କାଲିଠୁ ସଂସଦରେ ଶୀତ ଅଧିବେଶନ, ବସିପାରିଲାନି ବିଜେଡି ସଂସଦୀୟ ଦଳ ବୈଠକ

କନକ ବ୍ୟୁରୋ; ସୋମବାର ଠାରୁ ଆରମ୍ଭ ହେଉଛି ସଂସଦର ଶୀତ ଅଧିବେଶନ  । ହେଲେ ଏହାପୂର୍ବରୁ ବିଜେଡିର ସଂସଦୀୟ ଦଳରେ ଫାଟ । ପ୍ରତି ଅଧିବେଶନ ପୂର୍ବରୁ ବିଜେଡି ସଭାପତି ନବୀନ ପଟ୍ଟନାୟକ ସାଂସଦଙ୍କୁ ଡାକି ବୈଠକ ନିଅନ୍ତି ।  ଦିଲ୍ଲୀରେ ବିଜେଡିର ଆଭିମୁଖ୍ୟ କ’ଣ ରହିବ ଓ କେଉଁ ପ୍ରସଙ୍ଗରେ ଦଳ ସ୍ବର ଶାଣିତ କରିବ? ସେନେଇ ରଣନୀତି ହୁଏ। ହେଲେ ଚଳିତଥର ବ୍ୟତିକ୍ରମ ଦେଖିବାକୁ ମିଳିଛି । ମୌସୁମୀ ଅଧିବେଶନ ଭଳି ଶୀତ ଅଧିବେଶନ ପୂର୍ବରୁ ମଧ୍ୟ ବସିନି ବିଜେଡିର ସଂସଦୀୟ ଦଳ ବୈଠକ । ଅସନ୍ତୋଷ ଜାହିର କରିବା ସହ ବିଜେଡି ସାଂସଦ ଦେବାଶିଷ ସାମନ୍ତରାୟ କହିଛନ୍ତି, ଦଳ ସଭାପତି ବୈଠକ ଡାକୁନାହାନ୍ତି। କେବଳ ହ୍ବାଟସଆପ୍‌ରେ ଏଜେଣ୍ଡା ଆସୁଛି । ଦେବାଶିଷଙ୍କ ଅଭିଯୋଗକୁ ବଳ ଦେଇଛି ସସ୍ମିତଙ୍କ ହ୍ବାଟସଆପ୍ ମେସେଜ୍ ।

 ଅଧିକ ପଢନ୍ତୁ :  ଦିନକ ପରେ ସଂସଦର ଶୀତ ଅଧିବେଶନ: ପ୍ରସଙ୍ଗ ଧରି ବିରୋଧୀ ପ୍ରସ୍ତୁତ, ସରକାର ତୟାର

ବୈଠକ ନକରି ଦଳର ଏଜେଣ୍ଡା ବାବଦରେ ସାଂସଦଙ୍କୁ ହ୍ବାଟସଆପରେ ମେସେସ୍ ଦିଆଯାଇଛି । ଓଡ଼ିଶାକୁ ସ୍ବତନ୍ତ୍ର ରାଜ୍ୟ ପାହ୍ୟା, ନିର୍ବାଚନରେ ଅନିୟମିତତା, ପୋଲାଭରମ୍ ଓ ମହାନଦୀ ବିବାଦ, ରାଜ୍ୟରେ ଆଇନଶୃଙ୍ଖଳା ପରିସ୍ଥିତି ଭଳି ୧୨ଟି ପ୍ରସଙ୍ଗ ଉଠାଇବାକୁ ନିଷ୍ପତ୍ତି ନେଇଛି ଦଳ। ତେବେ ହ୍ବାଟସଆପ୍ ମେସେଜକୁ ଦଳୀୟ ସାଂସଦ କେତେ ଗ୍ରହଣ କରିବେ ତାହା ସବୁଠୁ ବଡ଼ପ୍ରଶ୍ନ । କାରଣ  ଦିଲ୍ଲୀରେ ବିଜେଡି ୨ ଭାଗ ହୋଇଥିବା ଚର୍ଚ୍ଚା । ମୁନା ଖାଁ ଓ ଦେବାଶିଷ ସାମନ୍ତରାୟ ଗୋଟିଏ କ୍ୟାମ୍ପରେ ଥିବା ବେଳେ ବାକି ସାଂସଦଙ୍କ କ୍ୟାମ୍ପ ଭିନ୍ନ ।  ଦିନେ ଯେଉଁ ନବୀନଙ୍କ ହୁକୁମ୍ ଦଳରେ ସର୍ବମାନ୍ୟ ଥିଲା ଏବେ ତାହାର ସ୍ବରୂପ ବଦଳିଯାଇଛି । ଏସବୁ ଭିତରେ ଦିଲ୍ଲୀରେ ସାଂସଦଙ୍କୁ ଏକାଠି କରିବା ବିଜେଡି ସୁପ୍ରିମୋଙ୍କ ପାଇଁ ବଡ଼ ଆହ୍ବାନ ।