ସୁପ୍ରିମକୋର୍ଟରେ ଆରାବଳୀ ଶୁଣାଣି; ଜାନୁଆରି ୨୧ରେ ପରବର୍ତ୍ତୀ ଶୁଣାଣି

କନକ ବ୍ୟୁରୋ: ଆରାବଳୀ ବିବାଦ ଭିତରେ ସୁପ୍ରିମକୋର୍ଟରୁ ଆସିଛି ବଡ଼ ଖବର । ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି ଯେ ଆରାବଳୀ ପାହାଡ଼ ସମ୍ପର୍କରେ ନଭେମ୍ବର ୨୦ ତାରିଖରେ ଦିଆଯାଇଥିବା ତାଙ୍କର ନିଜ ନିର୍ଦ୍ଦେଶ ପରବର୍ତ୍ତୀ ଶୁଣାଣି ପର୍ଯ୍ୟନ୍ତ କାର୍ଯ୍ୟକାରୀ ହେବ ନାହିଁ। କୋର୍ଟ ପରବର୍ତ୍ତୀ ଶୁଣାଣି ପାଇଁ ଜାନୁଆରୀ ୨୧ ତାରିଖ ଧାର୍ଯ୍ୟ କରିଛନ୍ତି। ଆଉ ସେପର୍ଯ୍ୟନ୍ତ ସ୍ଥିତାବସ୍ଥା ବଜାୟ ରହିବ ଏବଂ ସମସ୍ତ ଗୁରୁତ୍ୱପୂର୍ଣ୍ଣ ଦିଗଗୁଡ଼ିକୁ ବିସ୍ତୃତ ଭାବରେ ବିଚାର କରାଯିବ ବୋଲି କହିଛନ୍ତି ସୁପ୍ରିମକୋର୍ଟ।

ଆହୁରି ପଢ଼ନ୍ତୁ : ନୂଆବର୍ଷରେ ଏହି ୭ଟି ଗୁରୁତ୍ୱପୂର୍ଣ୍ଣ ମାମଲା ଉପରେ ରହିବ ସୁପ୍ରିମକୋର୍ଟଙ୍କ ନଜର

ଏହାସହିତ ସୁପ୍ରିମକୋର୍ଟ ଆରାବଳୀ ପର୍ବତମାଳାର ପରିଭାଷା ବିଷୟରେ ଗମ୍ଭୀର ଚିନ୍ତା ପ୍ରକାଶ କରିଛନ୍ତି । କୋର୍ଟ କହିଛନ୍ତି ଯେ, ନଭେମ୍ବର ୨୦ ତାରିଖର ନିର୍ଦ୍ଦେଶକୁ କାର୍ଯ୍ୟକାରୀ କରିବା ପୂର୍ବରୁ ଏକ ନିରପେକ୍ଷ ଏବଂ ସ୍ୱାଧୀନ ସମୀକ୍ଷା ଆବଶ୍ୟକ। ଆରାବଳୀ ମାମଲାର ଶୁଣାଣି ସମୟରେ ସିଜେଆଇ କହିଥିଲେ ଯେ ନଭେମ୍ବର ୨୦ ତାରିଖର ଆଦେଶ କାର୍ଯ୍ୟକାରୀ କରିବା ପୂର୍ବରୁ ଏକ ନିରପେକ୍ଷ ଏବଂ ବ୍ୟାପକ ରିପୋର୍ଟ ଜରୁରୀ। ସେ ଆରାବଳୀ ପାହାଡ଼ ଏବଂ ପର୍ବତମାଳାର ପରିଭାଷା, ୫୦୦ ମିଟରରୁ ଅଧିକ ଦୂରତାର ସ୍ଥିତି, ଖଣି ନିଷେଧ କିମ୍ବା ଅନୁମତି ଏବଂ ଏହାର ପରିସର ସମ୍ପର୍କରେ ଗମ୍ଭୀର ଅସ୍ପଷ୍ଟତା ସମାଧାନ କରିବାର ଆବଶ୍ୟକତା ଉପରେ ଆଲୋକପାତ କରିଥିଲେ।