କନକ ବ୍ୟୁରୋ : ଆମେରିକା ଏବଂ ଇସ୍ରାଏଲର ମିଳିତ ଆକ୍ରମଣ ପରେ ମଧ୍ୟପ୍ରାଚ୍ୟରୁ ବର୍ତ୍ତମାନ ସବୁଠାରୁ ବଡ଼ ଖବର ସାମ୍ନାକୁ ଆସୁଛି । ଇରାନର ସରକାରୀ ଗଣମାଧ୍ୟମ ପ୍ରେସ ଟିଭି ସୁପ୍ରିମ ଲିଡର୍ ଅଲି ଖାମେନେଇଙ୍କ ମୃତ୍ୟୁର ନିଶ୍ଚିତ କରିଛି । ଏକ ଟ୍ୱିଟରେ ପ୍ରେସ ଟିଭି କହିଛି ଯେ ଇସଲାମିକ ବିପ୍ଳବର ନେତା ଆୟାତୋଲ୍ଲା ଅଲି ଖାମେନେଇ ଆମେରିକା-ଇସ୍ରାଏଲ ଆକ୍ରମଣରେ ସହିଦ ହୋଇଛନ୍ତି । ସର୍ବୋଚ୍ଚ ନେତାଙ୍କ ମୃତ୍ୟୁ ପରେ ଇରାନ ୪୦ ଦିନିଆ ଶୋକ ଘୋଷଣା କରିବା ସହିତ ୭ ଦିନିଆ ସରକାରୀ ଛୁଟି ମଧ୍ୟ ଘୋଷଣା କରିଛି । ରିପୋର୍ଟ ଅନୁଯାୟୀ, ଆକ୍ରମଣ ସମୟରେ ସେ ତାଙ୍କ ଗୃହ କାର୍ଯ୍ୟାଳୟରେ ଥିଲେ । କିଛି ଘଣ୍ଟା ପୂର୍ବରୁ ଖାମେନେଇଙ୍କ ଅବସ୍ଥା ସମ୍ପର୍କରେ ପରସ୍ପର ବିରୋଧୀ ରିପୋର୍ଟ ପ୍ରକାଶ ପାଇଥିଲା । ପୂର୍ବରୁ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଖାମେନେଇଙ୍କ ମୃତ୍ୟୁକୁ ନିଶ୍ଚିତ କରିଥିଲେ ହେଁ କୌଣସି ସରକାରୀ ନିଶ୍ଚିତକରଣ ମିଳିନଥିଲା । ଏମିତିକି ଇରାନୀ ଅଧିକାରୀମାନେ ମଧ୍ୟ ଚୁପ୍ ରହିଥିଲେ । କିନ୍ତୁ ବତ୍ତର୍ମାନ ଇରାନର ସରକାରୀ ଗଣମାଧ୍ୟମ ପ୍ରେସ୍ ଟିଭି, ଏବେ ଆନୁଷ୍ଠାନିକ ଭାବରେ ତାଙ୍କ ମୃତ୍ୟୁକୁ ନିଶ୍ଚିତ କରି ଖାମେନେଇଙ୍କୁ ସହିଦର ଆଖ୍ୟା ଦେଇଛି । ପ୍ରେସ୍ ଟିଭି ଇରାନ ସରକାରଙ୍କ ଦ୍ୱାରା ପାଣ୍ଠି ପ୍ରାପ୍ତ ଏବଂ ଏହା ଇସଲାମିକ୍ ରିପବ୍ଲିକ୍ ଅଫ୍ ଇରାନ ବ୍ରଡକାଷ୍ଟିଂ (IRIB)ର ଏକ ବିଭାଗ ।

Advertisment

ଆଗକୁ ପଢ଼ନ୍ତୁ : ମହାଯୁଦ୍ଧ ଆଣିବ ମହାସଙ୍କଟ ? ହୁ ହୁ ହୋଇ ବଢ଼ିବ ସୁନା ଦର ! ୨୦ ହଜାର ଉପରେ ଛୁଇଁବ ସୁନା !

