କନକ ବ୍ୟୁରୋ: କୂଅ…ଗାଁ ଗାଁରେ, ଘରେ ଘରେ ଥିଲା । ଅବଶ୍ୟ ଆଜିକା ଆଧୁନିକ ଦୁନିଆରେ କୂଅର ବ୍ୟବହାର କମିଛି, କୂଅ ସଂଖ୍ୟା ବି କମିଛି । କିନ୍ତୁ ଆଜି ବି ଅନେକ ଅଂଚଳରେ କୂଅର ପାଣିକୁ ବ୍ୟବହାର କରୁଛନ୍ତି ଗାଁ ଲୋକେ । କେବଳ ଓଡ଼ିଶାରେ ନୁହେଁ ବରଂ ପୂରା ଭାରତ ବର୍ଷରେ କୂଅର ବ୍ୟବହାର ଆଜି ବି ହେଉଛି । ହେଲେ ଫ୍ରାନ୍ସର ଏମିତି ଏକ ଘଟଣା ସାମ୍ନାକୁ ଆସିଛି ଯାହାକୁ ନେଇ ପୂରା ବିଶ୍ବରେ ଚର୍ଚ୍ଚା ଚାଲିଛି । କାରଣ କୁହାଯାଉଛି, ସେଠାକାର କୂଅରେ ରହିଛି ଅନ୍ୟ ଗ୍ରହକୁ ରାସ୍ତା । ଖାଲି ଏତିକି ନୁହେଁ ବରଂ ସେହି କୂଅରେ ଯିଏ ଥରେ ପଶିଛି ସିଏ କେବେ ବାହାରକୁ ବାହାରିନି । ହେଲେ ସେହି କୂଅରେ ଅଛି କଣ ତାହାକୁ ନେଇ କିନ୍ତୁ ଚର୍ଚ୍ଚା ଥମିନି । 

Advertisment

ଏଇ କୂଅରେ ଅଛି ଅନ୍ୟ ଗ୍ରହକୁ ରାସ୍ତା
ଯିଏ ଥରେ ପଶିଛି, ଆଉ ବାହାରିନି
ଟୋନରିର ରହସ୍ୟମୟ କୂଅ
ଯେଉଁଠି କେବେ ବି ପାଣି ଶୁଖେନି

ଫ୍ରାନ୍ସର ଟୋନରିରେ ଏମିତି ଏକ କୂଅ ରହିଛି ଯାହା ଏବେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । କାରଣ ସେହି କୂଅରେ ନା କେବେ ପାଣି ଶୁଖୁଛି ନା ସେ କୂଅକୁ ଯିଏ ଯାଉଛି ସେଇଠୁ ବାହାରୁଛି । କିନ୍ତୁ ସେହି କୂଅକୁ ସ୍ଥାନୀୟ ଲୋକେ ପବିତ୍ର କୂଅର ମାନ୍ୟତା ଦେଇଛନ୍ତି ଏବଂ ତାହା ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି । କୁହାଯାଉଛି କି, କୂଅରେ ପ୍ରବଳ ମାତ୍ରାରେ ପାଣି ବାହାରୁଛି । ତାହା ପୁଣି ଆପେ ଆପେ । ତେଣୁ ସ୍ଥାନୀୟ ବାସିନ୍ଦାମାନେ ଏହି କୂଅ ପାଖରେ ବନ୍ଧ ବାନ୍ଧିଛନ୍ତି । ହେଲେ ଲୋକେ ଠିକ୍‌ରେ ଜାଣିନାହାନ୍ତି କି ସେ କୂଅ ତଳେ କଣ ଅଛି । ଯେଉଁ କାରଣ ଲାଗି କୂଅରେ ପ୍ରବେଶ କରୁଥିବା ବ୍ୟକ୍ତିବିଶେଷମାନେ ଗାଏବ ହେଉଛନ୍ତି ।

ଅନେକ ଲୋକଙ୍କର ଗଲାଣି ପ୍ରାଣ

କୂଅରେ ପ୍ରବେଶ କରିବା ପରେ ଅନେକ ଲୋକଙ୍କର ପ୍ରାଣ ଯାଇଛି । ହେଲେ ପ୍ରକୃତରେ କେତେ ଲୋକଙ୍କର ଜୀବନ ଯାଇଛି ତାହା ସଠିକରେ ଜଣାପଡିନି । ପ୍ରଥମଥର ଲାଗି ୧୯୦୮ ମସିହାରେ କୂଅରେ କଣ ଅଛି ତାହା ଜାଣିବାକୁ ଚେଷ୍ଟା କରାଯାଇଥିଲା । ଅବଶ୍ୟ ଏଥିରେ ସଫଳତା ମିଳିନଥିଲା । ପରବର୍ତ୍ତୀ ସମୟରେ ପୁଣି ଥରେ ୧୯୫୫ ଓ ୧୯୬୨ ମସିହାରେ ବି କୂଅରେ ପ୍ରବେଶ ପାଇଁ ଉଦ୍ୟମ କରାଯାଇଥିଲା ହେଲେ ସଫଳତା ମିଳିନଥିଲା । ପରବର୍ତ୍ତୀ ସମୟରେ ପୁଣି ଥରେ ୧୯୬୩ ମସିହାରେ କୂଅରେ ପ୍ରବେଶ କରିବା ପରେ ୨ ବ୍ୟକ୍ତିଙ୍କ ମୃତ୍ୟୁ ହୋଇଥିଲା । କିନ୍ତୁ ୧୯୭୪ ମସିହାରେ କୂଅରେ ପ୍ରବେଶ କରିଥିବା ବ୍ୟକ୍ତି ନିଖୋଜ ହେବା ପରେ ଚର୍ଚ୍ଚା ଜୋର ଧରିଥିଲା । ଶେଷରେ ୧୯୯୬ରେ ପୁଣି ଜଣଙ୍କର କୂଅରେ ପଶିବା ପରେ ମୃତ୍ୟୁ ହୋଇଥିଲା । ସେଇଥିଲାଗି ୨୦ ବର୍ଷ ପର୍ଯ୍ୟନ୍ତ କୂଅରେ ପ୍ରବେଶ ଉପରେ ପ୍ରତିବନ୍ଧକ ଲଗାଗଲା । 

ମୋଟ ଉପରେ କୂଅରେ ପ୍ରକୃତରେ କଣ ଅଛି ସେନେଇ କୌଣସି ସ୍ପଷ୍ଟ ସୂଚନା ମିଳିନାହିଁ । ହେଲେ କୂଅକୁ ନେଇ ରହସ୍ୟ ଅନେକ ଥିବା ସ୍ଥାନୀୟ ବାସିନ୍ଦା କହୁଥିବା ବେଳେ କେହି କେହି କହୁଛନ୍ତି ଏହି କୂଅରେ ଅନ୍ୟ ଗ୍ରହକୁ ରାସ୍ତା ଅଛି । ଯାହା ଚର୍ଚ୍ଚାକୁ ଆହୁରି ଖୋରାକ ଯୋଗାଇଛି ।