କନକ ବ୍ୟୁରୋ : ଆଗକୁ ଆସୁଛି ଲୋକସଭା ନିର୍ବାଚନ । ଏଥିପାଇଁ ଏବେ ଠାରୁ ପ୍ରସ୍ତୁତି ଆରମ୍ଭ ହୋଇଗଲାଣି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏବେ ସମ୍ପୂର୍ଣ୍ଣ ଭାବେ ନିର୍ବାଚନୀ ମୁଡ଼ରେ ଅଛନ୍ତି । ଆଜି ଓଡ଼ିଶା ଗସ୍ତରେ ଅଛନ୍ତି ମୋଦି । ନରେନ୍ଦ୍ର ମୋଦି ଏହି ଦିନିକିଆ ଗସ୍ତ କାଳରେ ରାଜ୍ୟରେ ୫ଟି ପ୍ରକଳ୍ପର ଉଦ୍ଘାଟନ ଓ ଗୋଟିଏ ପ୍ରକଳ୍ପର ଶିଳାନ୍ୟାସ କରିବେ । ରାଜ୍ୟର ଦ୍ୱିତୀୟ ବିମାନବନ୍ଦର ଭାବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଝାରସୁଗୁଡ଼ା ବିମାନ ବନ୍ଦରକୁ ଦେଶ ଉଦ୍ଦେଶ୍ୟରେ ଉତ୍ସର୍ଗ କରିବେ । ବହୁ ପ୍ରତୀକ୍ଷିତ ତାଳଚେର ସାର କାରଖାନାର ପୁନରୁଦ୍ଧାର କାର୍ୟ୍ୟ ମଧ୍ୟ ଏହି ଅବସରରେ ପ୍ରଧାନମନ୍ତ୍ରୀ ମୋଦି ଶିଳାନ୍ୟାସ କରିବେ।
Kanak News is now on WhatsApp
Join and get latest news updates delivered to you via WhatsApp
ମୋଦିଙ୍କ ଗସ୍ତକୁ ନେଇ ବିଜେପି ଉତ୍ସାହିତ ଥିବା ବେଳେ ଓଡ଼ିଶାରେ କ’ଣ କହିବେ ମୋଦି ? ବିଜେଡି ଓ ନବୀନଙ୍କ ପ୍ରତି କ’ଣ ରହିବ ମୋଦିଙ୍କ ଆଭିମୁଖ୍ୟ ? ଏହାକୁ ଆରମ୍ଭ ହୋଇଛି ରାଜନୈତିକ ଚର୍ଚ୍ଚା । ଅନାସ୍ଥା ପ୍ରସ୍ତାବ ସମୟରେ ବିଜେଡିର ଆଭିମୁଖ୍ୟ ଓ ରାଜ୍ୟସଭା ଉପାଧ୍ୟକ୍ଷ ପ୍ରସଙ୍ଗରେ ଏନଡିଏ ପ୍ରାର୍ଥୀଙ୍କୁ ନବୀନଙ୍କ ସମର୍ଥନ ପରେ ଓଡିଶାକୁ ମୋଦିଙ୍କର ଏହା ପ୍ରଥମ ଗସ୍ତ । ତେଣୁ ଏହି ଗସ୍ତ ବିଜେଡି ଓ କଂଗ୍ରେସ ପ୍ରତି କଣ ରହିବ ମୋଦିଙ୍କ ଆଭିମୁଖ୍ୟ, ଏହା ଉପରେ ସମସ୍ତଙ୍କ ନଜର। ବିରୋଧୀ ଦଳର ଆରୋପ ପ୍ରତ୍ୟାରୋପ ଭିତରେ କିନ୍ତୁ ବିଜେପିର ଦୃଢ଼ ଆଶା ମୋଦିଙ୍କ ଏହି ଗସ୍ତ ଓଡ଼ିଶା ଲୋକଙ୍କୁ ପ୍ରଭାବିତ କରିବ ।
ଆଜି ଓଡ଼ିଶା ଗସ୍ତରେ ଆସିବା ସହ ଛତିଶଗଡ଼ ଯିବାର ମଧ୍ୟ କାର୍ଯ୍ୟକ୍ରମ ରହିଛି । ଏହି ଗସ୍ତ ମୋଦିଙ୍କ ପାଇଁ ନିର୍ବାଚନ ପୂର୍ବରୁ ବେଶ୍ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି । ଓଡିଶାରେ ଏବେ ବିଜେଡ଼ି ସରକାର ଶାସନରେ ଅଛନ୍ତି । ଆଗାମୀ ନିର୍ବାଚନରେ ବିଜେଡ଼ି ସରକାରକୁ ହଟାଇ ଗାଦି ଅକ୍ତିଆର କରିବା ପାଇଁ ଚେଷ୍ଟା କରୁଛି ବିଜେପି । ପ୍ରଧାନମନ୍ତ୍ରୀ ଓଡ଼ିଶା ଗସ୍ତରେ ଅନେକ ସରକାରୀ କାର୍ଯ୍ୟକ୍ରମରେ ଯୋଗଦେବା ସହ ଜନସଭାରେ ସାଧାରଣ ଜନତାଙ୍କୁ ଉଦବୋଧନ ମଧ୍ୟ ଦେବେ । ପ୍ରଥମେ ଓଡ଼ିଶାର ତାଳଚରେ ଓ ପରେ ଝାରସୁଗୁଡ଼ାରେ ଉଦବୋଧନ ଦେବେ ମୋଦି । ତେବେ ଗସ୍ତ ସମୟରେ ମୋଦି କ’ଣ କହିବେ ତା’ଉପର ସମସ୍ତଙ୍କର ନଜର ରହିଛି ।
ଏସବୁ ପରେ ଆଜି ଛତିଶଗଡ଼ ଗସ୍ତରେ ମଧ୍ୟ ଯିବେ ମୋଦି । ଓଡ଼ିଶାରୁ ବାହାରି ସିଦା ଛତିଶଗଡ଼ ଅଭିମୁଖେ ଯାତ୍ରା କରିବେ ମୋଦି । ସେଠାରେ ମୋଦି ଏକ କୃଷକ ମହାସଭାରେ ଉଦବୋଧନ ଦେବେ । ଆଉ ଏହି ଅବସରରେ ଅନେକ ବିକାଶ ମୂଳକ ଯୋଜନାକୁ ଶିଳାନ୍ୟାସ ମଧ୍ୟ କରିବେ । ତେବେ ଏସବୁ ଭିତରେ କାଯ୍ୟକର୍ତ୍ତାଙ୍କ ସହ ମିଶି ଆଲୋଚନା କରିବା ପାଇଁ ଯୋଜନା କରିଛନ୍ତି ମୋଦି । ଛତିଶଗଡ଼ର ଜାଞ୍ଜଗୀର ଚମ୍ପା, ରାୟଗଡ଼, ସରଗୁଆ, ରାୟପୁର, ବିଲାସପୁର ଓ ମହାସମୁଦରେ ବିଭିନ୍ନ କାର୍ଯ୍ୟକ୍ରମରେ ରହିଛି । କାର୍ଯ୍ୟକ୍ରମରେ ଯୋଗ ଦେବା ପରେ ମୋଦି ସନ୍ଧ୍ୟା ୪,୪୫ରେ ରାୟପୁର ଯାଇ ଭାରତୀୟ ବାୟୁସେନା ବିମାନ ଦିଲ୍ଲୀ ପାଇଁ ବାହାରି ଯିବେ ।
ତେବେ ଆସନ୍ତାକାଲି ଛାଡ଼ଖଣ୍ଡ ଯିବେ ମୋଦି । ଆସନ୍ତାକାଲି ସକାଳେ ୧୧.୦୩ରେ ରାଂଚିର ପ୍ରଭାତତାରା ରେ ପହଞ୍ଚିବେ, ଯେଉଁଠି ସେ ଆୟୁଷ୍ମାନ ଭାରତ ଯୋଜନାର ଶୁଭାରମ୍ଭ କରିବେ । ଆୟୁଷ୍ମାନ ଭାରତ ସରକାରଙ୍କ ସବୁଠାରୁ ମହତ୍ୱାକାଂକ୍ଷୀ ଯୋଜନା ଏହି ଅଭିଯାନ ଆରମ୍ଭ କରିବା ପାଇଁ ମୋଦି ଝାଡ଼ଖଣ୍ଡକୁ ଚୟନ କରିଛନ୍ତି । ଝାଡ଼ଖଣ୍ଡରେ ଆୟୁଷ୍ମାନ ଭାରତ ଯୋଜନାର ଶୁଭାରମ୍ଭ ବ୍ୟତୀତ କୋଡ଼ରମା ଓ ଚାଇମାସାରେ ତିଆରି ହେବାକୁ ଥିବା ମେଡ଼ିକାଲ କଲେଜର ଉଦଘାଟନ ମଧ୍ୟ କରିବେ ମୋଦି ।