ଅଷ୍ଟମ ପଢ଼ିଥିଲେ ପାଇବେ ଆର୍ମି ଚାକିରି ; ଭାରତୀୟ ସେନାରେ ବାହାରିଲା ବଡ଼ ନିଯୁକ୍ତି

କନକ ବ୍ୟୁରୋ : ଦେଶର ଯୁବକମାନଙ୍କ ପାଇଁ ବଡ଼ ଖବର , ବହୁଦିନ ଧରି ସେନା ଭର୍ତ୍ତିକୁ ଅପେକ୍ଷା କରିଥିବା ଆଶାୟୀ ପ୍ରାର୍ଥୀମାନଙ୍କୁ ଶେଷରେ ସେହି ସୁଯୋଗ ମିଳିବାକୁ ଯାଉଛି । ନଭେମ୍ବର ୧୫ରୁ ଦେଶର ୨୨ଟି ରାଜ୍ୟ ଓ ଅନେକ କେନ୍ଦ୍ର ଶାସିତ ଅଞ୍ଚଳରେ ଟେରିଟୋରିଆଲ୍ ଆର୍ମି ନିଯୁକ୍ତି ପ୍ରକ୍ରିୟା ଆରମ୍ଭ ହେଉଛି । ଏହି ନିଯୁକ୍ତିରେ ଯୁବକମାନଙ୍କୁ ସୈନିକ ଜିଡି, ସୈନିକ କ୍ଲର୍କ ଓ ଅନ୍ୟାନ୍ୟ ଅନେକ ଟ୍ରେଡରେ ସୁଯୋଗ ମିଳିବ । ବିଶେଷ କଥା ହେଉଛି, ଏଥର ମୋଟ ୧୫୦୦ରୁ ଅଧିକ ପଦବୀରେ ନିଯୁକ୍ତି କରାଯାଉଛି, ଯାହା ଫଳରେ ବହୁ ସଂଖ୍ୟକ ଯୁବକଙ୍କ ଚୟନ ସମ୍ଭାବନା ବୃଦ୍ଧି ପାଇବ । ଚୟନିତ ପ୍ରାର୍ଥୀମାନଙ୍କୁ ସମଗ୍ର ଦେଶର ବିଭିନ୍ନ ୟୁନିଟରେ ନିଯୁକ୍ତ କରାଯିବ ।

ଟେରିଟୋରିଆଲ୍ ଆର୍ମିର ଏହି ନିଯୁକ୍ତି ସେହି ଯୁବକମାନଙ୍କ ପାଇଁ ଏକ ବଡ଼ ସୁଯୋଗ ଆଣିଛି, ଯେଉଁମାନେ ସେନାରେ ଯୋଗ ଦେଇ ଦେଶର ସେବା କରିବାକୁ ଚାହାନ୍ତି । ଏହି ନିଯୁକ୍ତି ସେମାନଙ୍କୁ ସେନାର ଅଂଶ ହେବାର ସୁଯୋଗ ଦେବ । ଏଥର ଯେଉଁ ପଦବୀରେ ନିଯୁକ୍ତି ହେବ, ସେଥିରେ ସୈନିକ ସାଧାରଣ ଡ୍ୟୁଟିର ୭୫୨ଟି ପଦ, ସୈନିକ କ୍ଲର୍କର ୭୯୨ଟି ପଦ, ସୈନିକ ସର୍ଭେର ୬ଟି ପଦ, ସୈନିକ ଶେଫ୍ ସ୍ପେଶାଲର ୧ଟି ପଦ, ସୈନିକ କୁକ୍‌ ସେବାର ୨ଟି ପଦ, ସୈନିକ ରେଲୱେର ୨ଟି ପଦ, କମ୍ପୱାୟାର ବାଟାଲିୟନର ୨ଟି ପଦ, ସୈନିକ ଦର୍ଜିର ୧ଟି ପଦ, ହାଉସ କ୍ରୋୟରର ୧୦ଟି ପଦ, ସୈନିକ ମେସର ୪ଟି ପଦ, ସୈନିକ କାଠ କାରିଗରର ୨ଟି ପଦ ଏବଂ ସୈନିକ ହେଲ୍ଥ ଟ୍ରେଜରର ୩ଟି ପଦ ସାମିଲ ଅଛି । ସମସ୍ତ ପଦବୀରେ ପୁରୁଷ ଓ ମହିଳା ଉଭୟ ପ୍ରାର୍ଥୀଙ୍କୁ ସମାନ ସୁଯୋଗ ମିଳିବ ।

ଅଧିକ ପଢ଼ନ୍ତୁ--ବିଲରେ ଶୋଇଛି ବିରାଟ ବଉଳା କୁମ୍ଭୀର : ଛାନିଆରେ ପୂରା ଗାଁ

ନିଯୁକ୍ତି କ୍ୟାଲେଣ୍ଡର ମଧ୍ୟ ଅନେକ ପର୍ଯ୍ୟାୟରେ ସ୍ଥିର କରାଯାଇଛି ଯାହାଫଳରେ ରାଜ୍ୟର ଯୁବକମାନଙ୍କୁ ସେମାନଙ୍କ ନିକଟସ୍ଥ ସ୍ଥାନରେ ନିଯୁକ୍ତିରେ ସାମିଲ ହେବାରେ ସୁବିଧା ମିଳିବ । ନଭେମ୍ବର ୧୫ରୁ ଡିସେମ୍ବର ୧୪ ପର୍ଯ୍ୟନ୍ତ ମଧ୍ୟପ୍ରଦେଶ, ବିହାର, ଝାଡ଼ଖଣ୍ଡ, ଉତ୍ତର ପ୍ରଦେଶ, ରାଜସ୍ଥାନ ଓ ଓଡ଼ିଶାରେ ନିଯୁକ୍ତି ହେବ । ଏହା ବ୍ୟତୀତ ହରିୟାଣା ଓ ଦିଲ୍ଲୀରେ ନିଯୁକ୍ତି ନଭେମ୍ବର ୨୮ରୁ ଡିସେମ୍ବର ୧୦ ପର୍ଯ୍ୟନ୍ତ ଚାଲିବ । ସେହିପରି ଦକ୍ଷିଣ ଓ ପଶ୍ଚିମ ଭାରତର ରାଜ୍ୟ ଯେପରିକି କେରଳ, ଗୁଜୁରାଟ, ଆନ୍ଧ୍ର ପ୍ରଦେଶ, କର୍ଣ୍ଣାଟକ, ତାମିଲନାଡୁ, ମହାରାଷ୍ଟ୍ର, ଗୋଆ, ତେଲେଙ୍ଗାନା ସହିତ ଲକ୍ଷଦ୍ୱୀପ, ଦମନ ଆଣ୍ଡ ଡିଉ, ଦାଦ୍ରା ନଗର ହାଭେଳି ଏବଂ ପୁଡୁଚେରୀରେ ନିଯୁକ୍ତି ନଭେମ୍ବର ୧୫ରୁ ଡିସେମ୍ବର ୧ ପର୍ଯ୍ୟନ୍ତ ଆୟୋଜିତ କରାଯିବ ।

ଏହି ନିଯୁକ୍ତିର ଯୋଗ୍ୟତା ମଧ୍ୟ ପଦବୀ ଅନୁସାରେ ଅତ୍ୟନ୍ତ ସରଳ ରଖାଯାଇଛି । ଅଷ୍ଟମ ଶ୍ରେଣୀରୁ ଦ୍ୱାଦଶ ଶ୍ରେଣୀ ପାସ୍ କରିଥିବା ପ୍ରାର୍ଥୀମାନେ ଏଥିରେ ସାମିଲ ହୋଇପାରିବେ । ଯେକୌଣସି ପଦ ପାଇଁ ୧୮ ବର୍ଷରୁ ୪୫ ବର୍ଷ ପର୍ଯ୍ୟନ୍ତ ପ୍ରାର୍ଥୀମାନେ ଆବେଦନ କରିପାରିବେ । ଏହି ବ୍ୟାପକ ବୟସ ସୀମା ଯୋଗୁଁ ବହୁ ସଂଖ୍ୟାରେ ଯୁବକଙ୍କ ପାଖରେ ସୁଯୋଗ ରହିବ । ଚୟନିତ ପ୍ରାର୍ଥୀମାନଙ୍କୁ ଟେରିଟୋରିଆଲ୍ ଆର୍ମିର ନିୟମ ଅନୁସାରେ ଦରମା ଓ ଅନ୍ୟାନ୍ୟ ଲାଭ ମିଳିବ, ଯାହାଦ୍ୱାରା ସେମାନଙ୍କୁ ଆର୍ଥିକ ସୁରକ୍ଷା ମଧ୍ୟ ମିଳିବ ।

ଅଧିକ ପଢ଼ନ୍ତୁ-ଚିନ୍ତା ବଢ଼ାଇଲା ପୋଲିଓ ଭାଇରସ୍;ପଡ଼ୋଶୀ ଦେଶରେ ଭାଇରସ୍ ଚିହ୍ନଟ

ରାଲିରେ ଯୋଗଦେବା ସମୟରେ, ପ୍ରାର୍ଥୀମାନେ ଡୋମିସାଇଲ୍ ସାର୍ଟିଫିକେଟ୍, ପରିଚୟପତ୍ର, ଜାତି ପ୍ରମାଣପତ୍ର, ପାସପୋର୍ଟ ଆକାରର ରଙ୍ଗୀନ ଫଟୋଗ୍ରାଫ୍, ଦଶମ ଏବଂ ଦ୍ୱାଦଶ ମାର୍କସିଟ୍, PAN ଏବଂ ଆଧାର କାର୍ଡ, ଅବିବାହିତ ପ୍ରମାଣପତ୍ର, ବିବାହିତମାନଙ୍କ ପାଇଁ ତହସିଲଦାର/ଜିଲ୍ଲା ମାଜିଷ୍ଟ୍ରେଟ୍ ଦ୍ୱାରା ଜାରି କରାଯାଇଥିବା ପ୍ରମାଣପତ୍ର ଭଳି ଦସ୍ତାବିଜ୍ ନିଶ୍ଚୟ ନେଇ ଯାଆନ୍ତୁ । ଅନ୍ୟ କୌଣସି ସୂଚନା ପାଇଁ, ପ୍ରାର୍ଥୀମାନେ ଟେରିଟୋରିଆଲ୍ ଆର୍ମିର ଅଫିସିଆଲ୍ ୱେବସାଇଟକୁ ଯାଇ ଯାଞ୍ଚ କରିପାରିବେ।

ଚୟନ ପ୍ରକ୍ରିୟା ମଧ୍ୟ ସମ୍ପୂର୍ଣ୍ଣ ସ୍ୱଚ୍ଛ ରଖାଯାଇଛି । ଆବେଦନ କରିଥିବା ପ୍ରାର୍ଥୀମାନଙ୍କୁ ପ୍ରଥମେ ଫିଜିକାଲ୍ ଟେଷ୍ଟ ଦେବାକୁ ପଡ଼ିବ । ସେନା ନିଯୁକ୍ତିର ଏହା ସବୁଠାରୁ ଗୁରୁତ୍ୱପୂର୍ଣ୍ଣ ପର୍ଯ୍ୟାୟ ଭାବେ ବିବେଚନା କରାଯାଏ, ଯେଉଁଥିରେ ଦୌଡ଼, ଉଚ୍ଚତା, ଛାତି ଓ ଅନ୍ୟାନ୍ୟ ଶାରୀରିକ ମାନକ ଯାଞ୍ଚ କରାଯାଏ ।  ଫିଜିକାଲ୍ ପାସ୍ କରିଥିବା ପ୍ରାର୍ଥୀମାନଙ୍କୁ ମେଡିକାଲ୍ ଟେଷ୍ଟ ପାଇଁ ପଠାଯିବ । ମେଡିକାଲରେ ପ୍ରାର୍ଥୀଙ୍କ ଫିଟନେସ, ସ୍ୱାସ୍ଥ୍ୟ ଓ ଯେକୌଣସି ପ୍ରକାରର ରୋଗ ଯାଞ୍ଚ କରାଯାଏ । ଏହି ଦୁଇଟି ପର୍ଯ୍ୟାୟରେ ସଫଳ ହୋଇଥିବା ପ୍ରାର୍ଥୀମାନଙ୍କୁ ହିଁ ଆଗକୁ ଲିଖିତ ପରୀକ୍ଷାରେ ସାମିଲ ହେବାର ସୁଯୋଗ ମିଳିବ । ଲିଖିତ ପରୀକ୍ଷାର ଫଳାଫଳ ଆଧାରରେ ମେରିଟ୍ ତାଲିକା ପ୍ରସ୍ତୁତ ହେବ ଓ ସେହି ଅନୁସାରେ ପ୍ରାର୍ଥୀମାନଙ୍କୁ ନିଯୁକ୍ତି ଦିଆଯିବ ।