ସଚିବସ୍ତରୀୟ ବୈଠକରେ ବଡ଼ ନିଷ୍ପତ୍ତି : ଜୁନ୍ ୨୦୨୬ ସୁଦ୍ଧା ୬୫ ହଜାର ସରକାରୀ ନିଯୁକ୍ତି ଟାର୍ଗେଟ୍

କନକ ବ୍ୟୁରୋ : ୬୫ ହଜାର ଆଶାୟୀଙ୍କୁ ମିଳିବ ନିଯୁକ୍ତି । ଜୁନ ମାସ ସୁଦ୍ଧା ଏହି ନିଯୁକ୍ତି ମିଳିବ । ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ବସିଥିବା ସଚିବସ୍ତରୀୟ ବୈଠକରେ ଏହି ନିଷ୍ପତ୍ତି ନିଆଯାଇଛି । ବୈଠକରେ ମୁଖ୍ୟ ସଚିବ ବିଭିନ୍ନ ବିଭାଗରେ ଖାଲିଥିବା ପଦବି ପୂରଣ ନେଇ ପଦକ୍ଷେପ ନେବାକୁ କହିଛନ୍ତି । ଜୁନ୍ ୨୦୨୬ ସୁଦ୍ଧା ୬୫ ହଜାର ସରକାରୀ ନିଯୁକ୍ତି ଟାର୍ଗେଟ୍ ପୂରଣ କରିବାକୁ କହିଛନ୍ତି ।

 ନୂତନ ସରକାର ଆସିବା ପରେ ବିଭିନ୍ନ ବିଭାଗ ଦ୍ବାରା ନିଯୁକ୍ତି ପ୍ରକ୍ରିୟାରେ ୩୯ ହଜାର ୫୦୦ଜଣଙ୍କୁ ନିଯୁକ୍ତି ଦିଆଯାଇଛି । ଆସନ୍ତା ୩ମାସ ମଧ୍ୟରେ ଆଉ ୩୪ ହଜାର ୬୪୧ ନିଯୁକ୍ତି ପାଇଁ ବିଭିନ୍ନ ବିଭାଗର ପ୍ରସ୍ତାବ ଅନୁସାରେ ଓଡ଼ିଶା ଲୋକସେବା ଆୟୋଗ, ଓଡ଼ିଶା କର୍ମଚାରୀ ଚୟନ ଆୟୋଗ ଓ ଓଡ଼ିଶା ଅଧସ୍ତନ କର୍ମଚାରୀ ଚୟନ ଆୟୋଗଙ୍କୁ ନିଯୁକ୍ତି ପାଇଁ ଅନୁରୋଧ କରାଯାଇଛି ।

ଅଧିକ ପଢନ୍ତୁ : କେବେ ସରିବ କୁଳପତି ନିଯୁକ୍ତି ପ୍ରକ୍ରିୟା ? ଭାରପ୍ରାପ୍ତ କୁଳପତିଙ୍କ ଭରସାରେ ୧୪ଟି ବିଶ୍ୱବିଦ୍ୟାଳୟ

 ବିଭିନ୍ନ ବିଭାଗରେ ନିଯୁକ୍ତି ନେଇ ରହୁଥିବା ବିଭିନ୍ନ ସମସ୍ୟା ଓ ସମାଧାନ ସମ୍ପର୍କରେ ଅର୍ଥ ବିଭାଗ ପ୍ରମୁଖ ସଚିବ ଆଲୋଚନା କରିଥିଲେ । ଆଗାମୀ ବର୍ଷରେ ମଧ୍ୟ ନିଯୁକ୍ତି ପ୍ରକ୍ରିୟାକୁ ତ୍ବରାନ୍ବିତ କରିବାକୁ ପଦକ୍ଷେପ ନେବାକୁ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗକୁ କୁହାଯାଇଛି । ସେହିପରି ଗତ ବଜେଟ୍‌ ଅର୍ଥ ଖର୍ଚ୍ଚ ସମ୍ପର୍କରେ ବୈଠକରେ ଆଲୋଚନା ହୋଇଛି । ମାର୍ଚ୍ଚ ସୁଦ୍ଧା ଅର୍ଥ ଖର୍ଚ୍ଚ ସାରିବା ଉପରେ ବୈଠକରେ ଗୁରୁତ୍ୱ ଦିଆଯାଇଛି ।