/kanak/media/agency_attachments/2024-07-23t061209958z-vpn68eiq1eknckql8r0y.jpg)
/kanak/media/media_files/2026/02/10/24a-2026-02-10-18-13-50.jpg)
କନକ ବ୍ୟୁରୋ : ଲୋକସଭାର ବାଚସ୍ପତି ଓମ୍ ବିର୍ଲା ନିଜ ବିରୋଧରେ ଆସିଥିବା ଅବିଶ୍ୱାସ ପ୍ରସ୍ତାବ ଉପରେ ଚର୍ଚ୍ଚା ନହେବା ପର୍ଯ୍ୟନ୍ତ ସେ ଗୃହରେ ଅନୁପସ୍ଥିତ ରହିବେ ବୋଲି କହିଛନ୍ତି । ସୂତ୍ର ସୂଚନା ମୁତାବକ ତାଙ୍କ ଉପରେ ଆସିଥିବା ଅବିଶ୍ୱାସ ପ୍ରସ୍ତାବ ଉପରେ ସଂସଦରେ ଚର୍ଚ୍ଚା ହୋଇ ନିର୍ଣ୍ଣୟ ନହେବା ପର୍ଯ୍ୟନ୍ତ ସେ ଗୃହକୁ ଆସିବେନି । ହେଲେ ସଂସଦୀୟ ବ୍ୟବସ୍ଥା ଭିତରେ ଏଭଳି କିଛି ନିୟମ ନାହିଁ । ଏହା ପରେ ବି ଓମ୍ ବିର୍ଲା ସଂସଦ ନଆସିବାକୁ ନିଷ୍ପତ୍ତି ନେଇଛନ୍ତି । ତାଙ୍କର ଏଭଳି ନିଷ୍ପତ୍ତି ପରେ ସରକାର କିମ୍ବା ବିରୋଧୀ ତାଙ୍କୁ ବୁଝାଇବାକୁ ଚେଷ୍ଟା କରିପାରନ୍ତି । ହେଲେ ସେ ସ୍ପଷ୍ଟ କରିଛନ୍ତି କି, ଅବିଶ୍ୱାସ ପ୍ରସ୍ତାବ ଉପରେ ଚର୍ଚ୍ଚା ନହେବା ପର୍ଯ୍ୟନ୍ତ ସେ ଗୃହକୁ ଆସିବେ ନାହିଁ ।
ସୂଚନା ମୁତାବକ ବିଜେଟ୍ ଅଧିବେଶନର ଦ୍ୱିତୀୟ ପର୍ଯ୍ୟାୟ ଅର୍ଥାତ ମାର୍ଚ୍ଚ ୯ ତାରିଖରେ ଲୋକସଭାର ଅଧ୍ୟକ୍ଷ ଓମ୍ ବିର୍ଲାଙ୍କ ବିରୋଧରେ ଆସିଥିବା ଅବିଶ୍ୱାସ ପ୍ରସ୍ତାବ ଉପରେ ଚର୍ଚ୍ଚା ହୋଇପାରେ । ଏହି ପ୍ରକ୍ରିୟା କ୍ରମରେ ସଦନରେ ସର୍ବନିମ୍ନ ୫୦ ଜଣ ସାଂସଦ ଠିଆ ହୋଇ ଅବିଶ୍ୱାସ ପ୍ରସ୍ତାବକୁ ସମର୍ଥନ କରିବା ଦରକାର । ଏହାପରେ ବାଚସ୍ପତି ଏହି ପ୍ରସ୍ତାବ ଉପରେ ଔପଚାରିକ ଚର୍ଚ୍ଚା ପାଇଁ ଅନୁମତି ଦେଇପାରନ୍ତି । ଯଦି ସେହିଦିନ ପ୍ରସ୍ତାବ ସପକ୍ଷରେ ଆବଶ୍ୟକ ସମର୍ଥନ ମିଳିଯାଏ ତେବେ ମାର୍ଚ୍ଚ ୯ ତାରିଖରେ ଏହା ଉପରେ ଗୃହରେ ଆଲୋଚନା ହେବ ।
ସୂଚନା ଥାଉ କି, ଚଳିତ ଅଧିବେଶନରେ ବିରୋଧୀଦଳ ନେତା ରାହୁଲ ଗାନ୍ଧୀ, ଚର୍ଚ୍ଚିତ ଏପଷ୍ଟିନ ଫାଇଲ ସହ ପୂର୍ବତନ ସ୍ଥଳସେନା ମୁଖ୍ୟ ମନୋଜ ମୁକୁନ୍ଦ ନରୱାଣେଙ୍କ ଦ୍ୱାରା ଲିଖିତ ଏକ ପୁସ୍ତକ ବାବଦରେ ଗୃହରେ ଆଲୋଚନା କରିବାକୁ ଚେଷ୍ଟା କରିଥିଲେ । ହେଲେ ଏହି ଆଲୋଚନା ଉପରେ ବାଚସ୍ପତି ଓମ୍ ବିର୍ଲା ବାରମ୍ବାର ପ୍ରତିବନ୍ଧକ ଲଗାଉଥିଲେ । ଏହାକୁ ନେଇ ବିରୋଧୀଦଳ ବିଶେଷ କରି କଂଗ୍ରେସ ଅସନ୍ତୋଷ ଜାହିର କରିବା ସହ ଇଣ୍ଡିଆ ମେଣ୍ଟର ସମର୍ଥନରେ ବାଚସ୍ପତିଙ୍କ ବିରୋଧରେ ପକ୍ଷପାତିତା ଅଭିଯୋଗ ଆଣିବା ସହ ୧୧୮ ଜଣ ସାଂସଦଙ୍କ ହସ୍ତାକ୍ଷର ଥାଇ ବାଚସ୍ପତିଙ୍କ ବିରୋଧରେ ଅବିଶ୍ୱାସ ପ୍ରସ୍ତାବ ଆଣିଛନ୍ତି ।