କନକ ବ୍ୟୁରୋ: ଆପଣ କ'ଣ ଟେଲିଭିଜନ କିଣିବାକୁ ଯୋଜନା କରୁଛନ୍ତି କି? ତେବେ ଏହି ଖବର ଆପଣଙ୍କ ପାଇଁ ବହୁତ ଜରୁରୀ । ଯଦି ଆପଣ ଟିଭି କିଣିବାକୁ ଚିନ୍ତା କରୁଛନ୍ତି ଆପଣଙ୍କୁ ମହଙ୍ଗା ପଡିପାରେ, କାରଣ ଜାନୁଆରୀ ମାସରେ ଟିଭି ଦରରେ ବଡ଼ ଧରଣର ବୃଦ୍ଧି ହୋଇପାରେ । ରିପୋର୍ଟ ଅନୁଯାୟୀ, ଟିଭି ଦରରେ ୩ରୁ ୪ ପ୍ରତିଶତ ବୃଦ୍ଧି ହୋଇପାରେ। ଏଥିରେ ଦର ବଢିବା ପଛର କାରଣ ମଧ୍ୟ ଉଲ୍ଲେଖ କରାଯାଇଛି । ଆସନ୍ତୁ ଏହା ବିଷୟରେ ଜାଣିବା...

Advertisment

ଟିଭି ଦର ଉପରେ ଦୋହରା ମାଡ଼ ପଡିବାକୁ ଯାଉଛି ଏବଂ ଜାନୁଆରୀରୁ ଏହାର ଦରରେ ୩ରୁ ୪ ପ୍ରତିଶତ ପର୍ଯ୍ୟନ୍ତ ବୃଦ୍ଧି ଘଟିପାରେ । ରିପୋର୍ଟ ଅନୁଯାୟୀ, ଏହାର ବଡ଼ କାରଣଗୁଡିକ ମଧ୍ୟରୁ ପ୍ରଥମଟି ହେଉଛି ଟିଭିରେ ଲାଗୁଥିବା ମେମୋରୀ ଚିପ୍ସର ଅଭାବ, ସେହିପରି ଭାରତୀୟ ମୁଦ୍ରା 'ଟଙ୍କା'ର ମୂଲ୍ୟ ହ୍ରାସ ମଧ୍ୟ ଭାରତୀୟ ଟିଭି ଇଣ୍ଡଷ୍ଟ୍ରିକୁ ଅଡୁଆରେ ପକାଇ ଦେଇଛି, ଯାହା ଆମେରିକୀୟ ଡଲାର ତୁଳନାରେ ୯୦ ତଳେ ଚାଲୁଛି । ସୋମବାର ଦିନ ମଧ୍ୟ ଏହା ଖସି ୯୦.୬୩ ସ୍ତରକୁ ଚାଲିଆସିଛି ।

ସର୍ବପ୍ରଥମେ ଜାଣିବା ଯେ ଭାରତୀୟ ମୁଦ୍ରାର ମୂଲ୍ୟ ହ୍ରାସ ଟିଭି ଇଣ୍ଡଷ୍ଟ୍ରିକୁ କିପରି ପ୍ରଭାବିତ କରୁଛି? ତେବେ ଜାଣି ରଖନ୍ତୁ ଯେ, ଟଙ୍କାର ମୂଲ୍ୟ ହ୍ରାସର ସିଧାସଳଖ ପ୍ରଭାବ ଏହି ବ୍ୟବସାୟ ଉପରେ ପଡୁଛି, କାରଣ ଏଲଇଡି ଟିଭିରେ ଘରୋଇ ମୂଲ୍ୟ ଯୋଗାଣ କେବଳ ୩୦ ପ୍ରତିଶତ ଆଖପାଖରେ ରହିଛି । ଯେତେବେଳେ କି, ଓପନ୍ ସେଲ୍, ସେମିକଣ୍ଡକ୍ଟର ଚିପ୍ସ ଏବଂ ମଦରବୋର୍ଡ ଭଳି ବଡ଼ ଯନ୍ତ୍ରାଂଶଗୁଡ଼ିକ ଆମଦାନୀ କରାଯାଏ ଏବଂ ଟଙ୍କାର ମୂଲ୍ୟ କମିବା ଯୋଗୁଁ ସେଗୁଡିକୁ ଆମଦାନୀ କରିବା ପାଇଁ ଅଧିକ ଟଙ୍କା ଖର୍ଚ୍ଚ କରିବାକୁ ପଡୁଛି । 

