କିଙ୍ଗ୍ କୋହଲି ଅନ୍ ଫାୟାର୍ .. ପ୍ରଶ୍ନ ନୁହେଁ ଆଉ କେତେ ବର୍ଷ ଖେଳିବେ? ପ୍ରଶ୍ନ , କିଏ ତାଙ୍କୁ ଖେଳିବାରୁ ଅଟକାଇବ?

କନକ ବ୍ୟୁରୋ : କ୍ରିକେଟ କ୍ୟାରିୟରରେ ବୟସର ସବୁଠାରୁ ମହତ୍ତ୍ବପୂର୍ଣ୍ଣ ଭୂମିକା ଥାଏ । ୩୦ ପରେ ଫିଟନେସ୍ , ୩୫ ପରେ ପଡ଼ିଆରେ ଜଲୱା ଆଉ ୩୭ ପରେ କ୍ରିକେଟରେ ଭବିଷ୍ୟତ ... ହେଲେ କ୍ରିକେଟରଙ୍କ ଏ ଚିରାଚରିତ ସ୍କ୍ରିପ୍ଟକୁ ଚିରି ୩୭ ବର୍ଷରେ ଆତ୍ମବିଶ୍ବାସର ବ୍ୟାଟ୍ ମାରି ଚଉକା,ଛକା ଲଗାଇଛନ୍ତି ଜର୍ସି ନମ୍ବର ୧୮ ଅର୍ଥାତ କିଙ୍ଗ୍ କୋହଲି , ବିରାଟ୍ କୋହଲି ତଥା ପ୍ରତିଟି କ୍ରିକେଟପ୍ରେମୀଙ୍କ ପ୍ରିୟର ଚିକୁ । ଯୁବ କ୍ରିକେଟରଙ୍କ ପରି ବର୍ତ୍ତମାନ ପର୍ଯ୍ୟନ୍ତ ବିରାଟ ପଡ଼ିଆକୁ ଓହ୍ଲାଇଲେ ନିଜ ବୟସ ଯେମିତି ଭୁଲିଯାଆନ୍ତି ଏବଂ ପ୍ରଥମଥର ପାଇଁ ସେ ଯେତେବେଳେ ନୀଳ ଜର୍ସି ପିନ୍ଧିଥିଲେ ସେପରି ପଡ଼ିଆରେ କ୍ରିକେଟ ଖେଳନ୍ତି । 

ବିଜୟ ହଜାରେ ଟ୍ରଫି ପାଇଁ ଦିଲ୍ଲୀରେ ପଡ଼ିଆକୁ ଓହ୍ଲାଇବା ମାତ୍ରେ କୋହଲି ସ୍ପଷ୍ଟ କରିଥିଲେ ଯେ ଘରୋଇ କ୍ରିକେଟ୍ ତାଙ୍କ ପାଇଁ "ଆରାମଦାୟକ କ୍ଷେତ୍ର" ନୁହେଁ ବରଂ ଏକ ଚ୍ୟାଲେଞ୍ଜିଂ ପ୍ଲାଟଫର୍ମ । ଡିସେମ୍ବର ୨୬ ଶୁକ୍ରବାର ଦିନ ବେଙ୍ଗାଲୁରୁର ବିସିସିଆଇ ସେଣ୍ଟର ଅଫ୍ ଏକ୍ସଲେନ୍ସ ଗ୍ରାଉଣ୍ଡ ୧ ରେ ଗୁଜରାଟ ବିପକ୍ଷରେ ୬୧ ବଲରୁ ତାଙ୍କର ୭୭ ରନର ଇନିଂସ କେବଳ ଏକ ଅର୍ଦ୍ଧଶତକ ନଥିଲା - ଏହା ଅନ୍ତର୍ଜାତୀୟ କ୍ରିକେଟର ସର୍ବୋଚ୍ଚ ସ୍ତରରେ ବର୍ଷ ବର୍ଷ ଧରି ପ୍ରାପ୍ତ ଅଭିଜ୍ଞତାର ଏକ ଅଦ୍ଭୁତପୂର୍ଣ୍ଣ ପ୍ରଦର୍ଶନ ଥିଲା । ଦୁଇ ଦିନ ପୂର୍ବରୁ ଡିସେମ୍ବର ୨୪ ତାରିଖରେ ବିରାଟ ବିଜୟ ହଜାରେ ଟ୍ରଫିରେ ଆନ୍ଧ୍ର ବିପକ୍ଷରେ ଏକ ଇନିଂସ ଖେଳିଥିଲେ ଯାହା ଟୁର୍ଣ୍ଣାମେଣ୍ଟର ରୂପ ବଦଳାଇ ଦେଇଥିଲା । ୧୦୧ ବଲରୁ ୧୩୧ ରନ୍ କ୍ଲାସିକ୍ କଭର ଡ୍ରାଇଭ୍, ସଠିକ୍ ପୁଲ୍ ଏବଂ ଗ୍ୟାପରେ ବଲ୍ ପଡ଼ିବା..ଏହି ଇନିଂସ ହିଁ କହୁଛି ଯେ କୋହଲି ଆଜି ବି ଇନିଂସ କିପରି ତିଆରି କରିବେ ତାହା ଆଗରୁ ଜାଣିନିଅନ୍ତି । ପରିସ୍ଥିତିକୁ ଦେଖି ମ୍ୟାଚ୍ କୁ କେଉଁ ମୋଡ଼ ଦେବେ ତାହା କିଙ୍ଗ୍ କୋହଲିଙ୍କୁ ଭଲରେ ଜଣା ।  

‘ମୋର କଲିଜା ଫାଟିଯାଉଛି …’ କଷ୍ଟ ବଖାଣିଲେ ଜୟାପ୍ରଦା , କାହିଁକି ଏମିତି କହିଲେ ଅଭିନେତ୍ରୀ ?

