକ୍ଷରୁ ଯୁଦ୍ଧକାଳୀନ ଭିତ୍ତିରେ ଚାଲିଥିବା ବାତ୍ୟା ପରବର୍ତୀ ପୁନରୁଦ୍ଧାର ଓ ପୁନର୍ନିମାଣ କାର୍ଯ୍ୟଗୁଡ଼ିକର ଅଗ୍ରଗତିରୁ ଏଭଳି ସ୍ଥିତି ସାମ୍ନାକୁ ଆସିଛି ।
Kanak News is now on WhatsApp
Join and get latest news updates delivered to you via WhatsApp
ବାତ୍ୟା ପରବର୍ତୀ ସ୍ଥିତି ନେଇ ରାଜ୍ୟ ସରକାରଙ୍କ ତରଫରୁ ବିସ୍ତୃତ ସୂଚନା ଦିଆଯାଇ ଛି। ଏହି ସୂଚନା ଅନୁଯାୟୀ ପୁରୀ ସହରର ପିଇଡି ଡିଭିଜନ ଅନ୍ତର୍ଗତ ୫୬ଟି ଫିଡରରୁ ୧୨ଟି ଫିଡର କାର୍ଯ୍ୟକ୍ଷମ ହୋଇଛି । ଏନ୍ଇଡି ଡିଭିଜନରେ ୨୮ଟି ଫିଡରରୁ ୫ଟି କାର୍ଯ୍ୟକ୍ଷମ ହୋଇଛି । ଗତକାଲି ସୁଦ୍ଧା ପୁରୀ ଜିଲ୍ଲାର ୧୯ ହଜାରରୁ ଅଧିକ ଉପଭୋକ୍ତାଙ୍କୁ ଦିଆଯାଇଛି ବିଦ୍ୟୁତ୍ ସଂଯୋଗ । ସେହିପରି କଟକ ସିଡିଡି-୧ ଡିଭିଜନରେ ଥିବା ସମସ୍ତ ଉପଭୋକ୍ତାଙ୍କୁ ବିଜୁଳି ସଂଯୋଗ ଦିଆଯାଇଛି । ସିଡିଡି-୨ରେ ପ୍ରାୟ ୬୯ ହଜାର ୩୧ ଉପଭୋକ୍ତାଙ୍କ ମଧ୍ୟରୁ ଆଜି ସୁଦ୍ଧା ୬୪ ହଜାର ୧୯୬ ଉପଭୋକ୍ତାଙ୍କୁ ମିଳିଛି ବିଦ୍ୟୁତ୍ ସଂଯୋଗ । ସେହିପରି କଟକ ସିଇଡି ଅନ୍ତର୍ଗତ ଉଭୟ ସହରାଞ୍ଚଳ ଓ ଗ୍ରାମାଞ୍ଚଳର ୯୫ ହଜାର ୫୯୯ ଉପଭୋକ୍ତାଙ୍କ ମଧ୍ୟରୁ ବର୍ତମାନ ସୁଦ୍ଧା ୭୧ ହଜାର ୨୦୦ ଉପଭୋକ୍ତାଙ୍କୁ ବିଦ୍ୟୁତ୍ ସଂଯୋଗ ଦିଆଯାଇଛି ।
