କନକ ବ୍ୟୁରୋ : କଟକ ସହରର ଆକାଶ, ମକର ସଂକ୍ରାନ୍ତିର ଖରା ଆଉ ରେଡିଓରେ ବାଜୁଥିବା ଅକ୍ଷୟ ମହାନ୍ତିଙ୍କ ସେଇ କାଳଜୟୀ ସଙ୍ଗୀତ - ଉଡ଼ି ଉଡ଼ି ଉଡ଼ି.. ଯାଆରେ ଉଡ଼ି... ଏ ମୋର ଗୁଡ଼ି ଖାଆନା ଖାଆନା ତୁ କାନି... ଏ ମୋର ଲଚକମାଣି, ଏ ମୋର ଲଚକମାଣି ।

Advertisment

ଏହି ଗୀତ କେବଳ ଏକ ସଙ୍ଗୀତ ନୁହେଁ, ବରଂ ଏହା ପୁରୁଣା କଟକର ଗୁଡ଼ି ଉଡ଼ା ସଂସ୍କୃତିର ଏକ ଜୀବନ୍ତ ଦଲିଲ୍ । କଟକିଆଙ୍କ ପାଇଁ ଗୁଡ଼ି ଉଡ଼ା କେବଳ ଏକ ଖେଳ ନଥିଲା, ଏହା ଥିଲା ଏକ ଭାବପ୍ରବଣତା । ଅକ୍ଷୟ ମହାନ୍ତି ବା ସମସ୍ତଙ୍କ ପ୍ରିୟ 'ଖୋକା ଭାଇ' ନିଜ ଗୀତ ମାଧ୍ୟମରେ ସେହି ସମୟର କଟକକୁ ଯେଉଁଭଳି ଭାବେ ବର୍ଣ୍ଣନା କରିଛନ୍ତି, ତାହା ଆଜି ବି ଶ୍ରୋତାଙ୍କୁ ସେହି ପୁରୁଣା ଦିନକୁ ଫେରାଇ ନିଏ । ଅକ୍ଷୟ ମହାନ୍ତି କେବଳ ଜଣେ ଗାୟକ ନଥିଲେ, ସେ ଥିଲେ କଟକର ପ୍ରାଣ । ତାଙ୍କ ଗୀତ ମାଧ୍ୟମରେ ସେ କଟକର ଗୁଡ଼ି ଉଡ଼ା ପରମ୍ପରାକୁ ଅମର କରିଦେଇଛନ୍ତି । ସେଥିପାଇଁ ତ ଆଜି ବି ଗୁଡ଼ି ଉଡ଼ାଇବା ବେଳେ ପ୍ରତିଟି ଓଡ଼ିଆଙ୍କ ପାଟିରେ ଖୋକା ଭାଇଙ୍କ ସେଇ ଧାଡ଼ି ଆପେ ଆପେ ଚାଲିଆସେ । 

କଟକର ଗୁଡ଼ି ଉଡ଼ା ଏକ ନିଆରା ପରମ୍ପରା ଓ ସଂସ୍କୃତିର ପ୍ରତୀକ । ଓଡ଼ିଶାର ସାଂସ୍କୃତିକ ରାଜଧାନୀ କଟକ ସହର ଏହାର ବାରମାସରେ ତେର ପର୍ବ ପାଇଁ ପ୍ରସିଦ୍ଧ । ଏହି ପର୍ବଗୁଡ଼ିକ ମଧ୍ୟରେ 'ମକର ସଂକ୍ରାନ୍ତି' ଅବସରରେ ଗୁଡ଼ି ଉଡ଼ା ଉତ୍ସବ ସହରବାସୀଙ୍କ ପାଇଁ ଏକ ବିଶେଷ ଆନନ୍ଦର ମୁହୂର୍ତ୍ତ ନେଇ ଆସିଥାଏ । ମକର ସଂକ୍ରାନ୍ତି ଆସିବା ପୂର୍ବରୁ କଟକର ଗଳିକନ୍ଦିରେ ଗୁଡ଼ି ଓ ସୂତାର ବଜାର ଜମିଉଠେ । କଟକର ପୁରୁଣା ବଜାର ଯଥା- ନିମଚୌରି, ଚାନ୍ଦିନୀ ଚୌକ ଓ ବାଲୁବଜାର ଆଦି ସ୍ଥାନରେ ରଙ୍ଗବେରଙ୍ଗର ଗୁଡ଼ି ଦେଖିବାକୁ ମିଳେ । ବିଭିନ୍ନ ପ୍ରକାରର ଗୁଡ଼ି ଯଥା- ଚକା, ଚେଙ୍ଗ, ଫର୍ଦ୍ଦିକିଆ, କୁଣ୍ଡ ଓ ବିଭିନ୍ନ ଚିତ୍ରାଙ୍କିତ ଗୁଡ଼ି ଆକାଶକୁ ରଙ୍ଗିନ କରିଦିଏ । ଏହାସହିତ ଗୁଡ଼ି କାଟିବା ପାଇଁ ପ୍ରସ୍ତୁତ କରାଯାଉଥିବା ଧାରୁଆ 'ମାଞ୍ଜା' ସୂତା ଏହି ଖେଳର ମୁଖ୍ୟ ଆକର୍ଷଣ ।

