ମେକ୍ସିକୋରେ ୪୦ ଘଣ୍ଟା କାର୍ଯ୍ୟ ସପ୍ତାହ ବିଲ୍‌କୁ ମଞ୍ଜୁରୀ : କୋଟିଏ ୩୪ ଲକ୍ଷ କର୍ମଚାରୀ ହେବେ ଉପକୃତ

କନକ ବ୍ୟୁରୋ : ସମ୍ପ୍ରତି କାର୍ଯ୍ୟଭାର ବଢ଼ିବାରେ ଲାଗିଛି । କାର୍ଯ୍ୟ ଓ ଜୀବନ ସନ୍ତୁଳନ ଉପରେ ଚର୍ଚ୍ଚା ମଧ୍ୟ ବଢ଼ିବାରେ ଲାଗିଛି । ଏପରିସ୍ଥ ମେକ୍ସିକୋ ଏକ ଐତିହାସିକ ପଦକ୍ଷେପ ନେଇଛି । କ୍ଲାଉଡିଆ ସେନବାଉମଙ୍କ ନେତୃତ୍ୱାଧୀନ ସରକାର କର୍ମଚାରୀମାନଙ୍କ ହିତ ପାଇଁ ଏକ ବଡ଼ ନିଷ୍ପତ୍ତି ନେଇଛନ୍ତି । କାର୍ଯ୍ୟ ସପ୍ତାହକୁ ଧୀରେ ଧୀରେ ୪୮ ଘଣ୍ଟାରୁ ୪୦ ଘଣ୍ଟାକୁ ହ୍ରାସ କରିବା ପାଇଁ ଏକ ବିଲ୍ ଅନୁମୋଦନ କରାଯାଇଛି । ଏହି ସଂସ୍କାର ଆସନ୍ତା ବର୍ଷରୁ କାର୍ଯ୍ୟକାରୀ ହେବ ବୋଲି ଆଶା କରାଯାଉଛି ।  ସାପ୍ତାହିକ ଓଭରଟାଇମକୁ ବୃଦ୍ଧି କରାଯାଇଛି । ପ୍ରତି ଛଅ ଦିନ କାମ କରୁଥିବା ବ୍ୟକ୍ତିଙ୍କ ପାଇଁ ଗୋଟିଏ ବିଶ୍ରାମ ଦିନ ବଜାୟ ରଖାଯାଇଛି । ଏହା ୨୦୨୭ରୁ ଆରମ୍ଭ ହୋଇ ୨୦୩୦ ସୁଦ୍ଧା କାର୍ଯ୍ୟ ସପ୍ତାହକୁ ଧାର୍ଯ୍ୟ ୪୦ ଘଣ୍ଟାରେ ପହଞ୍ଚାଇବ ।

ଚାମ୍ବର ଅଫ୍ ଡେପୁଟିଜ୍ ବିଲ୍‌ର ସାଧାରଣ ରୂପରେଖାକୁ ୫୦୦ ସଦସ୍ୟ ବିଶିଷ୍ଟ କଂଗ୍ରେସରେ ଉପସ୍ଥିତ ସମସ୍ତ ୪୬୯ ଜଣଙ୍କ ସମର୍ଥନରେ ଅନୁମୋଦନ କରାଯାଇଥିଲା । କେହି ବିପକ୍ଷରେ ଭୋଟ ଦେଇ ନଥିଲେ। ଡେପୁଟିମାନେ ଆଇନର ନିର୍ଦ୍ଦିଷ୍ଟ ସର୍ତ୍ତାବଳୀ ଉପରେ ଆଲୋଚନା କରିବାକୁ ଯାଇ ସପକ୍ଷରେ ୪୧୧ ଭୋଟ ସହିତ ଏହାକୁ ଅନୁମୋଦନ କରିଥିଲେ । ୧୦ ଘଣ୍ଟାର ବିତର୍କ ମଧ୍ୟରେ ବିରୋଧୀ ଦଳ ଏହି ସଂସ୍କାରକୁ କଡ଼ା ସମାଲୋଚନା କରିଥିବାବେଳେ ଶାସକ ଦଳ ଅନୁମୋଦନକୁ ପ୍ରଶଂସା କରିଛି । ବିରୋଧୀ ଦଳ ଯୁକ୍ତି ଦେଇଥିଲେ ଯେ ଏହି ବିଲ୍ କାର୍ଯ୍ୟ ସପ୍ତାହର ପ୍ରକୃତ ହ୍ରାସକୁ ପ୍ରତିନିଧିତ୍ୱ କରେ ନାହିଁ କାରଣ ଏହା ସାପ୍ତାହିକ ଓଭରଟାଇମ୍ ନଅ ଘଣ୍ଟାରୁ ୧୨ ଘଣ୍ଟାକୁ ବୃଦ୍ଧି କରି ପ୍ରତି ପାଞ୍ଚ ଦିନ କାମ କରିଥିବା ବ୍ୟକ୍ତିଙ୍କ ପାଇଁ ବାଧ୍ୟତାମୂଳକ ଦୁଇ ଦିନ ବିଶ୍ରାମ ଅନ୍ତର୍ଭୁକ୍ତ କରେ ନାହିଁ ।

ଅଧିକ ପଢନ୍ତୁ : କାନାଡାର ହିଂସାତ୍ମକ ଅପରାଧରେ ଆଉ ଜଡିତ ନାହିଁ ଭାରତ : କାର୍ନିଙ୍କ ଦିଲ୍ଲୀ ଗସ୍ତ ପୂର୍ବରୁ ଆସିଲା ଗୁରୁତ୍ବପୂର୍ଣ୍ଣ ବିବୃତି

ସଂସ୍କାରର ଧାରଣା ଖରାପ ନୁହେଁ, କିନ୍ତୁ ଏହା ଅସମ୍ପୂର୍ଣ୍ଣ ଏବଂ ତରବରରେ କରାଯାଇଛି ବୋଲି ବିରୋଧୀ ପିଆରଆଇ ପାର୍ଟିର ସାଂସଦ ଆଲେକ୍ସ ଡୋମିଙ୍ଗୁଏଜ୍ କହିଛନ୍ତି । ରାଷ୍ଟ୍ରପତି କ୍ଲାଉଡିଆ ସେନବାଉମ ଡିସେମ୍ବରରେ ଏହି ପ୍ରସ୍ତାବ ଆଗତ କରିଥିଲେ ।  ଏହାର ଲକ୍ଷ୍ୟ ୨୦୩୦ ପର୍ଯ୍ୟନ୍ତ ପ୍ରତିବର୍ଷ ଦୁଇ ଘଣ୍ଟା କାର୍ଯ୍ୟ ସପ୍ତାହ ହ୍ରାସ କରିବା। ଯାହା ଦ୍ୱାରା ପ୍ରାୟ ୧ କୋଟି ୩୪ ଲକ୍ଷ କର୍ମଚାରୀ ଉପକୃତ ହେବେ । ଯଦି ଏହି ଆଇନକୁ ମେକ୍ସିକୋର ଅଧାରୁ ଅଧିକ ରାଜ୍ୟ ବିଧାନସଭା ଦ୍ୱାରା ଅନୁମୋଦନ କରାଯାଏ ତେବେ ପ୍ରଥମ ଦୁଇ ଘଣ୍ଟା ହ୍ରାସ ଜାନୁଆରି ୨୦୨୭ରେ କାର୍ଯ୍ୟକାରୀ ହେବ ।