ଲାଲୁଙ୍କୁ କୋର୍ଟରୁ ବଡ଼ ଝଟକା; ଲ୍ୟାଣ୍ଡ୍ ଫର୍ ଜବ୍ ମାମଲାରେ ଅଭିଯୋଗ ଫର୍ଦ୍ଦ ଦାଖଲ

କନକ ବ୍ୟୁରୋ: ଲାଲୁଙ୍କୁ ବଡ଼ ଝଟକା । ପୂର୍ବତନ ରେଳମନ୍ତ୍ରୀ ଲାଲୁ ପ୍ରସାଦ ଯାଦବଙ୍କୁ କୋର୍ଟରୁ ବଡ଼ ଝଟକା ଲାଗିଛି। ଦିଲ୍ଲୀର ଏକ ଅଦାଲତ ଶୁକ୍ରବାର 'ଲ୍ୟାଣ୍ଡ ଫର ଜବ ସ୍କାମ' ମାମଲାରେ ଲାଲୁ ପ୍ରସାଦ ଯାଦବ, ତାଙ୍କ ପରିବାର ଏବଂ ଅନ୍ୟମାନଙ୍କ ବିରୋଧରେ ଅଭିଯୋଗ ଫର୍ଦ୍ଦ ଦାଖଲ କରିଛନ୍ତି। କୋର୍ଟ ନିଜ ନିର୍ଦ୍ଦେଶରେ ସ୍ପଷ୍ଟ କରିଛନ୍ତି ଯେ, ଲାଲୁ ଯାଦବ ଏବଂ ତାଙ୍କ ପରିବାର ବିରୋଧରେ ଲଗାଯାଇଥିବା ଅଭିଯୋଗରେ ଦୃଢ ପ୍ରମାଣ ମିଳିଛି ।

କୋର୍ଟ କହିଛନ୍ତି ଯେ ଚାର୍ଜସିଟ୍ ଅନୁଯାୟୀ, ଲାଲୁ ଯାଦବଙ୍କ ନିକଟତର ସହଯୋଗୀମାନେ ଚାକିରି ବଦଳରେ ଜମି ଅଧିଗ୍ରହଣ କରିବାରେ ସହ-ଷଡ଼ଯନ୍ତ୍ରକାରୀ ଭାବେ ଭୂମିକା ଗ୍ରହଣ କରିଥିଲେ। ଲାଲୁ ପରିବାରର ଡିସଚାର୍ଜ ଆବେଦନକୁ କୋର୍ଟ ଖାରଜ କରି କହିଛନ୍ତି ଯେ, ଏଥିରେ ପଦବୀର ଦୁରୁପଯୋଗ ଏବଂ ଗଭୀର ଷଡ଼ଯନ୍ତ୍ର ଦେଖିବାକୁ ମିଳୁଛି। ଏହି ମାମଲାରେ ମୋଟ ୪୧ ଜଣ ଅଭିଯୁକ୍ତଙ୍କ ବିରୋଧରେ ଦୁର୍ନୀତି ନିବାରଣ ଆଇନ ଅନୁଯାୟୀ ଅଭିଯୋଗ ଧାର୍ଯ୍ୟ କରାଯିବ, ଅନ୍ୟପଟେ ୫୨ ଜଣ ଅନ୍ୟ ଅଭିଯୁକ୍ତଙ୍କୁ କୋର୍ଟ ଖଲାସ ବା ଡିସଚାର୍ଜ କରିବାକୁ ନିର୍ଦ୍ଦେଶ ଦେଇଛନ୍ତି।

ଆହୁରି ପଢ଼ନ୍ତୁ : ଶିମିଳିପାଳରେ ମାଇନସ୍‌କୁ ଖସିଲା ପାରଦ: ଭାଙ୍ଗିଲା ୭୨ ବର୍ଷର ରେକର୍ଡ

ଶୁଣାଣି ସମୟରେ ଅଦାଲତ ଅତ୍ୟନ୍ତ କଠୋର ଆଭିମୁଖ୍ୟ ଗ୍ରହଣ କରି କହିଛନ୍ତି ଯେ, ଲାଲୁ ଯାଦବ ଏବଂ ତାଙ୍କ ପରିବାର ବିରୋଧରେ ଏକ ବ୍ୟାପକ ଷଡ଼ଯନ୍ତ୍ରର ସଙ୍କେତ ମିଳୁଛି। କୋର୍ଟ ସ୍ୱୀକାର କରିଛନ୍ତି ଯେ ସ୍ୱେଚ୍ଛାକୃତ କ୍ଷମତାର ଦୁରୁପଯୋଗ କରି ସରକାରୀ ଚାକିରି ଦିଆଯାଇଛି ଏବଂ ବଦଳରେ ଜମି ନିଆଯାଇଛି। ଅଦାଲତ କହିଛନ୍ତି ଯେ, ଏହି ମାମଲାରେ ପରିବାରକୁ ଖଲାସ କରାଯିବା ଉଚିତ ବୋଲି ଭାବିବା ଭୁଲ ହେବ, କାରଣ ପ୍ରମାଣଗୁଡ଼ିକ ଏକ ସୁଚିନ୍ତିତ ଦୁର୍ନୀତି ଆଡକୁ ଇଙ୍ଗିତ କରୁଛି।