ଆହୁରି ପଢ଼ନ୍ତୁ... ପୁରୀ ଯିବାକୁ ଆଉ ଲାଗିବନି ଘଣ୍ଟା ଘଣ୍ଟା , ମାତ୍ର ୪୦ ମିନିଟ୍‌ରେ ଶ୍ରୀକ୍ଷେତ୍ରରେ ପହଞ୍ଚିଯିବେ ଭକ୍ତ

ଗୋଟିଏ ପଟେ ଟଙ୍କାର ମୂଲ୍ୟ ହ୍ରାସ ଟିଭି ଇଣ୍ଡଷ୍ଟ୍ରିକୁ ଅସୁବିଧାରେ ପକାଇଥିବା ବେଳେ, ଅନ୍ୟ ପଟେ ଏଥିରେ ବ୍ୟବହୃତ ହେଉଥିବା ମେମୋରୀ ଚିପ୍ସର ଅଭାବ ଏବଂ ବର୍ଦ୍ଧିତ ମୂଲ୍ୟ ଏହି ସମସ୍ୟାକୁ ବଢାଇବାରେ ମୁଖ୍ୟ ଭୂମିକା ଗ୍ରହଣ କରିଛି । ବାସ୍ତବରେ, ଏହାର ଉପଲବ୍ଧତା କମିବା ଯୋଗୁଁ ଚିପ୍ସର ଦର ବୃଦ୍ଧି ପାଉଛି । ରିପୋର୍ଟ ଅନୁଯାୟୀ, AI ସର୍ଭର ପାଇଁ ହାଇ-ବ୍ୟାଣ୍ଡୱିଡଥ ମେମୋରୀର ପ୍ରବଳ ଚାହିଦା ଯୋଗୁଁ ସାରା ବିଶ୍ୱରେ ଏହାର ଘୋର ଅଭାବ ଦେଖାଦେଇଛି, ଯାହା ଫଳରେ ସମସ୍ତ ପ୍ରକାରର ମେମୋରୀର ମୂଲ୍ୟ ବୃଦ୍ଧି ପାଉଛି । ଚିପ୍ ନିର୍ମାତାମାନେ ଅଧିକ ଲାଭଦାୟକ AI ଚିପ୍ସ ଉପରେ ଧ୍ୟାନ ଦେଉଛନ୍ତି, ଯାହା ଫଳରେ ଟିଭି ଭଳି ପୁରୁଣା ଡିଭାଇସ୍ ପାଇଁ ଯୋଗାଣ କମିଯାଉଛି ।

ହାୟର ଆପ୍ଲାଏନ୍ସେସ୍ ଇଣ୍ଡିଆର ଅଧ୍ୟକ୍ଷ ଏନ.ଏସ ସତୀଶଙ୍କ ଅନୁଯାୟୀ ମେମୋରୀ ଚିପ୍ସ ସଙ୍କଟ ଏବଂ ଟଙ୍କାର ମୂଲ୍ୟ ହ୍ରାସ କାରଣରୁ ଏଲଇଡି ଟିଭି ଦରରେ ୩ ପ୍ରତିଶତ ପର୍ଯ୍ୟନ୍ତ ବୃଦ୍ଧି ଘଟିପାରେ । ସେ କହିଛନ୍ତି ଯେ କିଛି ଟିଭି ନିର୍ମାତା ତ ପୂର୍ବରୁ ହିଁ ନିଜ ଡିଲରମାନଙ୍କୁ ଟିଭି ଦର ବୃଦ୍ଧି ସମ୍ପର୍କରେ ସତର୍କ କରାଇ ଦେଇଛନ୍ତି ।

ଥମସନ୍, କୋଡାକ୍ ଏବଂ ବ୍ଲାପଙ୍କ୍ ଭଳି ଗ୍ଲୋବାଲ୍ ବ୍ରାଣ୍ଡର ଲାଇସେନ୍ସଧାରୀ ସୁପର ପ୍ଲାଷ୍ଟ୍ରୋନିକ୍ସ ପ୍ରାଇଭେଟ୍ ଲିମିଟେଡ୍ ପକ୍ଷରୁ ଜାରି ବିବୃତ୍ତିରେ କୁହାଯାଇଛି ଯେ ଗତ ମାତ୍ର ତିନି ମାସ ମଧ୍ୟରେ ମେମୋରୀ ଚିପ୍ସର ମୂଲ୍ୟ ୫୦୦% ପର୍ଯ୍ୟନ୍ତ ବଢିସାରିଛି ।