ପାକିସ୍ତାନକୁ ଭାରତର କଡ଼ା ଜବାବ ! ଶକ୍ତିଶାଳୀ ତୋପ ଲଗାଇ ବିଏସଏଫ୍ ଉଡାଇଦେଲା ପାକିସ୍ତାନୀ ବଙ୍କର, ଆକ୍ରମଣକୁ ସାମନା କରିନପାରି ଫାୟାରିଂ ବନ୍ଦ କରିବାକୁ ଗୁହାରି କଲା ପାକିସ୍ତାନ
କନକ ବ୍ୟୁରୋ : ଜଣେ ଯବାନ ଓ ୫ ଜଣ ଭାରତୀୟଙ୍କ ହତ୍ୟାର ପ୍ରତିଶୋଧ ନେଲା ବିଏସ୍ଏଫ । ପାକିସ୍ତାନକୁ ତାରି ଭାଷାରେ ଜବାବ୍ ଦେଇଛି ଭାରତ । ଶକ୍ତିଶାଳୀ ତୋପ ସହ ପାକିସ୍ତାନ ବଙ୍କର ଉପରେ ଘନ ଘନ ଆକ୍ରମଣ କରିଛି ଭାରତର ସୀମା ସୁରକ୍ଷା ବଳ । ଯେଉଁଥିରେ ପାକିସ୍ତାନର ୫ଟି ବଙ୍କର ଧ୍ୱଂସ ହୋଇଯାଇଛି । ବିଏସଏଫର ଆକ୍ରମଣ ଏତେ ଭୟଙ୍କର ଥିଲା ଯେ, ପାକିସ୍ତାନୀ ରେଂଜର, ଆକ୍ରମଣ ବନ୍ଦ କରିବାକୁ ଅନୁରୋଧ କରିଥିଲା । ଆକ୍ରମଣ ସମୟର ୧୯ ମିନିଟର ଦୃଶ୍ୟକୁ ଥର୍ମାଲ ଇମେଜ୍ ଜରିଆରେ ରେକର୍ଡ କରାଯାଇଥିଲା । ଯାହାକୁ ଆଜି ଜାରି କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସୀମା ସୁରକ୍ଷା ବଳ ଜାରି କରିଥିବା ୧୯ ସେକେଣ୍ଡର ଭିଡ଼ିଓ, ଯେଉଁଠି ପାକିସ୍ତାନୀ ସେନାର ଅସ୍ତ୍ରବିରତି ଉଲ୍ଲଂଘନର ଜବାବ୍ ଦେଉଛି ବର୍ଡର ସିକ୍ୟୁରିଟି ଫୋର୍ସ । ଥର୍ମାଲ ଇମେଜ୍ ଜରିଆରେ ରେକର୍ଡ ହୋଇଥିବା ଭିଡ଼ିଓ, ପାକିସ୍ତାନୀ ସୀମାରେ ବଙ୍କର ଧ୍ୱଂସ ହେଉଥିବାର ଲାଇଭ୍ ଦୃଶ୍ୟକୁ ସାମ୍ନାକୁ ଆଣିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ କାଶ୍ମୀର ଗସ୍ତକୁ ବିରୋଧ କରି ପାକିସ୍ତାନୀ ସେନାର ଫାୟାରିଂରେ ଗତ କିଛି ଦିନ ଭିତରେ ୨ଜଣ ଯବାନଙ୍କ ସମେତ ୫ଜଣ ସାଧାରକ ନାଗରିକ ପ୍ରାଣ ହରାଇଛନ୍ତି । ଆଉ ଏହାର ଭୟଙ୍କର ଜବାବ ଦେଇଛି ପଶ୍ଚିମ କାଶ୍ମୀରରେ ମୁତୟନ ହୋଇଥିବା ବିଏସଏଫର ସ୍ୱତନ୍ତ୍ର ୟୁନିଟ୍ ।
ପାକିସ୍ତାନୀଙ୍କୁ ଜବାବ୍ ଦେବା ପାଇଁ ଭାରତୀୟ ସୀମାରୁ ଭାରି ତୋପ ବ୍ୟବହାର କରିଥିଲା ସୀମା ସୁରକ୍ଷା ବଳ । ଏବଂ ଟାର୍ଗେଟରେ ଥିଲା ସୀମା ନିକଟରେ ମାଟି ତଳେ ରହିଥିବା ପାକିସ୍ତାନୀ ବଙ୍କର । ବଙ୍କର ଉପରେ ଘନ ଘନ ଆକ୍ରମଣ ଚାଲିଥିବା ବେଳେ ଥର୍ମାଲ ଇମେଜରୀ ମାଧ୍ୟମରେ ରେକର୍ଡ କରା ଯାଉଥିଲା । ୧୯ ତାରିଖରେ ଏହାକୁ ରେକର୍ଡ କରାଯାଇ ୨୦ ତାରିଖରେ ଭିଡ଼ିଓକୁ ଜାରିକରାଯାଇଛି । ମାଟି ତଳେ ତିଆରି କରାଯାଇଥିବା ବଙ୍କରରେ ରହି ଭାରତୀୟ ସୀମା ଆଡ଼କୁ ଫାୟରିଂ କରୁଥିବା ପାକିସ୍ତାନୀ ଯବାନଙ୍କୁ ଟାର୍ଗେଟ୍ କରିବା ପାଇଁ ବିଏସଏଫ୍ ଭାରି ତୋପର ବ୍ୟବହାର କରିଥିଲା । କାରଣ ସୀମା ନିକଟରେ ଥିବା ପାକିସ୍ତାନୀ ବଙ୍କରଗୁଡ଼ିକ ବେଶ ଶକ୍ତିଶାଳୀ ଥିଲା । ତେବେ ଏହାକୁ ଫଟାଇ ଧ୍ୱଂସ କରିବାରେ ସଫଳ ହୋଇଛି ବିଏସଏଫ୍ ।
ପବିତ୍ର ରମଜାନ୍ ଅବସରରେ ପୂର୍ବରୁ କେନ୍ଦ୍ର ସରକାର ଏକପାଖିଆ ଅସ୍ତ୍ରବିରତି ଘୋଷଣା କରିଥିଲେ । ତେବେ ଏହାର ଫାଇଦା ଉଠାଇ ସୀମା ନିକଟବର୍ତୀ ଆରଏସ୍ ପୁରା ଓ ଆରନିୟାଁ ସେକ୍ଟରରେ ଗ୍ରାମ ବାସୀଙ୍କ ଉପରେ ମୋର୍ଟାର୍ ମାଡ଼ କରିଥିଲା ପାକିସ୍ତାନ । ତେବେ ଏହାର ଜବାବ ଏତେ ଭୟଙ୍କର ଥିଲା ଯେ କାର୍ଯ୍ୟାନୁଷ୍ଠାନ ରୋକିବାକୁ ବିଏସଏଫ୍ ଆଗରେ ପାକିସ୍ତାନ ସେନା ଗୁହାରି କରିଥିବା ବିଏସଏଫର ଜନୈକ ମୁଖପାତ୍ର କହିଛନ୍ତି ।