ସୁନ୍ଦରୀର ମଣିଷ ଶିକାର ନେଇ ଆସିଲା ତଥ୍ୟ : ହାତିବାରୀରେ ମୃତ ମହିଳାଙ୍କ ପୋଷ୍ଟମର୍ଟମ ରିପୋର୍ଟରୁ ସ୍ପଷ୍ଟ, ମୃତଦେହରେ ରହିଛି ଜଙ୍ଗଲୀ ବନ୍ୟଜନ୍ତୁ ଆକ୍ରମଣର ଚିହ୍ନ
କନକ ବ୍ୟୁରୋ : ସାତକୋଶିଆରେ ମହିଳାଙ୍କୁ ଶିକାର ନେଇ, ସୁନ୍ଦରୀ ଉପରେ ଯେଉଁ ସନ୍ଦେହ ଥିଲା ତାହା ସ୍ପଷ୍ଟ ହେବାରେ ଲାଗିଛି । ହାତୀବାରିରେ ମୃତ ମହିଳାଙ୍କ ପୋଷ୍ଟମର୍ଟମ ରିପୋର୍ଟ ଏହି ଦିଗକୁ ଇସାରା କରିଛି । ରିପୋର୍ଟରେ କୁହାଯାଇଛି- କାର୍ଣ୍ଣିଭୋରସ ଆନିମାଲ ବା ମାଂସାଶୀ ବନ୍ୟପ୍ରାଣୀ ଆକ୍ରମଣ ଫଳରେ ମହିଳାଙ୍କ ଦେହରେ ଗଭୀର କ୍ଷତ ହୋଇଛି । ତଂଟିକୁ ଚାପି ଧରିବା ଫଳରେ ଶ୍ୱାସ ରୁଦ୍ଧ ହୋଇ ମୃତ୍ୟୁ ହୋଇଛି । ତେଣୁ ଗାଁ ଲୋକଙ୍କ ଅଭିଯୋଗକୁ ବାଏଁ ବାଏଁ ଉଡାଇ ଦେଇଥିବା ବନ ବିଭାଗ, ଏବେ କି ପଦକ୍ଷେପ ନେଉଛି ତା ଉପରେ ନଜର ରହିଛି ।
Kanak News is now on WhatsApp
Join and get latest news updates delivered to you via WhatsApp
ଅନୁଗୁଳ ଜିଲ୍ଲା ହାତୀବାରିରେ ଗତ ୧୩ ତାରିଖରେ ମୃତ ମହିଳା କୈଳାସ ସାଏଙ୍କ ଶବ ବ୍ୟବଚ୍ଛେଦ ରିପୋର୍ଟ କନକ ନ୍ୟୁଜର ହସ୍ତଗତ ହୋଇଛି । ପୋଷ୍ଟମର୍ଟମ ରିପୋର୍ଟରେ ଲେଖାଯାଇଛି- ତଂଟିକୁ ଖୁବ ଜୋରରେ ଚାପି ଧରିବା ଫଳରେ ଶ୍ୱାସରୁଦ୍ଧ ହୋଇ ମହିଳାଙ୍କ ମୃତ୍ୟୁ ହୋଇଛି । ମହିଳାଙ୍କ ଦେହରେ ୮ଟି କ୍ଷତଚିହ୍ନ ଅଛି । ପ୍ରଥମ କ୍ଷତଟି କାର୍ଣ୍ଣିଭୋରସ ଆନିମଲ ବା ମାଂସାଶୀ ବନ୍ୟପ୍ରାଣୀ ଆକ୍ରମଣ ଫଳରେ ହୋଇଛି । ସେହିପରି ୨ରୁ ୭ ନମ୍ବର ପର୍ଯ୍ୟନ୍ତ କ୍ଷତ କୌଣସି ଶକ୍ତ ମୁନିଆ ଜିନିଷରେ ଆକ୍ରମଣ ଫଳରେ ହୋଇଛି । ସେହିପରି ୮ ନମ୍ବର କ୍ଷତଟି ମଧ୍ୟ ଏକାଧିକ ଶକ୍ତ ଦନ୍ଥରା ଜିନିଷରେ ଆକ୍ରମଣ ଯୋଗୁଁ ହୋଇଛି ।
