କନକ ବ୍ୟୁରୋ:  ବସଷ୍ଟାଣ୍ଡ ହେଉ କିମ୍ବା ରେଳଷ୍ଟେଷନ, ଟ୍ରେନ ଆଉ ବସକୁ ଅପେକ୍ଷା କରିବା ବହୁତ କଷ୍ଟ ହୋଇଥାଏ । ଆଉ ଟାଇମପାସ କରିବା ପାଇଁ ଯାତ୍ରୀ ମାନେ ବିଭିନ୍ନ ପ୍ରକାର ଶୁଖିଲା ଖାଦ୍ୟ କିମ୍ବା ଫଳ ଖାଇଥାନ୍ତି । ଏହି ଫଳ ଭିତରେ ପାଣିଫଳ ଅନ୍ୟତମ । ପାଣିଫଳ ଛଡାଇ ଖାଉଖାଉ କେତେବେଳେ ସମୟ ଗଡିଯାଏ ତାହା ଜଣା ପଡ଼ିନଥାଏ । ସେଥିପାଇଁ ଏହିଭଳି ଜନଗହଳି ପୁର୍ଣ୍ଣ ସ୍ଥାନ ମାନଙ୍କରେ ଛୋଟ ଛୋଟ ପାଣିଫଳ ବ୍ୟବସାୟୀ ମାନେ ପସରା ମେଲାଇ ପାଣିଫଳ ପାଣିଫଳ ଡାକ ପକାଇଥାନ୍ତି । ଆଉ ଏହି ପାଣୀଫଳ ଚାଷ କରି ବେଶ ସ୍ୱାବଲମ୍ବୀ ହୋଇପାରିଛନ୍ତି ଦୁଇ ଜଣ ଯୁବଚାଷି ।  

Advertisment

 ଉତ୍ତର ବାଲେଶ୍ୱରର ଅନ୍ୟଏକ ଲାଭ ଦାୟକ ଫସଲ ହେଉଛି ପାଣିଫଳ ତଥା ପାଣି ସିଙ୍ଗଡ଼ା ଚାଷ । ବାଲେଶ୍ୱର ଜିଲ୍ଲାର ହଳଦିପଦା, ଅମର୍ଦ୍ଦାରୋଡ, ଲଙ୍ଗଳେଶ୍ୱର ଅଞ୍ଚଳରେ ଏହି ଚାଷ ବହୁଳ ପରିମାଣରେ ହୋଇଥାଏ । ବାଲିଆପାଳ ବ୍ଲକ ଲଙ୍ଗଳେଶ୍ୱର-ପଞ୍ଚୁପାଲି ରାସ୍ତା ପାର୍ଶ୍ବରେ ଥିବା ନୟଯୋଡିର ପାଖାପାଖି ୫ ଏକର ଜାଗାରେ ହୋଇଛି ପାଣିସିଙ୍ଗଡ଼ା ଚାଷ । ଏହି ଚାଷକରି ପଞ୍ଚୁପାଲିର ଦୁଇଜଣ ଚାଷୀ ଗଦାଧର ଏବଂ ମୁରଲିଧର ଭଲ ରୋଜଗାର କରୁଛନ୍ତି । ଜମି ଲିଜ ଆକାରରେ ନେଇ ମାସକୁ ପାଖାପାଖି ୫୦ ରୁ ୬୦ ହଜାର ଟଙ୍କା ରୋଜଗାର କରୁଛନ୍ତି । ଅମଳ ହେଉଥିବା ପାଣିସିଙ୍ଗଡ଼ା ସ୍ଥାନୀୟ ବଜାର ସହିତ ସ୍ଥାନୀୟ ବ୍ୟବସାୟୀଙ୍କୁ ବିକ୍ରି କରୁଛନ୍ତି । ବ୍ୟବସାୟୀ ମାନେ ଏହି ଫଳକୁ ଜଳେଶ୍ୱର, ବାଲେଶ୍ୱର, ଭଦ୍ରକ, ମୟୂରଭଞ୍ଜ ଅଞ୍ଚଳରେ ବିକ୍ରି କରନ୍ତି । କେଜି ପିଛା ୧୫ ରୁ ୨୦ ଟଙ୍କାରେ ନେଇ ୩୦ ରୁ ୪୦ ଟଙ୍କାରେ ବିକ୍ରି କରନ୍ତି ବ୍ୟବସାୟୀ ।

ଅଧିକ ପଢନ୍ତୁ : ଶୋଷ ମେଣ୍ଟାଉଛି ଚୁଆ ପାଣି ; ବାରମ୍ବାର ଅଭିଯୋଗ ପରେ ବି ଶୁଣୁନି ପ୍ରଶାସନ

 ମୁରଲିଧର ଏବଂ ଗଦାଧର ପାଣିଫଳ ଚାଷ ପାଇଁ ବାଲେଶ୍ୱର ହଳଦିପଦାରୁ ଚାରା ଆଣିଥିଲେ । ଏହି ଚାଷ ପାଇଁ  ଜମିରେ ୩ ରୁ ୪ ଫୁଟ୍‌ ପାଣି ରହିବା ଆବଶ୍ୟକ । ଚାଷ ଠାରୁ ଅମଳ ପାଖାପାଖି ୩ ମାସ ସମୟ ଲାଗିଥାଏ । ଅକ୍ଟୋବର ମାସରୁ ଜାନୁଆରି ମାସ ପର୍ଯ୍ୟନ୍ତ ଏହି ଫଳ ଅମଳ ହୋଇଥାଏ । ୧ ଏକର ଜମିରୁ ପାଖାପାଖି ୧୭୫ କ୍ବିଣ୍ଟାଲ ପାଣିସିଙ୍ଗଡ଼ା ଅମଳ ହୋଇଥାଏ । ଯାହାର କ୍ବିଣ୍ଟାଲ ପ୍ରତି ମୂଲ୍ୟ ୧୫ ଶହରୁ ୨ ହଜାର ।  ଗଦାଧର ଏବଂ ମୁରଲିଧରଙ୍କ ଭଳି ଅନ୍ୟମାନେ ମଧ୍ୟ ଏହି ଚାଷ କରି ବେଶ ଲାଭବାନ ହୋଇପାରିବେ ।