କନକ ବ୍ୟୁରୋ: ପୁଣି ଥରେ ଟାରିଫର ଲାଭ ବଖାଣିଲେ ଡୋନାଲ୍ଡ ଟ୍ରମ୍ପ । ସୋସିଆଲ ମିଡିଆ ପୋଷ୍ଟରେ ସେ କହିଛନ୍ତି ଯେ ତାଙ୍କ ନେତୃତ୍ୱରେ ଆମେରିକା କ୍ରମାଗତ ଭାବେ ଆଗକୁ ବଢୁଛି ଏବଂ ଟାରିଫର ସମାଲୋଚନା କରୁଥିବା ଲୋକଙ୍କୁ 'ମୂର୍ଖ' ବୋଲି କହିଛନ୍ତି । ଏହା ସହିତ ସେ ଟାରିଫ ରାଜସ୍ୱରୁ ପ୍ରାୟ ପ୍ରତ୍ୟେକ ଆମେରିକୀୟଙ୍କୁ ୨୦୦୦ ଡଲାର ଲାଭାଂଶ ଭାବରେ ଦେବାକୁ ପ୍ରତିଶ୍ରୁତି ମଧ୍ୟ ଦେଇଛନ୍ତି ।

Advertisment

ନିଜ ଟାରିଫରେ ବିଶ୍ୱକୁ ଭୟଭୀତ କରୁଥିବା ଡୋନାଲ୍ଡ ଟ୍ରମ୍ପ, ଆମେରିକାକୁ ଦେଉଥିବା ଲାଭକୁ ନେଇ କ୍ରମାଗତ ଭାବେ କହିଆସୁଛନ୍ତି । ଟ୍ରୁଥ ସୋସିଆଲ ପ୍ଲାଟଫର୍ମରେ ଏକ ନୂଆ ପୋଷ୍ଟରେ ସେ ନିଜ ବାଣିଜ୍ୟ ନୀତିର ପ୍ରଚାର କରିଛନ୍ତି ଏବଂ ଦାବି କରିଛନ୍ତି ଯେ ତାଙ୍କ ନେତୃତ୍ୱରେ ଆମେରିକା ବିଶ୍ୱର ସବୁଠାରୁ ଧନୀ ଓ ସବୁଠାରୁ ସମ୍ମାନିତ ଦେଶ, ଯେଉଁଥିରେ ରେକର୍ଡ ଷ୍ଟକ୍ ମୂଲ୍ୟ, ଉଚ୍ଚ ୪୦୧(କ) ବାଲାନ୍ସ ଏବଂ କାରଖାନାଗୁଡ଼ିକରେ ମଧ୍ୟ ବୃଦ୍ଧି ଘଟୁଛି ।

ଡୋନାଲ୍ଡ ଟ୍ରମ୍ପ ଆମେରିକାର ଆର୍ଥିକ ସୁଦୃଢତାର ମୁଖ୍ୟ କାରକ ଭାବରେ ଟାରିଫକୁ ବ୍ୟବହାର କରି ଏହାକୁ ସମର୍ଥନ କରିଛନ୍ତି । ଏହା ସହିତ ସେ ଏହା ବିରୁଦ୍ଧରେ ଥିବା ଲୋକମାନଙ୍କୁ ଏବଂ ଟାରିଫର ସମାଲୋଚନା କରୁଥିବା ଲୋକଙ୍କ ଉପରେ ମଧ୍ୟ ନିଶାନା କରିଛନ୍ତି । ସେ ନିଜ ପୋଷ୍ଟରେ ଲେଖିଛନ୍ତି, 'ଯେଉଁମାନେ ଟାରିଫ ବିରୁଦ୍ଧରେ ଅଛନ୍ତି, ସେମାନେ ମୂର୍ଖ!' ଆମେରିକୀୟ ରାଷ୍ଟ୍ରପତି ଯୁକ୍ତି କରିଛନ୍ତି ଯେ ଟାରିଫ ନିବେଶ ଓ ରୋଜଗାର ସୁଯୋଗକୁ ପ୍ରୋତ୍ସାହିତ କରିଛି ।

