ଅନ୍ତରୀଣ ପୁଲିସ ମୁଖ୍ୟ ଭାବେ ଦାୟିତ୍ୱ ନେଲେ ସତ୍ୟଜିତ ମହାନ୍ତି : ଦାୟିତ୍ୱ ନେବାପରେ କହିଲେ, ଆଇନଶୃଙ୍ଖଳା ରକ୍ଷା ହେବ ପ୍ରଥମ କାମ
କନକ ବ୍ୟୁରୋ : ଦାୟିତ୍ୱ ନେଲେ ସତ୍ୟଜିତ ମହାନ୍ତି । ପୋଲିସ ଡିଜି ବିଜୟ ଶର୍ମା ବିଦା ହେବା ପରେ ଅନ୍ତରୀଣ ପୋଲିସ ଡିଜି ଭାବରେ ଆଜି ଦାୟିତ୍ୱ ଗ୍ରହଣ କରିଛନ୍ତି ସତ୍ୟଜିତ୍ ମହାନ୍ତି । ଆଜି କଟକ ପୋଲିସ ମୁଖ୍ୟାଳୟରେ ସେ ବିଦ୍ଧିବଦ୍ଧ ଭାବେ ଦାୟିତ୍ୱ ଗ୍ରହଣ କରିଛନ୍ତି । ଏହି ଅବସରରେ ତାଙ୍କୁ ଗାର୍ଡ ଅଫ୍ ଅନର ପ୍ରଦାନ କରାଯାଇଥିଲା । ଅନ୍ତରୀଣ ପୋଲିସ ଡିଜି ଦାୟିତ୍ୱ ନେବା ସହିତ ପୋଲିସ ଅଫିସରଙ୍କ ସହିତ ସେ ଆଲୋଚନା କରିଛନ୍ତି । ରାଜ୍ୟରେ ଆଇନଶୃଂଖଳା ରକ୍ଷା କରିବା ମୋର ପ୍ରାଥମିକତା ବୋଲି ସେ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପୋଲିସ ଡିଜିଙ୍କ ବଦଳି ନେଇ ରାଜ୍ୟ ସରକାରଙ୍କ ପକ୍ଷରୁ ନିର୍ଦ୍ଦେଶ ଆସିବା ପରେ ବୁଧବାର ରାତିରେ ସେ ନିଜ ବାସଭବନରେ ଔପଚାରିକ ଭାବେ ନୂଆ ଡିଜି ଦାୟିତ୍ୱ ନେଇଥିଲେ । ଏହାପରେ ଆଜି ସେ ଦାୟିତ୍ୱଗ୍ରହଣ କରିଛନ୍ତି । ବିଜୟ ଶର୍ମାଙ୍କ ପରେ ଆଇପିଏସ୍ ଅଭୟ ହେବେ ରାଜ୍ୟର ପୂର୍ଣ୍ଣକାଳୀନ ପୋଲିସ ଡିଜି । ସେ ଏବେ ଡେପୁଟେସନରେ ଅଛନ୍ତି । ଡେପୁଟେସନରୁ ଫେରିବା ପରେ ଆଇପିଏସ୍ ଅଭୟ , ରାଜ୍ୟ ପୋଲିସର ମହାନିର୍ଦ୍ଦେଶକ ଦାୟିତ୍ୱ ନେବେ । ତାଙ୍କର ଫେରିବା ଯାଏଁ ଏବେ ଅନ୍ତରୀଣ ଡିଜି ଭାବରେ ପୋଲିସ ଡିଜି ଦାୟିତ୍ୱ ତୁଲାଇବେ ସତ୍ୟଜିତ୍ ମହାନ୍ତି ।
ବିଜୟ କୁମାର ଶର୍ମାଙ୍କୁ ପୋଲିସ ଡିଜି ପଦରୁ ହଟାଇବା ପରେ ଗୃହ ବିଭାଗ ଓଏସ୍ଡି ଦାୟିତ୍ୱ ଦିଆଯାଇଛି । ସେହିପରି ସୁନିଲ ରାୟଙ୍କୁ ହୋମଗାର୍ଡ ଓ ଅଗ୍ନିଶମ ଡିଜି ଦାୟିତ୍ୱ ମିଳିଛି । ସତ୍ୟଜିତ୍ ମହାନ୍ତି ଅନ୍ତରୀଣ ଡିଜି ସହ ଗୁଇନ୍ଦା ବିଭାଗ ନିର୍ଦ୍ଦେଶକ ଦାୟିତ୍ୱ ସମ୍ଭାଳିବେ । ସତ୍ୟଜିତ୍ ମହାନ୍ତି ହେଉଛନ୍ତି ୧୯୮୮ ବ୍ୟାଚ୍ର ଆଇପିଏସ୍ ଅଧିକାରୀ ।