ମଲ୍ଟିପ୍ଲେକ୍ସକୁ ନେଇ ସୁପ୍ରିମକୋର୍ଟଙ୍କ ଚେତାବନୀ , ଚଢ଼ା ଦର ନକମିଲେ ଖାଲି ହୋଇଯିବ ସିନେମା ହଲ୍

କନକ ବ୍ୟୁରୋ : ସୁପ୍ରିମକୋର୍ଟ ସୋମବାର ମଲ୍ଟିପ୍ଲେକ୍ସରେ ଟିକେଟ୍ ଏବଂ ଖାଦ୍ୟପେୟର ଅଧିକ ମୂଲ୍ୟକୁ ନେଇ ଗଭୀର ଅସନ୍ତୋଷ ପ୍ରକାଶ କରିଛନ୍ତି । କୋର୍ଟ କହିଛନ୍ତି ଯେ ଯଦି ଏହିପରି ଚାଲେ, ତେବେ ସିନେମା ହଲ୍ ଖାଲି ହୋଇଯିବ । ଜଷ୍ଟିସ ବିକ୍ରମ ନାଥ ଏବଂ ଜଷ୍ଟିସ ସନ୍ଦୀପ ମେହେତାଙ୍କ ବେଞ୍ଚ ମଲ୍ଟିପ୍ଲେକ୍ସ ଆସୋସିଏସନ୍‌ ଅଫ ଇଣ୍ଡିଆ ଏବଂ ଅନ୍ୟମାନଙ୍କ ଆବେଦନ ଶୁଣାଣି କରିବା ସମୟରେ ଏହି ମନ୍ତବ୍ୟ ଦେଇଛନ୍ତି । ଏହି ମାମଲା କର୍ଣ୍ଣାଟକ ହାଇକୋର୍ଟଙ୍କ ସେହି ନିଷ୍ପତ୍ତି ସହ ଜଡିତ, ଯେଉଁଥିରେ ଟିକେଟ୍ ମୂଲ୍ୟ ୨୦୦ ଟଙ୍କା ପର୍ଯ୍ୟନ୍ତ ସୀମିତ କରିବାକୁ ନିର୍ଦ୍ଦେଶ ଦିଆଯାଇଥିଲା ।

ଶୁଣାଣି ସମୟରେ ଜଷ୍ଟିସ ନାଥ କହିଥିଲେ ଯେ 'ଆପଣ ୧୦୦ ଟଙ୍କାରେ ପାଣି ବୋତଲ ଏବଂ ୭୦୦ ଟଙ୍କାରେ କଫି ନିଅନ୍ତି ।' ଏହା ଉପରେ ମଲ୍ଟିପ୍ଲେକ୍ସ ଆସୋସିଏସନ୍‌ର ଓକିଲ ମୁକୁଲ ରୋହତଗୀ କହିଥିଲେ ଯେ 'ତାଜ ହୋଟେଲ ମଧ୍ୟ ୧୦୦୦ ଟଙ୍କାରେ କଫି ଦିଏ, ଆପଣ ସେଠାରେ ଦାମ ସ୍ଥିର କରିବେ କି ?' ଉତ୍ତରରେ ଜଷ୍ଟିସ ନାଥ କହିଥିଲେ ଯେ 'ସିନେମା ପୂର୍ବରୁ ହିଁ ଅବନତି ଦିଗରେ ଗତି କରୁଛି, ଯଦି ଦାମ କମ ନକରାଯାଏ ତେବେ ଲୋକେ ଆସିବା ବନ୍ଦ କରିଦେବେ ।' ସେ କହିଥିଲେ ଯେ ସିନେମାର ଆନନ୍ଦ ପ୍ରତ୍ୟେକ ବର୍ଗର ଲୋକଙ୍କୁ ମିଳିବା ଉଚିତ, କେବଳ ଧନୀମାନଙ୍କ ପାଇଁ ସୀମିତ ରହିବା ଉଚିତ ନୁହେଁ ।
ଯେତେବେଳେ ରୋହତଗୀ କହିଥିଲେ ଯେ 'ଯଦି ଲୋକେ ମଲ୍ଟିପ୍ଲେକ୍ସ ଯିବାକୁ ଚାହୁନାହାନ୍ତି ତେବେ ନର୍ମାଲ ହଲକୁ ଯାଆନ୍ତୁ', ତେବେ କୋର୍ଟ ଉତ୍ତର ଦେଇଥିଲେ ଯେ 'ଏବେ ନର୍ମାଲ ହଲ୍ ବାକି ଅଛି କେଉଁଠି ।' କୋର୍ଟ କହିଥିଲେ ଯେ ଟିକେଟ୍ ମୂଲ୍ୟ ୨୦୦ ଟଙ୍କା ନିର୍ଦ୍ଧାରଣ କରିବା ସଠିକ୍ ଦିଗରେ ନିଆଯାଇଥିବା ଏକ ପଦକ୍ଷେପ, ଯାହାଦ୍ୱାରା ଲୋକେ ଥିଏଟରକୁ ଫେରିବେ ।