ଟେଲି ଯୋଗାଯୋଗ ଓ ମୋବାଇଲ୍ ସେବା କ୍ଷେତ୍ରର ଅଗ୍ରଗତି ଅନୁଯାୟୀ ପୁରୀ ସହରରେ ପ୍ରାୟ ୯୦ ପ୍ରତିଶତ ସେବା ଉପଲବ୍ଧ ହେଉଛି । ଖୋର୍ଦ୍ଧା ଜିଲ୍ଲାରେ ୮୭ ପ୍ରତିଶତ ମୋବାଇଲ୍ ଟାୱାର କାର୍ଯ୍ୟକ୍ଷମ କରାଯାଇଥିବାବେଳେ ପୁରୀ ଜିଲ୍ଲାରେ ଏହା ୬୪ ପ୍ରତିଶତ ଓ କଟକ ଜିଲ୍ଲାର ୯୬ ପ୍ରତିଶତରେ ପହଞ୍ଚିଛି । ସେହିପରି ଭୁବନେଶ୍ୱର ସହରରେ ୮୮%, ପୁରୀ ସହରରେ ୫୯% ଓ କଟକ ସହରରେ ୯୬% ମୋବାଇଲ ଟାୱାର କାର୍ଯ୍ୟକ୍ଷମ ହୋଇଛି । ଖୋର୍ଦ୍ଧା ଓ କଟକରେ ବିଏସ୍ଏନ୍ଏଲ୍ ଫିକ୍ସଡ୍ ଲ୍ୟାଣ୍ଡଲାଇନ୍ ଏକ୍ସଚେଞ୍ଜ ଶତ ପ୍ରତିଶତ କାର୍ଯ୍ୟକ୍ଷମ ହୋଇଥିବାବେଳେ ପୁରୀରେ ୪୧ରୁ ୩୮ଟି କାର୍ଯ୍ୟ କରୁଛି । ସେହିପରି ବ୍ୟାଙ୍କିଙ୍ଗ ସେବା ଯୋଗାଉଥିବା ପୁରୀର ୯୪.୧୪ ପ୍ରତିଶତ ବ୍ୟାଙ୍କ ଶାଖା କାର୍ଯ୍ୟ କରୁଥିବା ବେଳେ ଖୋର୍ଧା କଟକ, ଜଗତ୍ସିଂହପୁର ଓ ଗଞ୍ଜାମରେ ପାଖାପାଖି ଶତ ପ୍ରତିଶତ ବ୍ୟାଙ୍କ ଶାଖା କାର୍ଯ୍ୟକ୍ଷମ ହୋଇସାରିଛି । ପୁରୀ, ଖୋର୍ଧା, କଟକ, ଜଗତ୍ସିଂହପୁର ଓ କେନ୍ଦ୍ରାପଡ଼ାରେ ଯଥାକ୍ରମେ ୩୭.୪୫, ୭୭.୨୮, ୮୦.୮୪, ୮୧.୪୮ ଓ ୮୪.୮୦ ପ୍ରତିଶତ ଏଟିଏମ୍ କାର୍ଯ୍ୟ କରୁଛି ।
ଅତ୍ୟଧିକ ପ୍ରଭାବିତ ପୁରୀ ଓ ଖୋର୍ଧା ଜିଲ୍ଲାରେ ସ୍ୱାସ୍ଥ୍ୟ ବିଭାଗ ତତ୍ପରତାର ସହିତ ସ୍ୱାସ୍ଥ୍ୟସେବା ଓ ସ୍ୱାସ୍ଥ୍ୟ ସଚେତନତା ପରିଚାଳନା କରୁଛନ୍ତି। ପୁରୀ ଜିଲ୍ଲାରେ ୪୬ଟି ମେଡିକାଲ ରିଲିଫ ସେଣ୍ଟର କାର୍ଯ୍ୟ କରୁଛି । ପୁରୀ ଓ ଖୋର୍ଦ୍ଧାର ପ୍ରଭାବିତ ପଞ୍ଚାୟତଗୁଡ଼ିକରେ ସ୍ୱାସ୍ଥ୍ୟସେବା ନିମନ୍ତେ ୨୦ଜଣ ଡାକ୍ତର ଓ ୨୦୦ଜଣ ବହୁମୁଖୀ ସ୍ୱାସ୍ଥ୍ୟକର୍ମୀ କାର୍ଯ୍ୟ କରୁଛନ୍ତି । ୧,୪୫,୬୯୯ରୁ ଅଧିକ ଖୋଲା ଜଳଉତ୍ସ ବିଶୋଧନ କରାଯାଇଥିବା ସରକାରୀ ସ୍ତରରେ ସୂଚନା ଦିଆଯାଇଛି ।