ଅଧିକ ପଢ଼ନ୍ତୁ---ଓଡ଼ିଆ ଭାଷାରେ ହେବ ସମସ୍ତ ସରକାରୀ କାର୍ଯ୍ୟ; ନିୟମ ଅବମାନନା କଲେ ଜାରିହେବ କାରଣ ଦର୍ଶାଆ ନୋଟିସ୍

ଆଜି କଟକର ଆକାଶରେ ଚୀନି ମାଞ୍ଜା ଓ ପ୍ଲାଷ୍ଟିକ ଗୁଡ଼ିର ପ୍ରାଦୁର୍ଭାବ ବଢ଼ିଥିଲେ ମଧ୍ୟ, ସେହି ପୁରୁଣା ଶାଢ଼ୀ କିମ୍ବା କାଗଜ ଗୁଡ଼ିର ମହକ ଆଜି ବି ଅକ୍ଷୟ ମହାନ୍ତିଙ୍କ ଗୀତରେ ସଜୀବ ହୋଇ ରହିଛି । ଯେତେବେଳେ ବି "ଉଡ଼ି ଉଡ଼ି ଉଡ଼ି ଯାରେ ଗୁଡ଼ି" ଗୀତଟି ବାଜେ, ସେତେବେଳେ ମନେପଡ଼େ କାଠଯୋଡ଼ି କୂଳର ସେହି ସଞ୍ଜ ଆଉ ଆକାଶରେ ଭାସୁଥିବା ଶହ ଶହ ରଙ୍ଗୀନ ଗୁଡ଼ି । 

ମକର ସଂକ୍ରାନ୍ତି ଦିନ ସକାଳୁ ସକାଳୁ କଟକର ପ୍ରତିଟି ଘରର ଛାତ ଉପରେ ଲୋକଙ୍କ ଭିଡ଼ ଜମେ । ଛୋଟ ପିଲାଠାରୁ ଆରମ୍ଭ କରି ବୃଦ୍ଧ ପର୍ଯ୍ୟନ୍ତ ସମସ୍ତେ ଗୁଡ଼ି ଉଡ଼ାଇବାରେ ମଜଗୁଲ ରହନ୍ତି । ଯେତେବେଳେ ଜଣେ ଅନ୍ୟ ଜଣଙ୍କର ଗୁଡ଼ିକୁ କାଟିଦିଏ, ସେତେବେଳେ ଛାତ ଉପରୁ "କଟିଗଲା କଟିଗଲା" ଶବ୍ଦରେ ପୂରା ସହର ପ୍ରକମ୍ପିତ ହୋଇଉଠେ । ଉଚ୍ଚ ସ୍ୱରରେ ମ୍ୟୁଜିକ୍ ବାଜିବା ସହିତ ପିଲାମାନେ କଟା ଗୁଡ଼ି ପଛରେ ଦୌଡ଼ିବାର ଦୃଶ୍ୟ ବେଶ୍ ମନୋରମ ହୋଇଥାଏ । କଟକର ଗୁଡ଼ି ଉଡ଼ା କେବଳ ଏକ ମନୋରଞ୍ଜନ ନୁହେଁ, ବରଂ ଏହା ଭାଇଚାରା ଓ ଏକତାର ପ୍ରତୀକ । ଧର୍ମ-ବର୍ଣ୍ଣ ନିର୍ବିଶେଷରେ ସମସ୍ତେ ଏହି ଉତ୍ସବକୁ ମିଳିମିଶି ପାଳନ କରନ୍ତି । ଛାତ ଉପରେ ସାଙ୍ଗସାଥୀ ଓ ପରିବାର ସହ ମକର ଚାଉଳ ଖାଇବା ଏବଂ ଗୁଡ଼ି ଲଢ଼େଇ କରିବା ଏକ ଅଭୁଲା ସ୍ମୃତି ହୋଇ ରହିଯାଏ ।

ତେବେ ବର୍ତ୍ତମାନ ସମୟରେ ପକ୍ଷୀମାନଙ୍କ ସୁରକ୍ଷା ଓ ବିପଜ୍ଜନକ ଚାଇନା ସୂତା ବ୍ୟବହାରକୁ ନେଇ ସଚେତନତା ମଧ୍ୟ ସୃଷ୍ଟି କରାଯାଉଛି । ପାରମ୍ପରିକ ସୂତା ବ୍ୟବହାର କରି ଗୁଡ଼ି ଉଡ଼ାଇବା ଦ୍ୱାରା ଏହି ପର୍ବର ଆନନ୍ଦ ଦ୍ୱିଗୁଣିତ ହୁଏ । ସଂକ୍ଷେପରେ କହିବାକୁ ଗଲେ, କଟକର ଗୁଡ଼ି ଉଡ଼ା ହେଉଛି ଆକାଶ ସହିତ ମଣିଷର ମନର ସମ୍ପର୍କ ଏବଂ ଉତ୍ସାହର ଏକ ମହାମିଳନ ।