ବାହାରିଲା ରେଲୱେ ଗ୍ରୁପ୍ ଡି ଚାକିରି : ଆଶାୟୀଙ୍କ ପାଇଁ ବଡ଼ ସୁଯୋଗ , ଆଜି ହିଁ କରନ୍ତୁ ଆବେଦନ

କନକ ବ୍ୟୁରୋ : ରେଳବାଇ ନିଯୁକ୍ତି ବୋର୍ଡ ପକ୍ଷରୁ ଗ୍ରୁପ୍ ଡି ପଦବୀ ପାଇଁ ୨୧,୯୯୭ଟି ପୋଷ୍ଟ୍ ବାହାରିଛି । ଯାହାର ଆବେଦନ ପ୍ରକ୍ରିୟା ଆରମ୍ଭ ହୋଇଯାଇଛି । ଏଥିରେ ଦଶମ ଶ୍ରେଣୀ ପାସ୍ କରିଥିବା ପ୍ରାର୍ଥୀମାନେ ଆବେଦନ କରିପାରିବେ । ଆବେଦନ ଫର୍ମର ସର୍ବାଧିକ ପ୍ରବେଶ ସୁନିଶ୍ଚିତ କରିବା ପାଇଁ ଏହି ପ୍ରକ୍ରିୟାକୁ ସମ୍ପୂର୍ଣ୍ଣ ଅନଲାଇନ୍ କରାଯାଇଛି । ପ୍ରାର୍ଥୀମାନଙ୍କୁ ଫର୍ମ ପୂରଣ କରିବା ସମୟରେ ସେମାନଙ୍କର ଆଧାର ଏବଂ ଶିକ୍ଷାଗତ ଡକ୍ୟୁମେଣ୍ଟ ସମ୍ପର୍କରେ ସଠିକ୍ ସୂଚନା ନିଶ୍ଚିତ କରିବାକୁ ପରାମର୍ଶ ଦିଆଯାଇଛି । ଆଗ୍ରହୀ ପ୍ରାର୍ଥୀମାନେ ଅଫିସିଆଲ୍ ୱେବସାଇଟ୍ rrbapply.gov.in କୁ ଯାଇ ଅନଲାଇନରେ ଆବେଦନ କରିପାରିବେ । ତେବେ ଆବେଦନ ପ୍ରକ୍ରିୟା ଜାନୁଆରୀ ୩୧ ତାରିଖରେ ଆରମ୍ଭ ହୋଇଥିଲା ଏବଂ ଫର୍ମ ଦାଖଲ କରିବାର ଶେଷ ତାରିଖ ୨ ମାର୍ଚ୍ଚ, ୨୦୨୬ ପର୍ଯ୍ୟନ୍ତ ରହିଛି । ଫିସ୍ ଜମା କରିବାର ଶେଷ ତାରିଖ ହେଉଛି ୪ ମାର୍ଚ୍ଚ, ୨୦୨୬ । ଆବେଦନ ଫର୍ମକୁ କରେକ୍ସନ କରିବାର ୱିଣ୍ଡୋ ୫ ମାର୍ଚ୍ଚରୁ ୧୪ ମାର୍ଚ୍ଚ ପର୍ଯ୍ୟନ୍ତ ଖୋଲା ରହିବ ।

ଆଗକୁ ପଢ଼ନ୍ତୁ : ଦୁବାଇରେ ଚାକିରି କରିବାକୁ ଚାହୁଛନ୍ତି କି? ଜାଣନ୍ତୁ ଦରକାର କେଉଁ ଭିସା? ମାତ୍ର ଏତିକି ଟଙ୍କାରେ ହୋଇଯିବ କାମ

