ମୁହଁରୁ ଭଦ୍ର , ଭିତରୁ ଭୟଙ୍କର : ଭିଡିଓ ଗେମ୍ ଖେଳିବାକୁ ଡାକି ୩୩ ପିଲାଙ୍କ ଜୀବନ ବରବାଦ କରିଥିବା ଦମ୍ପତି

କନକ ବ୍ୟୁରୋ : ଶୁକ୍ରବାର ଉତ୍ତରପ୍ରଦେଶର ବାନ୍ଦା ଜିଲ୍ଲା POCSO କୋର୍ଟ ଏକ ବଡ଼ ଏବଂ କଡ଼ା ନିଷ୍ପତ୍ତି ଶୁଣାଇଲେ । କାଠଗଡ଼ାରେ ଛିଡ଼ା ହୋଇଥିବା ଦମ୍ପତି ସ୍ବାମୀ ରାମଭବନ ଏବଂ ସ୍ତ୍ରୀ ଦୁର୍ଗାବତୀଙ୍କୁ ଫାଶୀ ଦଣ୍ଡାଦେଶ ଶୁଣାଗଲା । ମୁହଁରୁ ଅତି ଭଦ୍ର ଦେଖାଯାଉଥିବା ଏହି ଦମ୍ପତିଙ୍କ ଅପରାଧ ଏତେ ଜଘନ୍ୟ ଥିଲା ଯେ ଉତ୍ତରପ୍ରଦେଶ ସମେତ ପୂରା ଭାରତର ଛାତିକୁ ଦୋହଲାଇ ଦେଇଥିଲା । ଏହି ଦମ୍ପତି ଯେଉଁ କୁକର୍ମ କରିଥିଲେ ତାକୁ ଶୁଣିବା ପରେ ଜଜ୍ ମଧ୍ୟ ହତବାକ ହୋଇଯାଇଥିଲେ ଏବଂ ଏହି କେସକୁ ‘Rarest of Rare’ ରେ ଅନ୍ତର୍ଭୁକ୍ତ କରିଥିଲେ । ଇରିଗେସନ୍ ବିଭାଗରେ ଜୁନିୟର୍ ଇଞ୍ଜିନିୟର ରୂପେ କାମ କରୁଥିବା ରାମଭବନ ଏବଂ ତାଙ୍କ ସ୍ତ୍ରୀ ୩୩ ଜଣ ନାବାଳିକାଙ୍କ ସହ ଯୌନ ଶୋଷଣ କରି ଆସୁଥିଲେ । ଦୁହିଁଙ୍କ ଉପରେ ଅଭିଯୋଗ ଲାଗିଥିଲା ଯେ ୨୦୧୦ ରୁ ୨୦୨୦ ଭିତରେ ଏହି ଦମ୍ପତି ଛୋଟ ପିଲାମାନଙ୍କୁ ଭିଡ଼ିଓ ଗେମ୍ , ଟଙ୍କା , ଖେଳନା ଏବଂ ମୋବାଇଲରେ ଗେମ୍ ଖେଳିବାର ପ୍ରଲୋଭନ ଦେଖାଇ ପ୍ରଥମେ ଘରକୁ ନେଇଆସୁଥିଲେ । ତା’ପରେ ଆରମ୍ଭ ହେଉଥିଲା କୁକର୍ମର ଖେଳ । କୁନି ପିଲାଙ୍କୁ ନଗ୍ନ କରି ଯୌନ ଶୋଷଣ କରିବା ସହ ଆପତ୍ତିଜନକ ଭିଡିଓ ଉତ୍ତୋଳନ କରୁଥିଲେ ରାମଭବନ ଏବଂ ଦୁର୍ଗାବତୀ । ଏହି ଅଶ୍ଲୀଳ ଭିଡିଓକୁ ସେମାନେ ଡାର୍କ ୱେବରେ ବିକ୍ରି ମଧ୍ୟ କରୁଥିଲେ । 

ଆଗକୁ ପଢ଼ନ୍ତୁ : କେବେ ମମତା ପାଇଁ ଖେଳନାକୁ କରିଥିଲା ମା’ , ଏବେ କୋଟି କୋଟି ଟଙ୍କାରେ କିଣାହେବ ପଞ୍ଚ୍

