ଶୀତଳ ଷଷ୍ଠୀ ପାଇଁ ଉଠୁଛି ପଡୁଛି ସମ୍ବଲପୁର । ଝାଡୁଆପଡ଼ା, ମୁଦିପଡ଼ା, ବଡବଜାର ଓ ଠାକୁରପଡ଼ାରେ ସରିଲା ମହାଦେବଙ୍କ ପତରପେଣ୍ଡି ପର୍ବ । ଆଜି ଅନୁଷ୍ଠିତ ହେବ ଦେବ ନିମନ୍ତ୍ରଣ
କନକ ବ୍ୟୁରୋ : ପ୍ରସିଦ୍ଧ ଶୀତଳଷଷ୍ଠୀ ଯାତ୍ରା ଅବସରରେ ସମ୍ବଲପୁରର ଝାଡୁଆପଡ଼ା, ମୁଦିପଡ଼ା, ବଡବଜାର, ଠାକୁରପଡ଼ା ଓ ଅନେକ ଯାତ୍ରା କମିଟିର ପତରପେଣ୍ଡି ବା ନିର୍ବନ୍ଧ କାର୍ଯ୍ୟ ଅନୁଷ୍ଠିତ ହୋଇଯାଇଛି । ଗତକାଲି ଝାଡୁଆପଡ଼ା ଲୋକନାଥ ବାବା ମନ୍ଦିରରୁ ବାହାରି ଝାଡୁଆପଡା ନିକଟ କନ୍ୟାର ପିତାମାତା କିଶୋର ଷଢଙ୍ଗୀଙ୍କ ବାସଭବନରେ ପହଂଚିଥିଲେ । ଚଳିତ ବର୍ଷ କରୋନା କଟକଣା ଯୋଗୁଁ କୌଣସି ଶୋଭାଯାତ୍ରା ହୋଇନଥିଲା । କେବଳ ବିଧି ରକ୍ଷା ସ୍ୱରୂପ ପରମ୍ପରା ଅନୁସାରେ ଝିଅର ପିତାମାତା ପୁଅର ଯୋଗ୍ୟତା ଉପରେ ପ୍ରଶ୍ନ ଉଠାଇଥିଲେ । ସାଙ୍ଗରେ ଆସିଥିବା ସପ୍ତ ଦେବପାଠ କରି ପୁଅର ଯୋଗ୍ୟତା ସମ୍ପର୍କରେ କନ୍ୟାର ପିତାମାତାଙ୍କୁ ବୁଝାଇଥିଲେ ।
Kanak News is now on WhatsApp
Join and get latest news updates delivered to you via WhatsApp
କନ୍ୟା ଘର ରାଜି ହେବା ପରେ ବର ପିତା ପରମ୍ପରା ଅନୁସାରେ କନ୍ୟା ପିତାଙ୍କୁ ସର୍ଗିପତ୍ର ଦେଇ ନିର୍ବନ୍ଧ କାର୍ଯ୍ୟ ସମ୍ପୂର୍ଣ୍ଣ କରିଥିଲେ । ଆଜି ଝାଡୁଆପଡ଼ାର ଲୋକନାଥ ବାବାଙ୍କର ଦେବ ନିମନ୍ତ୍ରଣ ଅନୁଷ୍ଠିତ ହେବ । ଅନ୍ୟପଟେ ମା ପାର୍ବତୀଙ୍କୁ ଝିଅ ରୂପରେ ପାଇ ପିତାମାତା ଖୁସି ହେଉଥିବାବେଳେ ବାହାଘର ପାଇଁ ସମ୍ପୂର୍ଣ୍ଣ ରୂପେ ପ୍ରସ୍ତୁତ ହୋଇଥିବା କହିଛନ୍ତି ପିତାମାତା । ସେପଟେ ମୁଦିପଡ଼ା ଜଗେଶ୍ୱର ବାବାଙ୍କର ମଧ୍ୟ ନିର୍ବନ୍ଧ ସମ୍ପୂର୍ଣ୍ଣ ହୋଇଛି । ବଡବଜାରର ଶୀତଳେଶ୍ୱର ବାବା ଓ ଅନ୍ୟ ଶିବାଳୟ ଗୁଡିକରେ ମଧ୍ୟ ପତରପେଣ୍ଡି ଉତ୍ସବ ଅନୁଷ୍ଠିତ ହୋଇଛି ।
ସେପଟେ ରାଜଧାନୀ ଭୁବନେଶ୍ୱରରେ ଆୟୋଜିତ ହେବ ମହାପ୍ରଭୁଙ୍କ ବିବାହ ଉତ୍ସବ । ଶୀତଳ ଷଷ୍ଠୀ ଶିବ ପାର୍ବତୀ ବିବାହ ପାଇଁ ମିଳିଛି ପ୍ରଶାସନିକ ଅନୁମତି । ବିଏମସି କମିଶନରଙ୍କ ପକ୍ଷରୁ ଶୀତଳଷଷ୍ଠୀ ପାଇଁ ଅନୁମତି ଦିଆଯାଇଛି । ତେବେ ଏଥିପାଇଁ କେତେକ କଟକଣା ମଧ୍ୟ ରଖିଛି ବିଏମସି । ବିନା ଶୋଭାଯାତ୍ରା ଓ ସାଜସଜ୍ଜାରେ ଏହି ଦେବନୀତି ଅନୁଷ୍ଠିତ ହେବ । ସାମାଜିକ ଦୂରତା ରହିବା ସହିତ ମାସ୍କ ପିନ୍ଧିବା ବାଧ୍ୟତା ମୂଳକ କରାଯାଇଛି । ନୀତିର ଦାୟିତ୍ୱରେ ଥିବା ସୀମିତ ସେବାୟତ ହିଁ ଏହି ଶୀତଳ ଷଷ୍ଠୀ କାର୍ଯ୍ୟକ୍ରମରେ ସାମିଲ ହେବେ । ସେମାନଙ୍କର ଥର୍ମାଲ ସ୍କ୍ରିନିଂ କରାଯିବ । ଥଣ୍ଡା, କାଶ ଭଳି ଲକ୍ଷଣ ଥିଲେ ସେମାନେ ଏଥିରେ ସାମିଲ ହୋଇ ପାରିବେ ନାହିଁ ବୋଲି ବିଏମସି ପକ୍ଷରୁ କୁହାଯାଇଛି ।