ପ୍ରାର୍ଥୀମାନେ କେବଳ ଗୋଟିଏ ରେଳ ଜୋନ୍ ପାଇଁ ଆବେଦନ କରିପାରିବେ । ଗୋଟିଏରୁ ଅଧିକ ଜୋନ୍ ଚୟନ କଲେ ସେମାନଙ୍କର ଆବେଦନ ଖାରଜ ହୋଇଯିବ । ତଥାପି ଗୋଟିଏ ଜୋନ୍ ମଧ୍ୟରେ ଏକାଧିକ ପଦବୀ ପାଇଁ ପୃଥକ ଫର୍ମ ପୂରଣ କରିବାର ଆବଶ୍ୟକତା ନାହିଁ । ପଦବୀ ପସନ୍ଦ ଗୋଟିଏ ଫର୍ମରେ ସୂଚିତ ହେବା ଆବଶ୍ୟକ । ଗୋଟିଏ ଜୋନ୍ ଚୟନ କରିସାରିବା ପରେ ପରିବର୍ତ୍ତନ କରିବାର କୌଣସି ବିକଳ୍ପ ରହିବ ନାହିଁ । ଏଥିପାଇଁ ସର୍ବନିମ୍ନ ବୟସ ୧୮ ବର୍ଷ ଏବଂ ସର୍ବାଧିକ ବୟସ ୩୩ ବର୍ଷ । ବୟସର ଗଣନା ୧ ଜାନୁଆରୀ ୨୦୨୬ ରୁ କରାଯିବ । ଓବିସି ବର୍ଗ ପାଇଁ ୩ ବର୍ଷ ଏବଂ ଏସସି/ଏସଟି ବର୍ଗ ପାଇଁ ୫ ବର୍ଷ ଛାଡ଼ ଦିଆଯିବ । ନିଯୁକ୍ତି ପ୍ରକ୍ରିୟା ଏକ କମ୍ପ୍ୟୁଟର ଆଧାରିତ ପରୀକ୍ଷା (CBT) ସହିତ ଆରମ୍ଭ ହେବ । ସଫଳ ପ୍ରାର୍ଥୀମାନଙ୍କୁ ଶାରୀରିକ ଦକ୍ଷତା ପରୀକ୍ଷା (PET) ପାଇଁ ଡକାଯିବ, ତା’ପରେ ଡକ୍ୟୁମେଣ୍ଟ ଯାଞ୍ଚ ଏବଂ ଡାକ୍ତରୀ ପରୀକ୍ଷା ହେବ । 

CBT ପରୀକ୍ଷା ୯୦ ମିନିଟ୍ ଅବଧିର ହେବ ଏବଂ ଏଥିରେ ୧୦୦ଟି ପ୍ରଶ୍ନ ରହିବ । ସାଧାରଣ ବିଜ୍ଞାନ ଏବଂ ଗଣିତରୁ ୨୫ ଟି, ରିଜନିଂରୁ ୩୦ଟି ଏବଂ କରେଣ୍ଟ ଆଫେୟାର୍ସରୁ ୨୦ଟି ପ୍ରଶ୍ନ ରହିବ । PETରେ ପୁରୁଷମାନଙ୍କୁ ୩୫ କିଲୋଗ୍ରାମ ଓଜନ ବୋହି ୧୦୦ ମିଟର ଚାଲିବାକୁ ପଡ଼ିବ ଏବଂ ନିର୍ଦ୍ଧାରିତ ସମୟ ମଧ୍ୟରେ ୧୦୦୦ ମିଟର ଦୌଡ଼ିବାକୁ ପଡ଼ିବ। ମହିଳାମାନଙ୍କ ପାଇଁ ଓଜନ ଏବଂ ସମୟ ସୀମା ପୂରା ଭିନ୍ନ । ଯୋଗ୍ୟ ପ୍ରାର୍ଥୀମାନଙ୍କୁ ଲେବଲ୍-୧ ଅନ୍ତର୍ଗତ ୧୮,୦୦୦ ଟଙ୍କା ଦରମା ମିଳିବ । ଜେନେରାଲ୍ , OBC ଏବଂ EWS ବର୍ଗ ପାଇଁ ଫିସ୍ ୫୦୦ ଟଙ୍କା ରଖାଯାଇଛି ଯେଉଁଥିରୁ ପରୀକ୍ଷା ଦେବା ସମୟରେ ୪୦୦ ଟଙ୍କା ଫେରସ୍ତ କରାଯିବ । SC, ST ଏବଂ ମହିଳାଙ୍କ ପାଇଁ ଫିସ୍ ୨୫୦ ଟଙ୍କା ରଖାଯାଇଛି ଯାହା ପରୀକ୍ଷା ଦେବା ସମୟରେ ସମ୍ପୂର୍ଣ୍ଣ ଫେରସ୍ତ କରାଯିବ ।