କନକ ବ୍ୟୁରୋ: ପାଟି ଭଲସେ ଖୋଲିନି, ହେତୁ ବି ପାଇନି । କୁନି  ଛୁଆଟିଏ ପରା, କଥା କେମିତି କହିବ?? ତା’ ପାଇଁ ଘର ମାନେ ମା’ର କୋଳ, ବାପାଙ୍କ ହସ ଆଉ ଚାଉଳ ଫୁଟୁଥିବା ଚୁଲିର ଧୂଆଁ ପରି । କିନ୍ତୁ ଯେଉଁ ଘରେ ତା’ କାନ୍ଦ ଶୁଭୁଥିଲା, ତା’ ଖିଲି ଖିଲି ହସ ଖେଳି ବୁଲୁଥିଲା ସେ ଘର ଆଜି ମାଟିରେ ମିଶିଯାଇଛି । ପ୍ରଶାସନ ବୁଲାଇ ଦେଇଛି ବ୍ୟବସ୍ଥାର ବୁଲଡୋଜର । 

Advertisment

ଭଙ୍ଗା ଦିଆସିଲି କାଠି ପରି ଭାଙ୍ଗି ଯାଇଛି ଭରସାର ଘର । ସକାଳୁ ସକାଳୁ ସମୟ ନଦେଇ, କେନ୍ଦ୍ରାପଡ଼ା ମହାକାଳପଡ଼ା ରୋମିତୋ ଗାଁର ୧୯ଟି ଘରକୁ ମାଟିରେ ମିଶାଇ ଦେଇଛି ପ୍ରଶାସନ । ନା ଲୁଗାପଟା ବାହାର କରିବାକୁ ଟାଇମ୍ ଦେଲେ ନା ଛୁଆଙ୍କ ଖାଇବା ଖୋଜିବାକୁ । କେଇ ମିନିଟରେ ଧୂଳିସାତ ହୋଇଗଲା ବର୍ଷ ବର୍ଷର ସ୍ବପ୍ନ । ଗୋଚର ଜମିରେ ଘର ଥିବା ଅଭିଯୋଗରେ ବୁଲଡୋଜର ବୁଲାଇ ଦେଇଛି ପ୍ରଶାସନ । ଆଉ ଏହି ପରିବାର ଏବେ ପାଲ ତଳେ ଜୀବନ ବିତାଉଛନ୍ତି, ଶୀତ ଶାସ୍ତି ଦେଉଥିଲେ ବି ଘରର ଜିନିଷକୁ ପାଲ ତଳେ ରଖି ଜଗି ରହିଛନ୍ତି । 

ଅଧିକ ପଢନ୍ତୁ... ୨୦ ହଜାର ଅଙ୍ଗନବାଡ଼ିର ନାହିଁ ନିଜସ୍ୱ କେନ୍ଦ୍ର ; ଖୁବ୍‌ଶୀଘ୍ର ମରାମତି କରାଯିବ କହିଲେ ଉପମୁଖ୍ୟମନ୍ତ୍ରୀ

କାଲି ଯେଉଁଠି ଘର ଥିଲା ଆଜି ସେଠି ଶ୍ମଶାନ ଭଳି ଦିଶୁଛି । ଭସ୍ମୀଭୂତ ଭବିଷ୍ୟତ ଆଉ ଅନିଶ୍ଚିତତାର ଆଖିରେ ସରକାରଙ୍କ ନିୟମକୁ ଧିକାର କରୁଛନ୍ତି ଏହି ଅସହାୟ ପରିବାର । କାରର ଘରକୁ ସିନା ପ୍ରଶାସନ ଭାଙ୍ଗିଦେଇ ଚାଲିଗଲା, ହେଲେ ଏବେ ଶୀତରେ ଏମାନେ ରହିବେ କେଉଁଠି? କୁନି କୁନି କଅଁଳ କଢ଼ିଙ୍କୁ ନେଇ ଯିବେ କୁଆଡେ ? କେହି ଭୂମିହୀନ ରହିବେନି, ସମସ୍ତଙ୍କ ମୁଣ୍ଡକୁ ଛାତ । ଏଭଳି ନାରା ଦେଉଛନ୍ତି ସରକାର । କିନ୍ତୁ ଏଠି ଦୁଃଖ କଷ୍ଟରେ ମୂଲ ମଜୁରି ଲାଗି ମୁଣ୍ଡ ଗୁଞ୍ଜିଥିବା ଘରଟିକୁ ଭାଙ୍ଗିଦେଇଛି ପ୍ରଶାସନ । ବିଚିତ୍ର କଥା ହେଲା ପ୍ରଶାସନ ଘର ଭାଙ୍ଗିଦେଲା କିନ୍ତୁ ପାଲ ଖଣ୍ଡେ ବି ଦେଲାନି କି ଦୟା ଟିକେ କଲାନି । 

ପ୍ରଶ୍ନ ଉଠୁଛି ଯଦି ଭାଙ୍ଗିବାର ଥିଲା, ତା’ହେଲେ ବିସ୍ଥାପିତ ବ୍ୟବସ୍ଥା କରାଗଲାନି କାହିଁକି ? ଆଉ ଏନେଇ ଜିଲ୍ଲାପାଳ ସରକାରଙ୍କ ନିୟମ ବ୍ୟବସ୍ଥାର ଦ୍ବାହି ଦେଇ ଚୁପ ହୋଇଯାଇଛନ୍ତି । ସରକାରୀ ବ୍ୟବସ୍ଥା ସାଧାରଣ ଲୋକଙ୍କ ପାଇଁ ନା ଧନୀ ଓ ଦଲାଲଙ୍କ ପାଇଁ ? ଲୋକଙ୍କ ସରକାର ଯଦି ଅସହାୟ ଲୋକଙ୍କୁ ହଇରାଣ କରିବେ ତା’ହେଲେ ସେମାନେ କହିବେ କାହାକୁ ? ଗୁହାରି ଶୁଣିବ କିଏ ?