ବିଶ୍ୱର ସବୁଠାରୁ ବଡ ଅର୍ଥନୈତିକ ଫୋରମରେ ପ୍ରଧାନମନ୍ତ୍ରୀ ମୋଦିଙ୍କ ମନ୍ କି ବାତ୍ ! ବଡ ବଡ କମ୍ପାନୀର ମୁଖ୍ୟଙ୍କୁ ଭାରତରେ ପୁଂଜିନିବେଶ ପାଇଁ ଦେଲେ ଆହ୍ୱାନ
କନକ ବ୍ୟୁରୋ : ଭାରତରେ ନିବେଶ ପାଇଁ ବିଶ୍ୱର ବଡ଼ ବଡ଼ ଶିଳ୍ପପତି ଓ ସିଇଓମାନଙ୍କୁ ଆହ୍ୱାନ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଆଜି ବିଶ୍ୱର ସବୁଠୁ ବଡ଼ ଇକୋନମିକ୍ ଫୋରମରେ ଉଦବୋଧନ ଦେବା ଅବସରରେ ଶିଳ୍ପପତିମାନଙ୍କୁ ଆମନ୍ତ୍ରଣ କରିଛନ୍ତି ପ୍ରଧାନମନ୍ତ୍ରୀ । ସ୍ୱିଜରଲାଣ୍ଡର ଦାଭୋସଠାରେ ଅନୁଷ୍ଠିତ ୱାଲର୍ଡ ଇକୋନମିକ୍ ଫୋରମରେ ମୋଦି କହିଛନ୍ତି, ଏବେ ନାଲି ଫିତା ନୁହେଁ, ନାଲି କାର୍ପେଟରେ ଶିଳ୍ପପତିଙ୍କୁ ସ୍ୱାଗତ କରାଯିବ । ଭାରତର ଜିଡିପି ବା ମୋଟ ଘରୋଇ ଉତ୍ପାଦ ୨୦ ବର୍ଷ ମଧ୍ୟରେ ୬ ଗୁଣା ହୋଇଛି । ସ୍ଥିର, ସ୍ୱଚ୍ଛ ଓ ପ୍ରଗତିଶୀଳ ଭାରତରେ ପୁଂଜି ନିବେଶ କଲେ ଭଲ ବାତାବରଣ ମିଳିବା ସହ ଶିଳ୍ପପତିମାନେ ଅଧିକ ଲାଭବାନ ହେବେ ବୋଲି କହିଛନ୍ତି ନରେନ୍ଦ୍ର ମୋଦି ।
Kanak News is now on WhatsApp
Join and get latest news updates delivered to you via WhatsApp
ସ୍ୱାଧୀନ ଚେତା ରାଷ୍ଟ୍ରଗୁଡିକ ଏକାଠି ହେବାକୁ ପ୍ରଧାନମନ୍ତ୍ରୀ ଆହ୍ୱାନ ଦେବା ସହ ସେ କହିଛନ୍ତି ବିଶ୍ୱ ପାଇଁ ସବୁଠୁ ବଡ଼ ତିନିଟି ଚ୍ୟାଲେଂଜ ହେଉଛି-ଜଳବାୟୁ ପରିବର୍ତ୍ତନ, ଆତଙ୍କବାଦ ଓ ରକ୍ଷଣଶୀଳ ମନୋଭାବ । ସେ କହିଛନ୍ତି ଜଳବାୟୁ ପରିବର୍ତ୍ତନ ହେଉଛି ବିଶ୍ୱର ସବୁଠୁ ବଡ଼ ସଂକଟ । ମେରୁ ଅଞ୍ଚଳର ବରଫ ତରଳିବାରେ ଲାଗିଛି । ବିଶ୍ୱରେ କୌଣସି ସ୍ଥାନରେ ପ୍ରବଳ ଗରମ ଅନୁଭୂତ ହେଉଥିବାବେଳେ ଆଉ ଏକ ସ୍ଥାନରେ ପ୍ରବଳ ଥଣ୍ଡା ଅନୁଭବ ହେଉଛି । ଜଳବାୟୁ ପରିବର୍ତ୍ତନର ମୁକାବିଲା ଲାଗି ସମଗ୍ର ବିଶ୍ୱରେ ସାମୁହିକ ଉଦ୍ୟମ ଜରୁରୀ ହୋଇପଡ଼ିଛି । ଏହାର ସମାଧାନ ପାଇଁ ସାରା ବିଶ୍ୱ ଏକାଠି ହେବାକୁ ଆହ୍ୱାନ ଦେଇଛନ୍ତି ନରେନ୍ଦ୍ର ମୋଦି । ସେହିପରି ଆତଙ୍କବାଦ ସାରା ବିଶ୍ୱ ପାଇଁ ବିପଦ ସୃଷ୍ଟି କରିଛି ବୋଲି କହିଛନ୍ତି ମୋଦି । ମୋଦ ଆଉ କହିଛନ୍ତି, ମାନବ ସଭ୍ୟତାର ଭବିଷ୍ୟତ ପାଇଁ ତିନୋଟି ପ୍ରସଙ୍ଗ ଏକ ବିପଦ ଭାବେ ଦେଖାଦେଇଛି । ସେଗୁଡିକ ହେଉଛି ଜଳବାୟୁ ପରିବର୍ତ୍ତନ, ଆତଙ୍କବାଦ ଓ ସଂରକ୍ଷଣବାଦ । ବେଳଥାଉ ଥାଉ ବିଶ୍ୱ ସମୁଦାୟ ଏଗୁଡିକ ବିରୋଧରେ ଏକାଠି ହେବା ଆବଶ୍ୟକ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ।