ଚଳିତ ନିର୍ବାଚନରେ ବିଜେପି ଖାତାରେ ଅଧିକ ପୋଷ୍ଟାଲ୍‌ ଭୋଟ୍‌ : ପୁରୀ ଲୋକସଭା ପ୍ରାର୍ଥୀଙ୍କୁ ସର୍ବାଧିକ ୨୧୦୩ ଭୋଟ୍‌

388

କନକ ବ୍ୟୁରୋ : ଚଳିତ ନିର୍ବାଚନରେ କିଏ କେଉଁଠୁ କେତେ ଭୋଟ୍‌ ପାଇଛି, କେତେ ହରାଇଛି ତାକୁ ନେଇ ଚାଲିଛି କସରତ । ନିର୍ବାଚନ କାମରେ ବ୍ୟସ୍ତ ରହି ମତଦାନରେ ଭାଗ ନେଇ ପାରିନଥିବା ତଥା ଘରଠୁ ଦୂରରେ ଥିବା ସରକାରୀ କର୍ମଚ‌ାରୀମାନେ ପୋଷ୍ଟାଲ (ଡାକ) ମାଧ୍ୟମରେ ହିଁ ନିଜ ନିଜ ପସନ୍ଦର ପ୍ରାର୍ଥୀଙ୍କୁ ଭୋଟ୍‌ ଦେଇଥାନ୍ତି । ତେବେ ପୁରୀ ଜିଲ୍ଲାରେ ଏଥର ବିଜେପିକୁ ସର୍ବାଧିକ ପୋଷ୍ଟାଲ୍‌ ଭୋଟ୍‌ ମିଳିଛି । ତା’ ପଛକୁ ରହିଛି ବିଜେଡି ଓ କଂଗ୍ରେସ ।

ପୁରୀ ଲୋକସଭା କ୍ଷେତ୍ରରେ ମୋଟ ୨୮୧୦ ପୋ‌ଷ୍ଟାଲ୍‌ ଭୋଟ୍‌ ଆସିଥିଲା । ସେଥିରୁ ବିଜେପିର ଲୋକସଭା ପ୍ରାର୍ଥୀ ସମ୍ବିତ ପାତ୍ର ସର୍ବାଧିକ ୨୧୦୩ ଭୋଟ୍‌ ପାଇଥିବା ବେଳେ ବିଜେଡିର ବିଜୟୀ ପ୍ରାର୍ଥୀ ପିନାକୀ ମିଶ୍ର ୫୩୯ ଏବଂ କଂଗ୍ରେସର ସତ୍ୟପ୍ରକାଶ ନାୟକଙ୍କୁ ମିଳିଛି ମାତ୍ର ୧୩୫ ଭୋଟ୍‌ । ସେହିଭଳି ପୁରୀ ଜିଲ୍ଲାର ୬ଟି ବିଧାନସଭା କ୍ଷେତ୍ରରେ ମଧ୍ୟ ବିଜେପିକୁ ସର୍ବାଧିକ ପୋଷ୍ଟାଲ୍‌ ଭୋଟ୍‌ ମିଳିଛି । ଜିଲ୍ଲାର ୬ଟି ନିର୍ବାଚନ ମଣ୍ଡଳୀରେ ସମୁଦାୟ ୨୨୯୮ ପୋଷ୍ଟାଲ ଭୋଟ୍‌ ପଡ଼ିଥିଲା । ସେଥିରୁ ବିଜେପି ଖାତାକୁ ସର୍ବାଧିକ ୧୨୯୯ ଭୋଟ୍‌ ଯାଇଥିବ‌ା ବେଳେ ବିଜେଡିକୁ ୮୦୮ ଓ କଂଗ୍ରେସକୁ ୧୬୧ ଭୋଟ୍‌ ଯାଇଛି ।

ବ୍ରହ୍ମଗିରି ବିଧାନସଭା ଆସନରେ ସମୁଦାୟ ୭୧୦ ପୋଷ୍ଟାଲ ଭୋଟ୍‌ ମଧ୍ୟରୁ ବିଜେଡି ପ୍ରାର୍ଥୀଙ୍କୁ ୨୪୯ ଭୋଟ୍‌ ମିଳିଛି । ଏଠାରେ ବିଜେପି ପ୍ରାର୍ଥୀ ପାଇଛନ୍ତି ସର୍ବାଧିକ ୪୪୦ ଭୋଟ୍‌ । କଂଗ୍ରେସ ପ୍ରାର୍ଥୀଙ୍କୁ ମିଳିଛି ମାତ୍ର ୧୩ ଖଣ୍ଡ ଭୋଟ୍‌ । ସେହିଭଳି ପୁରୀ ବିଧାନସଭା କ୍ଷେତ୍ରରେ ମୋଟ୍‌ ୪୪୫ ଭୋଟ୍‌ରୁ ବିଜେପିକୁ ୨୬୯, ବିଜେଡିକୁ ୧୬୩ ଓ କଂଗ୍ରେସକୁ ୫ ଖଣ୍ଡ ଭୋଟ୍‌ ମିଳିଛି । ପିପିଲିରେ ୨୬୧ ଭୋଟ୍‌ରୁ ବିଜେପି ୧୫୨ ଭୋଟ୍‌ ପାଇଥିବା ବେଳେ ବିଜେଡିକୁ ୮୪ ଓ କଂଗ୍ରେସକୁ ୨୧ ଖଣ୍ଡ ଭୋଟ୍‌ ମିଳିଛି ।
ସତ୍ୟବାଦୀରେ ବ‌ିଜେପି ୧୮୪, ବିଜେଡି ୭୨ ଓ କଂଗ୍ରେସ ୩୨ ଖଣ୍ଡ ଭୋଟ ପାଇଥିବା ବେଳେ ନିମାପଡାରେ ବିଜେପି ୧୫୧, ବିଜେଡି ୧୦୬ ଓ କଂଗ୍ରେସକୁ ୪୦ ଖଣ୍ଡ ଭୋଟ୍‌ ମିଳିଛି । କେବଳ କାକଟପୁର ନିର୍ବାଚନମଣ୍ଡଳୀରେ ବିଜେଡିକୁ ଅଧିକ ପୋଷ୍ଟାଲ ଭୋଟ୍‌ ମିଳିଛି । ଏଠାରେ ୨୯୧ ଭୋଟ୍‌ ମଧ୍ୟରୁ ବିଜେଡି ୧୩୪, ବିଜେପି ୧୦୩ ଓ କଂଗ୍ରେସ ୫୦ ଖଣ୍ଡ ଭୋଟ ପାଇଛି । ପୋଷ୍ଟାଲ ଭୋଟ୍‌କୁ ପରଖିଲେ ସରକାରୀ କର୍ମଚାରୀମାନେ ବିଜେପିକୁ ଅଧିକ ଭରସା କରିଥିବା ଏହି ପରିସଂଖ୍ୟାନରୁ ସ୍ପଷ୍ଟ ।

Comments are closed.