ଟାରିଫର ସମାଲୋଚକମାନଙ୍କୁ ମୂର୍ଖ କହି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିଜ ଟ୍ରୁଥ ସୋସିଆଲ ପୋଷ୍ଟରେ ଏକ ବଡ଼ ପ୍ରତିଶ୍ରୁତି ଦେଇ କହିଛନ୍ତି ଯେ ୟୁଏସ ଟାରିଫ ରେଭିନ୍ୟୁରୁ ପ୍ରାୟ ସମସ୍ତ ଆମେରିକୀୟଙ୍କୁ ଟାରିଫ ଲାଭାଂଶ ଭାବରେ ୨,୦୦୦ ଡଲାର ପ୍ରଦାନ କରାଯିବ । ତେବେ ସେ ଏହା ସ୍ପଷ୍ଟ କରିନାହାଁନ୍ତି ଯେ ଏହି ପେମେଣ୍ଟ କିପରି ଓ କେବେ ହେବ ।

ଆହୁରି ପଢ଼ନ୍ତୁ... ଏକରୁ ଅଧିକ ବାହାହେଲେ କାର୍ଯ୍ୟାନୁଷ୍ଠାନ: ଶୀଘ୍ର ଆସିବ ଆଇନ, ନିୟମ ଭାଙ୍ଗିଲେ ୭ ବର୍ଷ ଜେଲ୍

ଟ୍ରମ୍ପ ନିଜ ପୋଷ୍ଟରେ ଆହୁରି ଲେଖିଛନ୍ତି ଯେ, 'ଟାରିଫରୁ ଆସୁଥିବା ରାଜସ୍ୱରୁ ଆମେରିକାକୁ ଖରବ ଡଲାରର ଆୟ ହେଉଛି ଏବଂ ଏହାକୁ ଆମେରିକା ଉପରେ ଥିବା ଜାତୀୟ ଋଣ ପରିଶୋଧ କରିବା ଆରମ୍ଭ କରିବା ପାଇଁ ମଧ୍ୟ ବ୍ୟବହାର କରାଯାଇପାରିବ, ଯାହା ବର୍ତ୍ତମାନ ୩୭ ଟ୍ରିଲିୟନ ଡଲାର ହୋଇଛି।' ଟାରିଫକୁ ନେଇ ଟ୍ରମ୍ପଙ୍କ ଏହି ନୂଆ ଦାବି ଏପରି ଏକ ସମୟରେ ଆସିଛି, ଯେତେବେଳେ ତାଙ୍କର ଏହି ଟାରିଫ କାର୍ଯ୍ୟକ୍ରମ ଆଇନଗତ ଅନିଶ୍ଚିତତାର ସାମ୍ନା କରୁଛି।

ଉଲ୍ଲେଖଯୋଗ୍ୟ ଯେ, ଆମେରିକାର ସୁପ୍ରିମକୋର୍ଟରେ ଗତ କିଛି ଦିନ ତଳେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଟାରିଫ ନୀତିକୁ ନେଇ ବହୁତ ବାଦବିବାଦ ହୋଇଥିଲା । ପ୍ରାୟ ଅଢେଇ ଘଣ୍ଟା ଧରି ଚାଲିଥିବା ଶୁଣାଣିରେ ବିଚାରପତିମାନେ ଟାରିଫର ବୈଧତା ଉପରେ ପ୍ରଶ୍ନ ଉଠାଇଥିଲେ । ମୁଖ୍ୟ ବିଚାରପତି ଜନ୍ ରବର୍ଟସ ତ ଆମେରିକୀୟ ସଲିସିଟର ଜେନେରାଲ ଡି. ଜନ୍ ସାୱରଙ୍କୁ ଏପରିକି କହିଥିଲେ ଯେ ଟାରିଫ ଆମେରିକୀୟମାନଙ୍କ ଉପରେ ଟିକସ ଲଗାଇବା ସହିତ ସମାନ ।