ଘରକୁ ଫେରିଲେ ଲାଲୁଙ୍କ ବଡ଼ ପୁଅ , ମକର ସଂକ୍ରାନ୍ତି ଦହି-ଚୁଡ଼ା ଯୋଡ଼ିଲା ପରିବାର

କନକ ବ୍ୟୁରୋ : ମକର ସଂକ୍ରାନ୍ତି ଲାଲୁ ପରିବାର ପାଇଁ ଖୁସି ଆଣିଛି । ଗତ କିଛି ମାସ ଧରି ଚାଲିଥିବା ତିକ୍ତତା ଏବଂ ଶୀତଳ ଯୁଦ୍ଧର ଅନ୍ତ ଘଟାଇ ଲାଲୁ ପ୍ରସାଦ ଯାଦବ ତାଙ୍କ ବଡ଼ ପୁଅ ତେଜ ପ୍ରତାପ ଯାଦବଙ୍କ ଦହି-ଚୂଡ଼ା ଭୋଜିରେ ଯୋଗ ଦେଇଛନ୍ତି । ଲାଲୁ ଯାଦବଙ୍କ ସହିତ ବିହାର ରାଜ୍ୟପାଳ ଆରିଫ୍ ମହମ୍ମଦ ଖାନଙ୍କ ମଧ୍ୟ ଉତ୍ସବରେ ଦେଖିବାକୁ ମିଳିଥିଲା । ତେଜ ପ୍ରତାପ ଯାଦବ ବ୍ୟକ୍ତିଗତ ଭାବରେ ରାବ୍ରୀ ଦେବୀଙ୍କ ବାସଭବନକୁ ଯାଇ ନିଜ ପରିବାର ସଦସ୍ୟଙ୍କୁ ଏହି କାର୍ଯ୍ୟକ୍ରମରେ ଯୋଗଦେବାକୁ ନିମନ୍ତ୍ରଣ କରିଥିଲେ ।

ତେଜ ପ୍ରତାପ ଯାଦବ ନିମନ୍ତ୍ରଣ ଦେବାକୁ ପହଞ୍ଚି ପିତାମାତାଙ୍କ ପାଦ ଛୁଇଁ ଆଶୀର୍ବାଦ ନେଇଥିଲେ । ତା'ପରେ ସେ ତାଙ୍କ ସାନ ଭାଇ ତେଜସ୍ୱୀ ଯାଦବଙ୍କୁ ଦହି ଓ ଚୁଡ଼ା ଖାଇବାକୁ ନିମନ୍ତ୍ରଣ କରିଥିଲେ । ତେଜ ପ୍ରତାପ ଯାଦବ ଏହାର ଫଟୋ ମଧ୍ୟ ସୋସିଆଲ ମିଡିଆ ପ୍ଲାଟଫର୍ମ ଏକ୍ସ ରେ ସେୟାର କରିଥିଲେ । ଗୋଟିଏ ଫଟୋରେ ସେ ତେଜସ୍ୱୀଙ୍କ ଝିଅକୁ କୋଳରେ ଖାଇବାକୁ ଦେଉଥିବାର ଦେଖିବାକୁ ମିଳିଥିଲା । ଫଟୋଗୁଡ଼ିକ ସେୟାର କରି ତେଜ ପ୍ରତାପ ଲେଖିଛନ୍ତି, ମୁଁ ମୋ ବାପା ଲାଲୁ ପ୍ରସାଦ ଯାଦବ ଏବଂ ମାତା ରାବରୀ ଦେବୀଙ୍କୁ ତାଙ୍କ ୧୦ ସର୍କୁଲାର ରୋଡସ୍ଥିତ ବାସଭବନରେ ଭେଟିଥିଲି ଏବଂ ସେମାନଙ୍କ ଆଶୀର୍ବାଦ ଗ୍ରହଣ କରିଥିଲି । ମୁଁ ମୋର ସାନ ଭାଇ ଏବଂ ବିହାର ବିଧାନସଭାର ବିରୋଧୀ ଦଳ ନେତା ତେଜସ୍ୱୀଙ୍କୁ ମଧ୍ୟ ଭେଟିଥିଲି ଏବଂ ମକର ସଂକ୍ରାନ୍ତି ଅବସରରେ ଆୟୋଜିତ ଦହି-ଚୂଡ଼ା ଭୋଜିକୁ ନିମନ୍ତ୍ରଣ କରିଥିଲି ।

ଅଧିକ ପଢ଼ନ୍ତୁ--ପଶ୍ଚିମବଙ୍ଗ ମୁଖ୍ୟମନ୍ତ୍ରୀଙ୍କୁ ଗିରିରାଜଙ୍କ ସମାଲୋଚନା ; ପଶ୍ଚିମବଙ୍ଗକୁ ମମତା ବାଂଲାଦେଶରେ ପରିଣତ କରିଦେବେ