ବାତ୍ୟା ପରେ ପୁଣି ଥରେ ଅଣ୍ଟା ସଳଖି ଠିଆ ହେଉଛି ଓଡ଼ିଶା : ସରକାର କହିଲେ, ସ୍ୱାଭାବିକ ହେଲା ଜଳ ଯୋଗାଣ, ଯୁଦ୍ଧକାଳୀନ ଭିତରେ ଚାଲିଛି ଭିତ୍ତିଭୂମି ପୁନରୁଦ୍ଧାର
କନକ ବ୍ୟୁରୋ : ମେ ୮ ତାରିଖ ସୁଦ୍ଧା ଫୋନି ପ୍ରଭାବିତ ସମସ୍ତ ସହର ଓ ଗାଁରେ ପିଇବା ପାଣି ଯୋଗାଣ ସ୍ୱାଭାବିକ ହୋଇଛି । ଗୃହ ଓ ସହରାଂଚଳ ବିକାଶ ବିଭାଗ ସଚିବ ଏହି ସୂଚନା ଦେଇଛନ୍ତି । ମେ ମାସ ୬ ତାରିଖ ସୁଦ୍ଧା ପୁରୀ, ୭ ତାରିଖ ସୁଦ୍ଧା ଭୁବନେଶ୍ୱର ଏବଂ ୮ ତାରିଖ ସୁଦ୍ଧା କଟକରେ ଜଳ ଯୋଗାଣ ସ୍ୱାଭାବିକ କରାଯାଇଛି । ଗ୍ରାମାଂଚଳରେ ୨ହଜାର ୨୫୨ ପାଇପ ୱାଟର ସପ୍ଲାଇ ସ୍କିମକୁ କାର୍ଯ୍ୟକ୍ଷମ କରାଯାଇଛି । ଭଦ୍ରକ, କଟକ, କେନ୍ଦ୍ରାପଡା, ଯାଜପୁର ଓ ଜଗତସିଂହପୁରରେ ପାଇପ ୱାଟର ସପ୍ଲାଇ ସମ୍ପୁର୍ଣ୍ଣ ହୋଇଛି । ଖୋର୍ଦ୍ଧା ଜିଲ୍ଲାରେ ୪୨୬ଟି, ପୁରୀରେ ୨୭୫ଟି ପାଇପ ୱାଟର ସପ୍ଲାଇ ସ୍କିମ କାର୍ଯ୍ୟକ୍ଷମ ହୋଇଛି । ଏଯାଏଁ ୩୧ଲକ୍ଷ ଲିଟର ପାଣି ଟ୍ୟାଙ୍କର ଯୋଗେ ଯୋଗାସରିଛି ।
Kanak News is now on WhatsApp
Join and get latest news updates delivered to you via WhatsApp
ସେହିପରି ଫୋନି ମାଡରେ ୧୩ଟି ଜିଲ୍ଲାର ୨୯୧ କିଲୋମିଟର ଡ୍ରେନ, ୭୫୦ କିଲୋମିଟର ରାସ୍ତା, ୩୬୭ଟି କଲଭର୍ଟ ଏବଂ ୨୭ଟି ଆହାର କେନ୍ଦ୍ର ପ୍ରଭାବିତ ହୋଇଥିଲା । ଏସବୁଥିରେ ପୁନରୁଦ୍ଧାର କାମ ଏବେ ବି ଜାରି ରହିଛି ବୋଲି ସୂଚନା ଦେଇଛନ୍ତି ସଚିବ । ଆସନ୍ତାକାଲି ଠାରୁ ସମସ୍ତ ଆହାର କେନ୍ଦ୍ର ଆରମ୍ଭ ହେବ । ମୋବାଇଲ ସେବାକୁ କିପରି ସ୍ୱାଭାବିକ କରାଯାଇପାରିବ ସେ ଦିଗରେ ଠୋସ ପଦକ୍ଷେପ ନିଆଯାଇଥିବା ସେ ସୂଚନା ଦେଇଛନ୍ତି । ଖୋର୍ଦ୍ଧାରେ ୬୫ପ୍ରତିଶତ, ଭୁବନେଶ୍ୱରରେ ୭୨ ପ୍ରତିଶତ, ପୁରୀରେ ୩୫ ପ୍ରତିଶତ ଏବଂ କଟକରେ ୮୨ ପ୍ରତିଶତ ମୋବାଇଲ ସେବା ସ୍ୱାଭାବିକ ହୋଇଛି । ଏହି କାମକୁ ଯୁଦ୍ଧକାଳୀନ ଭିତିରେ ତ୍ୱାରାନ୍ୱିତ କରାଯାଉଛି ।
ସେହିପରି ୧୩ ଜିଲ୍ଲାରେ ମୋଟ ୫୨୪ କୋଟି ଟଙ୍କାର ସହରାଂଚଳ ଭିତ୍ତିଭୂମି କ୍ଷତି ହୋଇଥିବା ଆକଳନ କରାଯାଇଛି । ଦକ୍ଷତା ବିକାଶ ବିଭାଗର ୫୧ଟି ଅନୁଷ୍ଠାନ ନଷ୍ଟ ହୋଇଛି । ଯାହାର ମୁଲ୍ୟ ୩୦ କୋଟି ୫୭ ଲକ୍ଷ ବୋଲି ଜଣାପଡିଛି । ପରିମଳ ବ୍ୟବସ୍ଥା ସ୍ୱାଭାବିକ କରିବାପାଇଁ ୫ ହଜାର ଶ୍ରମିକ, ୬୦୦ସୁପରଭାଇଜର ଲାଗିଛନ୍ତି । ଏଥିସହ କାମରେ ଲାଗିଛି ୯୪୩ଟି ଜେସିବି, ଟ୍ରାକ୍ଟର ଓ ଡମ୍ପର । ଭୁବନେଶ୍ୱରରେ ୪୩୦ଜଣ ଏବଂ କଟକରେ ୨୭୫ଜଣ କୁଶଳୀ କର୍ମଚାରୀ ବିଦ୍ୟୁତ କାମ କରୁଥିବା ସୂଚନା ମିଳିଛି ।