ଲୋକଙ୍କ ଠାରୁ ମୋଟା ଅଙ୍କର ଜରିମାନା; ପୁଲିସ ଗାଡ଼ିକୁ କ’ଣ ସାତ ଖୁନ୍ ମାଫ୍ ?

କନକ ବ୍ୟୁରୋ : ପ୍ରଦୂଷଣ ସାର୍ଟିଫିକେଟ ଯନ୍ତ୍ରଣାରେ ଧନ୍ଦି ହେଉଛନ୍ତି ସାଧାରଣ ଲୋକେ । ପ୍ରଦୂଷଣ ସାର୍ଟିଫିକେଟ ନଥିଲେ ମାଫ୍ ମିଳିବନି ବୋଲି ଚେତାଇ ଦେଇଛନ୍ତି ସରକାର । ହେଲେ ଏହି ନିୟମର ଧଜିଆ ଉଡାଇଛି ପୁଲିସ ବିଭାଗ । ଅନ୍ୟପଟେ ଲୋକଙ୍କ ପାଇଁ ଆନ୍ଦୋଳନକୁ ଓହ୍ଲାଇଛି ଛାତ୍ର ବିଜେଡି ।

ଅଧିକ ପଢ଼ନ୍ତୁ : ବଢୁଛି ପ୍ରଦୂଷଣ ; ଜାରି ହେଲା କଟକଣା

ଲୋକଙ୍କ ଠାରୁ ମୋଟା ଅଙ୍କର ଜରିମାନା । ପୁଲିସ ଗାଡ଼ିକୁ କ’ଣ ସାତ ଖୁନ୍ ମାଫ୍ ?

OD05AG 5376
OD05BM 6435
OD05BE 2183
OD05BM 5835

ଏହି ନମ୍ବର ଗାଡି ଗୁଡିକର ଦୀର୍ଘ ୨ରୁ ୩ ବର୍ଷ ହେବ ନାହିଁ ପ୍ରଦୂଷଣ ସାର୍ଟିଫିକେଟ । ନା ଏହି ଗାଡ଼ି ନମ୍ବରରେ କେବେ ଚାଲାଣ କଟିଛି ନା ଫାଇନ୍ ଆଦାୟ କରିଛନ୍ତି ସରକାର । କାରଣ ଗାଡିରେ ଲାଗିଛି ଓଡ଼ିଶା ପୁଲିସର ଟ୍ୟାଗ୍ । ବିଡମ୍ବନାର ବିଷୟ, ଚେକିଂ ପାଇଁ ଏହି ଗାଡିକୁ ସାଥୀରେ ଧରି ଯାଉଛି ପରିବହନ ବିଭାଗ । ବିଭାଗୀୟ ଅଧିକାରୀ ଜାଣିଛନ୍ତି ଗାଡ଼ିରେ ପ୍ରଦୂଷଣ ସାର୍ଟିଫିକେଟ ନାହିଁ ହେଲେ ଫାଇନ୍ କାଟିବାକୁ କେବେ ସାହସ ଜୁଟାଇ ପାରିନାହାନ୍ତି । ଅନ୍ୟପଟେ ସାଧାରଣ ଲୋକଙ୍କ ଗାଡିରେ ବିଭିନ୍ନ ଆଳରେ ମନଇଚ୍ଛା ଫାଇନ୍ କାଟୁଛି ପରିବହନ ବିଭାଗ । ଯାହାକୁ ନେଇ ସାଧାରଣରେ ଅସନ୍ତୋଷ ଦେଖାଦେଇଛି । ପ୍ରଶ୍ନ ଉଠୁଛି, ସାଧାରଣ ଲୋକଙ୍କ ଗାଡ଼ି ପାଇଁ ଗୋଟିଏ ନିୟମ, ପୁଲିସ ଗାଡ଼ି ପାଇଁ କ’ଣ ଅଲଗା ନିୟମ ?

ପ୍ରଦୂଷଣ ସାର୍ଟିଫିକେଟ ଓ ଫାଇନ୍‌କୁ ନେଇ ଲୋକଙ୍କ ମଧ୍ୟରେ ଅସନ୍ତୋଷ ଭିତରେ ଆଜି ଆନ୍ଦୋଳନକୁ ଓହ୍ଲାଇଛି ବିଜେଡି । ଭୁବନେଶ୍ୱର ଆରଟିଓ-୧ ସାମ୍ନାରେ ଅଭିନବ ଢଙ୍ଗରେ ଆନ୍ଦୋଳନ କରି ଅଧିକାରୀଙ୍କୁ ଗଛ ବାଣ୍ଟିଛି ବିଜେଡିର ଛାତ୍ର ଶାଖା । ପ୍ରଦୂଷଣ କରୁଥିବା ବଡ଼ ବଡ଼ କମ୍ପାନିକୁ ଜରିମାନା ଛାଡ କରି ସାଧାରଣ ଗାଡି ଚାଳକଙ୍କୁ ହଇରାଣ କରାଯାଉଥିବାର ଅଭିଯୋଗ ଆଣିଛି ଦଳ । ବେଆଇନ ଭାବେ ଜରିମାନା ଆଦାୟ କଲେ ରାଜ୍ୟବ୍ୟାପୀ ଆନ୍ଦୋଳନ ସହ ଓଡ଼ିଶା ବନ୍ଦର ଡାକରା ଦେଇଛି ବିଜେଡି ।

ପ୍ରଦୂଷଣ ସାର୍ଟିଫିକେଟ ଫାଇନ ମାମଲା ହାଇକୋର୍ଟରେ ପହଞ୍ଚିଛି । ୨ ସପ୍ତାହ ମଧ୍ୟରେ ରାଜ୍ୟ ସରକାର ଓ ପରିବହନ କମିଶନରଙ୍କୁ ଜବାବ ମାଗିଛନ୍ତି କୋର୍ଟ ।