ଯେବେ ବାରବାଟୀ ଦେଖିଥିଲା ‘ଯୁବି-ମାହି’ଙ୍କ ଜଲଓ୍ୱା: ଧୂଆଁଧାର ବ୍ୟାଟିଂ କରିଥିଲେ ଧୋନୀ, ଚାଲିଥିଲା ଯୁବରାଜଙ୍କ ଯାଦୁ

କନକ ବ୍ୟୁରୋ: ୧୯ ଜାନୁଆରୀ ୨୦୧୭, କଟକର ଐତିହାସିକ ବାରବାଟୀ ଷ୍ଟାଡିୟମ୍‌ରେ ଖେଳାଯାଇଥିବା ଭାରତ ଏବଂ ଇଂଲଣ୍ଡ ମଧ୍ୟରେ ଦ୍ୱିତୀୟ ଦିନିକିଆ ମ୍ୟାଚ୍ କ୍ରିକେଟ ପ୍ରେମୀଙ୍କ ପାଇଁ ଏକ ସ୍ମରଣୀୟ ମୁହୂର୍ତ୍ତ ହୋଇ ରହିଛି । ସେଦିନ ବାରବାଟୀ ଗ୍ୟାଲେରୀ କେବଳ ଦର୍ଶକଙ୍କ କୋଳାହଳରେ କମ୍ପୁନଥିଲା, ବରଂ ଦୁଇ କ୍ରିକେଟ କିମ୍ବଦନ୍ତୀ ଯୁବରାଜ ସିଂ ଏବଂ ମହେନ୍ଦ୍ର ସିଂ ଧୋନୀଙ୍କ ବ୍ୟାଟରୁ ବାହାରିଥିବା ରନ୍‌ର ବର୍ଷାରେ ଭିଜୁଥିଲା ।

ସେଦିନ ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଭାରତୀୟ ଦଳର ଆରମ୍ଭ ବହୁତ ଖରାପ ଥିଲା । ମାତ୍ର ୨୫ ରନରେ ଶିଖର ଧାୱନ, ଲୋକେଶ ରାହୁଲ ଏବଂ ଅଧିନାୟକ ବିରାଟ କୋହଲିଙ୍କୁ ହରାଇ ଭାରତ ସଂକଟରେ ଥିଲା । ଠିକ୍ ଏହି ସମୟରେ ପଡ଼ିଆକୁ ଓହ୍ଲାଇଥିଲେ ଦୁଇ ପୁରୁଣା ବନ୍ଧୁ ୟୁଭି ଏବଂ ମାହି । ସେମାନଙ୍କ ଖେଳ ଦେଖି ମନେ ହେଉଥିଲା ଯେପରି ସମୟ ପଛକୁ ଫେରିଯାଇଛି।

ଆହୁରି ପଢ଼ନ୍ତୁ... ଶତକ ସତ୍ତ୍ବେ ଭାରତକୁ ବିଜୟ ଦେଇପାରିଲେନି ବିରାଟ, ଇନ୍ଦୋର ଦିନିକିଆ ଜିତି ଇତିହାସ ରଚିଲା ନ୍ୟୁଜିଲାଣ୍ଡ

ଯୁବରାଜ ସିଂ ନିଜର ସେହି ପୁରୁଣା ଆକ୍ରମଣାତ୍ମକ ଅନ୍ଦାଜରେ ଇଂଲଣ୍ଡ ବୋଲରଙ୍କୁ ନାକେଦମ୍ କରିଦେଇଥିଲେ । ସେ ମାତ୍ର ୧୨୭ ବଲରୁ ୨୧ଟି ଚୌକା ଏବଂ ୩ଟି ଛକା ସହାୟତାରେ ୧୫୦ ରନର ଏକ ବିସ୍ଫୋରକ ପାରି ଖେଳିଥିଲେ । କର୍କଟ ପରି ମାରାତ୍ମକ ରୋଗକୁ ଜିତି ପଡ଼ିଆକୁ ଫେରିବା ପରେ ଏହା ତାଙ୍କ କ୍ୟାରିୟରର ସର୍ବୋତ୍ତମ ସ୍କୋର ଥିଲା । ଅନ୍ୟପଟେ ‘କ୍ୟାପଟେନ କୁଲ୍’ ଧୋନି ମଧ୍ୟ ନିଜର ଶକ୍ତିଶାଳୀ ବ୍ୟାଟିଂ ପ୍ରଦର୍ଶନ କରି ୧୨୨ ବଲରୁ ୧୩୪ ରନ ସଂଗ୍ରହ କରିଥିଲେ, ଯେଉଁଥିରେ ୧୦ଟି ଚୌକା ଓ ୬ଟି ବିଶାଳ ଛକା ସାମିଲ ଥିଲା ।

ଦୁହିଁଙ୍କ ମଧ୍ୟରେ ୨୫୬ ରନର ଏକ ଐତିହାସିକ ଭାଗିଦାରୀ ହୋଇଥିଲା, ଯାହା ଭାରତୀୟ ସ୍କୋରକୁ ୩୮୧ ରନରେ ପହଞ୍ଚାଇଥିଲା ।  ବାରବାଟୀର ଗ୍ୟାଲେରୀରେ ‘ଯୁବି-ଧୋନୀ’ଙ୍କ ନାମରେ ଜୟକାର ଶୁଭୁଥିଲା । ଇଂଲଣ୍ଡ ଦଳ ମଧ୍ୟ ଦୃଢ଼ ମୁକାବିଲା କରି ୩୬୬ ରନ ପର୍ଯ୍ୟନ୍ତ ପହଞ୍ଚିଥିଲା, କିନ୍ତୁ ଭାରତ ଏହି ରୋମାଞ୍ଚକର ମ୍ୟାଚକୁ ୧୫ ରନରେ ଜିତି ନେଇଥିଲା ।

ଏହି ମ୍ୟାଚ୍ କେବଳ ଏକ ବିଜୟ ନଥିଲା, ବରଂ ଯୁବରାଜଙ୍କ ପାଇଁ ଏକ ଭାବପୂର୍ଣ୍ଣ ପ୍ରତ୍ୟାବର୍ତ୍ତନ ଏବଂ ଧୋନୀଙ୍କ ପାଇଁ ତାଙ୍କ କ୍ଲାସିକ ଫିନିସିଂ ଶୈଳୀର ପ୍ରମାଣ ଥିଲା । କଟକ ବାରବାଟୀ ଷ୍ଟାଡିୟମ୍‌ରେ ଖେଳାଯାଇଥିବା ଏହି ଇନିଂସ ଆଜି ମଧ୍ୟ ଓଡ଼ିଶାର କ୍ରିକେଟ ପ୍ରେମୀଙ୍କ ହୃଦୟରେ ସ୍ମୃତି ହୋଇ ରହିଛି । ଏହା ଥିଲା ଭାରତୀୟ କ୍ରିକେଟର ଦୁଇ ସର୍ବଶ୍ରେଷ୍ଠ ଯୋଦ୍ଧାଙ୍କର ଏକ ମିଳିତ ଇଂନିସ ।