ଅଧିକ ପଢ଼ନ୍ତୁ--ହଜିଲା ପୁଅର ଫୋଟ ଧରି ଗାଁ ଗାଁ ବୁଲି ଖୋଜୁଛି ଅସହାୟ ବାପା

କର୍ଣ୍ଣାଟକ ହାଇକୋର୍ଟ ପୂର୍ବରୁ ମଲ୍ଟିପ୍ଲେକ୍ସଗୁଡ଼ିକୁ ପ୍ରତ୍ୟେକ ଟିକେଟର ବିବରଣୀ ଏବଂ ଅଡିଟ୍ ରିପୋର୍ଟ ରଖିବାକୁ ନିର୍ଦ୍ଦେଶ ଦେଇଥିଲେ, ଯାହା ଦ୍ୱାରା ଭବିଷ୍ୟତରେ ରିଫଣ୍ଡ ଦିଆଯାଇପାରିବ । ଏହା ଉପରେ ସୁପ୍ରିମକୋର୍ଟ ବର୍ତ୍ତମାନ ରୋକ ଲଗାଇଛନ୍ତି ଏବଂ ନୋଟିସ ଜାରି କରିଛନ୍ତି । କୋର୍ଟ କହିଛି ଯେ ବର୍ତ୍ତମାନ ମଲ୍ଟିପ୍ଲେକ୍ସଗୁଡ଼ିକୁ ଆଶ୍ୱସ୍ତି ଦିଆଯାଉଛି, କିନ୍ତୁ ଏହା ନିଶ୍ଚିତ କରିବାକୁ ହେବ ଯେ ସାଧାରଣ ଦର୍ଶକଙ୍କୁ ଲୁଟର ଶିକାର ନକରାଯାଉ ।ସିନେମାଘରଗୁଡ଼ିକର ଅବସ୍ଥା ଖରାପ ହେଉଛି । ମାତ୍ରାଧିକ ଟିକେଟ ଦର ପାଇଁ ଲୋକ ଆଉ ହଲକୁ ଯିବାକୁ ଇଚ୍ଛା କରୁନାହାନ୍ତି । ଯଦି ମୂଲ୍ୟ ନକମାଯାଏ, ତେବେ ଥିଏଟରଗୁଡ଼ିକ ଧିରେ ଧିରେ ଖାଲି ହୋଇଯିବେ । ଲୋକମାନଙ୍କୁ ସୁଲଭ ମନୋରଞ୍ଜନର ସୁବିଧା ମିଳିବା ଉଚିତ । କୋର୍ଟ କର୍ଣ୍ଣାଟକ ଫିଲ୍ମ ଚାମ୍ବର ଅଫ୍ କମର୍ସ ଏବଂ ଅନ୍ୟାନ୍ୟ ପକ୍ଷମାନଙ୍କୁ ଚାରି ସପ୍ତାହ ମଧ୍ୟରେ ସେମାନଙ୍କର ଜବାବ ଦାଖଲ କରିବାକୁ ନୋଟିସ୍ ଜାରି କରିଛନ୍ତି ।