ପୋଷ୍ଟମର୍ଟମ ରିପୋର୍ଟ ସିଧାସିଧା ଇସାରା କରୁଛି ମହିଳାଙ୍କ ବେକକୁ ମୁନିଆ ଦାନ୍ତରେ ଜାବୁଡି ଧରିଥିଲା ବାଘୁଣୀ ସୁନ୍ଦରୀ ଏବଂ ଶରୀରରେ ତାର ମୁନିଆ ନଖରେ ଏକାଧିକ କ୍ଷତ କରିଥିଲା । ୨୪ରୁ ୩୬ ଘଂଟା ମଧ୍ୟରେ ହାତୀବାରି ଗାଁର ମହିଳା କୈଳାସ ସାଏଙ୍କ ମୃତ୍ୟୁ ହୋଇଥିଲା । ବଂଶ ବୃଦ୍ଧି ପାଇଁ ମଧ୍ୟପ୍ରଦେଶରୁ ସାତକୋଶିଆ ଅଣାଯାଇଥିବା ବାଘୁଣୀ ହିଁ ମହିଳାଙ୍କୁ ମାରିଥିବା ଧିରେଧିରେ ସ୍ପଷ୍ଟ ହେବାରେ ଲାଗିଛି ।
ଗାଁ ଲୋକଙ୍କ ଅଭିଯୋଗକୁ ବାଏଁବାଏଁ ଉଡାଇ ଦେଇଥିଲେ ବନ କର୍ମଚାରୀ ଓ ବିଭାଗୀୟ ମନ୍ତ୍ରୀ । ହେଲେ ମୃତ ମହିଳାଙ୍କ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ସ୍ପଷ୍ଟ ହେବାରେ ଲାଗିଛି ଯେ, ଜଙ୍ଗଲି ଯନ୍ତୁ ଜନବସତିରେ ପଶିଛି ଓ ହିଂସ୍ର ଆଚରଣ କରୁଛି । ଏବେ ଜିଲ୍ଲା ପ୍ରଶାସନ ଓ ରାଜ୍ୟ ସରକାର କି ପଦକ୍ଷେପ ନେଉଛନ୍ତି ତାହା ହିଁ ସବୁଠାରୁ ବଡ ପ୍ରଶ୍ନବାଚୀ ହୋଇଛି ।
ସେପଟେ ଡେରାଡୁନ୍ ଓ ଜବଲପୁରରୁ ଆସିଥିବା ଦୁଇଟି ଟିମ୍ ଏପର୍ଯ୍ୟନ୍ତ ବାଘୁଣୀଟିକୁ ଠାବ କରିବାରେ ବିଫଳ ହୋଇଛନ୍ତି । ଅନୁମାନ କରାଯାଉଛି ସୁନ୍ଦରୀକୁ ଟ୍ରାକ୍ କରିବା ଲାଗି ବେକରେ ଲାଗୁଥିବା ରେଡିଓ କଲାରରୁ ସିଗନାଲ ମିଳିବା ସମ୍ଭବ ହେଉନାହିଁ । ଜିପିଏସ ଟ୍ରାକିଂ ଫେଲ ମାରିଥିବାରୁ ସୁନ୍ଦରୀ ଏବେ ବନ ବିଭାଗ ଆଢୁଆଳକୁ ଚାଲିଯାଇଛି । ଆଉ ପୁରୁଣା କୋର୍ଟ ରେଞ୍ଜ ଅଂଚଳରୁ ପ୍ରାୟ ଶହେ କିଲୋମିଟର ଦୂରକୁ ଚାଲିଯାଇଥିବା ସନ୍ଦେହ ପ୍ରକାଶ ପାଉଛି । ତେଣୁ ଏବେ ତାକୁ ଠାବ କରିବା ଓ ଟ୍ରାଙ୍କୁଲାଇଜ କରିବା ବଡ ଚ୍ୟାଲେଞ୍ଜ ହୋଇଛି । ସେପଟେ ପୋଷ୍ଟମର୍ଟମ ରିପୋର୍ଟ ଆଧାରରେ ଭାରତୀୟ ବନ୍ୟପ୍ରାଣୀ ବିଭାଗ ସୁନ୍ଦରୀକୁ ନେଇ କି ପଦକ୍ଷେପ ନେଉଛି ଦେଖିବାର କଥା ।