୨୦୨୦ ରେ ସିବିଆଇ ଏହି ମାମଲାର ଯାଞ୍ଚ୍ ଆରମ୍ଭ କରିଥିଲେ । ଯାଞ୍ଚ୍ ବେଳେ ଘରୁ ଅନେକ ଅଶ୍ଲୀଳ ଭିଡିଓ , ଫଟୋ ଏବଂ ପେନଡ୍ରାଇଭ୍ ମିଳିଥିଲା । ଯେଉଁଥିରେ ୩୩ ରୁ ଅଧିକ କୋମଳମତୀ ପିଲାଙ୍କ ନଗ୍ନ ଭିଡ଼ିଓର ପ୍ରମାଣ ମିଳିଥିଲା । ଏହି ପ୍ରମାଣ ଦେଖିବା ପରେ କୋର୍ଟ ମଧ୍ୟ ଆଶ୍ଚର୍ଯ୍ୟ ହୋଇଯାଇଥିଲେ ଏବଂ ଉକ୍ତ ଘଟଣାକୁ ‘Rarest of Rare’ କେସ୍ ବୋଲି କହିଥିଲେ । କୋର୍ଟ କହିଥିଲେ ଯେ ଏଭଳି ଲୋକମାନେ କେବେ ବି ସୁଧୁରିବେ ନାହିଁ । କୋର୍ଟ ସରକାରଙ୍କୁ ଆଦେଶ ଦେଇଛନ୍ତି ଯେ ପୀଡ଼ିତ ପିଲାଙ୍କୁ ୧୦-୧୦ ଲକ୍ଷ ଟଙ୍କାର ଅନୁକମ୍ପା ରାଶି ଦିଆଯାଉ । ଏହା ସହ ଅଭିଯୁକ୍ତଙ୍କଠାରୁ ମିଳିଥିବା ଟଙ୍କା ମଧ୍ୟ ପୀଡ଼ିତ ପିଲାମାନଙ୍କୁ ବଣ୍ଟାଯାଉ ବୋଲି କହିଛନ୍ତି କୋର୍ଟ । ଛୋଟ ପିଲାମାନଙ୍କ ସହ ହେଉଥିବା ଅପରାଧ ବିରୁଦ୍ଧରେ ଏହି ରାୟ ଏକ ବଡ଼ ଏବଂ କଡ଼ା ସନ୍ଦେଶ । 

ଦମ୍ପତି ପର୍ଣ୍ଣୋଗ୍ରାଫି ଆପରେ ଏହି ଭିଡିଓକୁ ବିକ୍ରି କରୁଥିଲେ । ପିଲାଙ୍କ ସହିତ ଯୌନ ଶୋଷଣ ସହିତ କ୍ରୁର ବ୍ୟବହାର ଦେଖାଉଥିଲେ । ଯେଉଁ କାରଣରୁ କୁନି କୁନି ପିଲାଙ୍କ ଗୁପ୍ତାଙ୍ଗରେ ଆଘାତ ମଧ୍ୟ ହୋଇଥିଲା । କିଛି ପିଲାଙ୍କୁ ହସ୍ପିଟାଲରେ ବର୍ଷ ବର୍ଷ ଧରି ରହିବାକୁ ପଡ଼ିଥିଲା । ଅନେକ ପୀଡ଼ିତଙ୍କୁ ଆଖିରେ ଆଘାତ ହେବା ସହ ମାନସିକ ପୀଡ଼ା ହେଲା । କିନ୍ତୁ ୨୦୨୦ରେ ଯେତେବେଳେ ଅନ୍ତର୍ଜାତୀୟ ସ୍ତରରେ ଶିଶୁ ପର୍ଣ୍ଣୋଗ୍ରାଫି ଉପରେ କଡ଼ା ନଜର ରଖାଯାଉଥିଲା, ସେତେବେଳେ ଭାରତର ଶିଶୁମାନଙ୍କର ପର୍ଣ୍ଣୋଗ୍ରାଫି ଭିଡିଓ ସାମ୍ନାକୁ ଆସିଥିଲା ଯାହାକୁ ନେଇ ଏଜେନ୍ସିଗୁଡ଼ିକୁ ସତର୍କ ମଧ୍ୟ କରାଯାଇଥିଲା । କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ଏହି ସୂଚନାକୁ ଗମ୍ଭୀରତାର ସହ ନେଇ ତଦନ୍ତ ଆରମ୍ଭ କରିଥିଲା । ଯାହା ଫଳରେ ଦମ୍ପତିଙ୍କ ଅପରାଧିକ କାର୍ଯ୍ୟକଳାପର ପର୍ଦ୍ଦାଫାସ ହୋଇଥିଲା । ସିବିଆଇ ରାମଭାବନ ଏବଂ ତାଙ୍କ ପତ୍ନୀଙ୍କ ବିରୁଦ୍ଧରେ ଏକ ଚାର୍ଜସିଟ୍ ଦାଖଲ କରି ଗିରଫ କରିଥିଲା ।