କଲବଲ କରୁଛି ଅଭାବି ବିକ୍ରି, ପିଆଜ ଚାଷୀଙ୍କ ଆଖିରେ ଲୁହ : କଳାହାଣ୍ଡି ଜିଲ୍ଲାରେ ମାତ୍ର ୫ଟଙ୍କାରେ ବିକ୍ରି ହେଉଛି କିଲେ ପିଆଜ
କନକ ବ୍ୟୁରୋ : ଘରେ ରଖିବାକୁ ଜାଗା ନାହିଁ, ସଂରକ୍ଷଣର ସୁବିଧା କିମ୍ବା ବଜାର ବ୍ୟବସ୍ଥା ନାହିଁ । ଆଉ ଏହି ନାହିଁ-ନାହିଁ ଭିତରେ ଅଭାବି ବିକ୍ରିର ସମ୍ମୁଖିନ ହେଉଛନ୍ତି କଳାହାଣ୍ଡି ଜିଲ୍ଲାର ପିଆଜ ଚାଷୀ । ମାତ୍ର ୫ ଟଙ୍କା ଦରରେ ବିକ୍ରି କରିଦେଉଛନ୍ତି ପିଆଜ । ଆଉ ଚାଷୀଙ୍କ ଏହି ଅସୁବିଧାରୁ ଫାଇଦା ନେଉଛନ୍ତି ପଡ଼ୋଶୀ ଛତିଶଗଡ଼ର ମୁନାଫାଖୋର ବେପାରୀ ।
Kanak News is now on WhatsApp
Join and get latest news updates delivered to you via WhatsApp
ବଜାରରୁ ପିଆଜ ଉଭାନ୍ ହୋଇଗଲେ ଏବଂ ଦର ଆକାଶ ଛୁଆଁ ହେଲେ ଏହି ପିଆଜ ପାଇଁ ରାସ୍ତାରେ ନିଆଁ ଜଳେ । ହେଲେ ପିଆଜ ବିକ୍ରି ନହେବାରୁ ବିଲ ଭିତରେ ହିଁ ପଡ଼ି ପଡ଼ି ନଷ୍ଟ ହେବାକୁ ବସୁଛି ପିଆଜ । ଅଭାବି ବିକ୍ରି ଏବଂ ସଂରକ୍ଷଣ ବ୍ୟବସ୍ଥାର ଅଭାବ ଯୋଗୁଁ ଏବେ ଚିନ୍ତାରେ ପିଆଜ ଚାଷୀ ।
ଅଭିଯୋଗ ଅନୁସାରେ ଜିଲ୍ଲାରେ ଅଭାବି ବିକ୍ରି ଯୋଗୁଁ ଚାଷୀମାନେ ପଡ଼ୋଶୀ ଛତିଶଗଡ଼ର ବେପାରୀଙ୍କ ହାତରେ, ଶାଗ-ମାଛ ଦରରେ ଟେକି ଦେଛନ୍ତି ପିଆଜ । ପିଆଜ କିଲୋ ପ୍ରତି ୪ରୁ ୫ ଟଙ୍କାରେ ବିକ୍ରି ହେଉଥିବା ବେଳେ ବସ୍ତା, ମାତ୍ର ୩ଶହରୁ ୪ଶହ ଟଙ୍କାରେ ବିକି ଦେଉଥିବା ଚାଷୀ ଅଭିଯୋଗ କରିଛନ୍ତି । ଅନ୍ୟପଟେ କୃଷି ନିର୍ଦ୍ଦେଶକ କହୁଛନ୍ତି- ଚାଷୀଙ୍କ ପିଆଜ ରଖିବା ପାଇଁ ବ୍ୟବସ୍ଥା କରାଯାଉଛି ।
ଗୋଲାମୁଣ୍ଡା ବ୍ଲକ୍ ସମେତ ଧର୍ମଗଡ଼ ଏବଂ କୋକସରା ବ୍ଲକରେ ଏଥର ବିପୁଳ ପରିମାଣରେ ପିଆଜ ଚାଷ ହୋଇଛି । ହେଲେ ସେବୁଠି ସେଇ ଏକା ସମସ୍ୟା । ଯେଉଁଥି ପାଇଁ ଦଲାଲ୍ ମାଲେମାଲ୍ ହେଉଥିବା ବେଳେ ଚାଷୀଙ୍କ ହାତ ଖାଲି ।