ଯଦି ଆମେ ବିରାଟଙ୍କ ଶେଷ ଛଅ ଇନିଂସକୁ ଏକାଠି କରିବା ତେବେ ଗୋଟିଏ କଥା ସ୍ପଷ୍ଟ ହେବ ଯେ ଏହା କୌଣସି ଅସ୍ଥାୟୀ କିମ୍ବା ଗୋଟିଏ କିମ୍ବା ଦୁଇ ମ୍ୟାଚ୍‌ର ଫର୍ମ ନୁହେଁ । ଇଂରାଜିରେ Consistency ଏବଂ ଓଡ଼ିଆରେ ସ୍ଥିରତା ହେଉଛି ବିରାଟ କୋହଲିଙ୍କ ପ୍ରକୃତ ପରିଚୟ ।  ଅନେକ ମ୍ୟାଚରେ ବିରାଟଙ୍କ ଚମତ୍କାର ପ୍ରଦର୍ଶନର ଗୋଟିଏ ସୂତ୍ର : ନିୟନ୍ତ୍ରଣ । କିଙ୍ଗ୍ କୋହଲି ମ୍ୟାଚରେ ଆକ୍ରମଣାତ୍ମକ ହୋଇପାରନ୍ତି କିନ୍ତୁ କ୍ରିକେଟରେ ଚଞ୍ଚଳତା,ବେପରୁଆ ଭାବ ତାଙ୍କ ଠାରେ ଦେଖାଯାଏନାହିଁ । ବିପଦ ଥିଲେ ବି ବିରକ୍ତିଭାବ ପ୍ରକାଶ ନକରି ଶାନ୍ତ ରହି ପରିସ୍ଥିତି ସମ୍ଭାଳି ନିଅନ୍ତି । ଯେଉଁ କାରଣରୁ ୩୭ ବର୍ଷରେ ବି କୋହଲି ରନ୍ କରନ୍ତି ଏବଂ ମ୍ୟାଚର ଦିଗ ବଦଳାଇବାର ସାମର୍ଥ୍ୟ ରଖନ୍ତି । ବିଜୟ ହଜାରେ ଟ୍ରଫିରେ ବିରାଟ କୋହଲି ଖେଳିବା କେବଳ ଦିଲ୍ଲୀ ଦଳ ପାଇଁ ଏକ ବୋନସ୍ ନୁହେଁ, ଏହା ସମଗ୍ର ଟୁର୍ଣ୍ଣାମେଣ୍ଟର ଗୁଣବତ୍ତା ବୃଦ୍ଧି କରିଥାଏ । ଯୁବ ଖେଳାଳିମାନେ ତାଙ୍କ ସହିତ ଡ୍ରେସିଂ ରୁମ୍ ସେୟାର କରନ୍ତି, ପଡ଼ିଆରେ କୋହଲିଙ୍କଠାରୁ ମ୍ୟାଚ୍ ବିଷୟରେ ଏବଂ ବଡ଼ ମ୍ୟାଚକୁ କିପରି ହ୍ୟାଣ୍ଡଲ୍ କରିବେ ତାହା ମଧ୍ୟ ଜାଣନ୍ତି ।  

ବର୍ତ୍ତମାନ ସମୟରେ କିଙ୍ଗ୍ କୋହଲି କେବଳ ରେକର୍ଡ ପିଛା କରୁନାହାନ୍ତି ବରଂ ସେ ଏପରି ଏକ ଯୁଗରେ ଖେଳୁଛନ୍ତି ଯେଉଁଠାରେ ଅଭିଜ୍ଞତା, ଫିଟନେସ୍ ଏବଂ ମାନସିକ ଶକ୍ତି ଶୀର୍ଷରେ ଅଛି । ଏହି କାରଣରୁ ଆଜି ତାଙ୍କର ଇନିଂସ ଅଧିକ ପରିପକ୍ୱ, ପ୍ରଭାବଶାଳୀ ଏବଂ ଅଧିକ ନିର୍ଣ୍ଣାୟକ ଦେଖାଯାଉଛି । ଏହି ସ୍ବର୍ଣ୍ଣିମ ସମୟ ବିରାଟଙ୍କ ପାଇଁ ସେହି ପରିସ୍ଥିତି ଆଣିଦେଇଛି ଯେଉଁଠି ସେ କେତେବେଳେ ଅଟକିବେ , କେତେବେଳେ ଗିଅର୍ ଚେଞ୍ଜ କରିବେ ଏବଂ କେତେବେଳେ ମ୍ୟାଚର ମୋଡ଼ ବଦଳାଇ ବିଜୟର ମୁକୁଟ ପିନ୍ଧିବେ ତାହାକୁ ଭଲଭାବରେ ଜାଣିଛନ୍ତି । ବିଜୟ ହଜାରେ ଟ୍ରଫିରେ ବିରାଟଙ୍କ ଲଗାତାର ପ୍ରଦର୍ଶନ ଏହାକୁ ପ୍ରମାଣିତ କରୁଛି ଯେ କୋହଲିଙ୍କୁ ଏବେ ଅବସରର ଆବଶ୍ୟକତା ନାହିଁ ବରଂ ସେ ଆହୁରି ଖେଳିବେ ଏବଂ ପ୍ରତ୍ୟେକ ଇନିଂସ ସହ ନିଜ ନୂଆ କାହାଣୀର ନୂଆ ଫର୍ଦ୍ଦ ଲେଖିବେ ।