ପିଆଜ ଚାଷ ଗାଁରେ ପିଆଜ ଦର ଆକାଶଛୁଆଁ : ଚାଷୀ ବିକିଥିଲା ୨ଟଙ୍କାରେ ଏବେ କିଣୁଛି ୮୦ଟଙ୍କାରେ, ଧର୍ମଗଡରେ ପିଆଜ କିଲୋକୁ ୮୦ ଟଙ୍କା
କନକ ବ୍ୟୁରୋ : ଯେଉଁଠି ଦିନେ ପିଆଜ ଅଭାବୀ ବିକ୍ରି ହେଉଥିଲା ସେଠି ଏବେ ପିଆଜ ଅମୂଲେମୂଲ । ଦିନେ ଟଙ୍କା କେଇଟାରେ ବିକ୍ରି ହେଉଥିଲା କେଜି କେଜି ପିଆଜ, ସେଠି ଏବେ କିଲେ ପିଆଜର ଦର ୮୦ ଟଙ୍କା ଛୁଇଁଲାଣି । ଏହା ହେଉଛି କଳାହାଣ୍ଡି ଜିଲ୍ଲାର କାହାଣୀ । ପିଆଜ ଦର ସହରାଂଚଳରେ ୫୦ରୁ ୬୦ ଟଙ୍କା ଥିବା ବେଳେ ଗ୍ରାମାଂଚଳରେ ଏହା ନିୟନ୍ତ୍ରଣ ହରାଇଛି । ମନ ଇଚ୍ଛା ଦରରେ ପିଆଜ ବିକ୍ରି କରୁଛନ୍ତି ବେପାରୀ ।
Kanak News is now on WhatsApp
Join and get latest news updates delivered to you via WhatsApp
ପିଆଜ ଚାଷ କରି ରାଜ୍ୟ ତଥା ରାଜ୍ୟ ବାହାରକୁ ପଠାଉଥିବା ଧର୍ମଗଡରେ ଏବେ କିଲୋ ପିଆଜକୁ ୮୦ ଟଙ୍କାରେ ବିକ୍ରି ହେଉଛି । ଧର୍ମଗଡ ଉପଖଣ୍ଡର ଗୋଲାମୁଣ୍ଡା, ଜୁନାଗଡ, କଲମପୁର, କୋକସରା ଓ ଜୟପାଟଣା ବ୍ଳକରେ ଭଲ ପିଆଜ ହୋଇଥାଏ । ପିଆଜ ଚାଷ ପାଇ ୩ରୁ ୪ ମାସ ସମୟ ଲାଗିଥାଏ । ତେବେ ପିଆଜ ସଂରକ୍ଷଣର ବ୍ୟବସ୍ଥା ନଥିବାରୁ ଚାଷୀ ପିଆଜ କିଲୋପ୍ରତି ୨ ରୁ ୫ଟଙ୍କାରେ ବିକ୍ରି କରି ଦେଇଥିଲା । ଏପରିକି ଛତିଶଗଡ ଏବଂ ଆନ୍ଧ୍ରପ୍ରଦେଶର ବେପାରୀ ଶସ୍ତାରେ ପିଆଜ କିଣିଥିଲେ ।
ପିଆଜ ସଂରକ୍ଷଣର ବ୍ୟବସ୍ଥା ନଥିବାରୁ ଚାଷୀ ଆଭାବୀ ବିକ୍ରିର ସାମ୍ନା କରିଥିଲା । ଏବେ ଯେତେବେଳେ ସାରା ରାଜ୍ୟରେ ପିଆଜ ସଙ୍କଟ ମାଡି ବସିଛି, ସେତେବେଳେ ଚାଷୀ ୮୦ ଟଙ୍କାରେ ପିଆଜ କିଣୁଛି । ଜିଲ୍ଲାରେ ବର୍ଷକୁ ପ୍ରାୟ ୨୪୬୦ ହେକ୍ଟରରୁ ଅଧିକ ଜମିରେ ପିଆଜ ଚାଷ ହୋଇଥାଏ ଏବଂ ବର୍ଷକୁ ପ୍ରାୟ ୩୮ ଶହ ଟନ୍ ପିଆଜ ଉତ୍ପାଦନ ହୋଇଥାଏ । କିନ୍ତୁ ସଂରକ୍ଷଣ ବ୍ୟବସ୍ଥାର ଅଭାବ ଯୋଗୁଁ ପ୍ରଥମେ ଅଭାବୀ ବିକ୍ରି ଏବଂ ପରେ ଚଢାଦରରେ କିଣୁଛନ୍ତି ଖାଉଟି ।