ତେବେ ଶନିବାର ସକାଳେ ଆମେରିକା ଏବଂ ଇସ୍ରାଏଲ ମିଳିତ ଭାବରେ ଇରାନର ଅନେକ ସହର ଉପରେ ଆକ୍ରମଣ କରିଥିଲେ । ଖାମେନେଇଙ୍କ କାର୍ଯ୍ୟାଳୟ ଏବଂ ତେହେରାନରେ ଥିବା ଆବାସିକ ପରିସରରେ ମଧ୍ୟ ବୋମା ପକାଇ ଦିଆଯାଇଥିଲା । ଇସ୍ରାଏଲୀ ଗଣମାଧ୍ୟମ ରିପୋର୍ଟ କରିଛି ଯେ ଖାମେନେଇଙ୍କ ପରିସରରେ ପ୍ରାୟ ୩୦ ଟି ବୋମା ପକାଯାଇଥିଲା । ଆକ୍ରମଣ ପୂର୍ବରୁ ତାଙ୍କୁ ଏକ ସୁରକ୍ଷିତ ସ୍ଥାନକୁ ନିଆଯାଇଥିଲା ବୋଲି ପ୍ରାରମ୍ଭିକ ରିପୋର୍ଟ କହୁଛି । ସାଟେଲାଇଟ୍ ଚିତ୍ରରେ ତାଙ୍କ କମ୍ପାଉଣ୍ଡରେ ଅନେକ କ୍ଷତି ଦେଖାଯାଇଛି । ଆକ୍ରମଣ ପରେ ଟ୍ରମ୍ପ ସୋସିଆଲ ମିଡିଆରେ ଲେଖିଛନ୍ତି, "ଖାମେନେଇ ଇତିହାସର ସବୁଠାରୁ ବିପଦଜନକ ବ୍ୟକ୍ତିମାନଙ୍କ ମଧ୍ୟରୁ ଜଣେ ଥିଲେ । ତାଙ୍କ ମୃତ୍ୟୁ ଇରାନ ଲୋକଙ୍କ ପାଇଁ ନ୍ୟାୟ । ଏବେ ଇରାନ ଲୋକଙ୍କ ପାଖରେ ସେମାନଙ୍କ ଦେଶକୁ ଫେରାଇ ନେବାର ସୁଯୋଗ ଅଛି ।" ଟ୍ରମ୍ପ ଇରାନ ଲୋକଙ୍କୁ ଘରେ ରହିବାକୁ ଅନୁରୋଧ କରିଛନ୍ତି, କାରଣ ବାହାରେ ବୋମା ପଡ଼ିବ, ଏବଂ ଅପରେସନ ଶେଷ ହେବା ପରେ ନିଜ ସରକାରର ଦାୟିତ୍ୱ ନେବାକୁ କହିଛନ୍ତି । ଟ୍ରମ୍ପଙ୍କ ଏହି ବିବୃତ୍ତି ସ୍ପଷ୍ଟ ଭାବରେ ସୂଚାଇ ଦେଉଛି ଯେ ଆମେରିକା କେବଳ ଆକ୍ରମଣ ବିଷୟରେ କହୁନାହିଁ ବରଂ କ୍ଷମତା ପରିବର୍ତ୍ତନ ବିଷୟରେ ମଧ୍ୟ ଇଙ୍ଗିତ କରୁଛି ।

ଆୟାତୋଲ୍ଲା ଖାମେନେଇଙ୍କ ପରେ ଅଲି ଖାମେନେଇ ୧୯୮୯ ମସିହାରୁ ଇରାନର ସୁପ୍ରିମ୍ ନେତା ରହି ଆସିଥିଲେ । ତାଙ୍କ ଶାସନରେ ଆମେରିକା ସହିତ ସଂଘର୍ଷ, ପରମାଣୁ ବିବାଦ, ଆମେରିକାର କଟକଣା, ପ୍ରତିବାଦ ଏବଂ ହମାସ ଏବଂ ହିଜବୋଲ୍ଲାକୁ ସମର୍ଥନ ରହିଛି । ତେବେ ୧୯୭୯ ବିପ୍ଳବ ପରେ ଏହାକୁ ଇରାନର ସବୁଠାରୁ ବଡ଼ ପତନ ବୋଲି କୁହାଯାଇପାରିବ ।