ପାକିସ୍ତାନୀ ଅଧିକାରୀଙ୍କୁ କହୁଥିଲେ ବୟଫ୍ରେଣ୍ଡ୍ ... ଜ୍ୟୋତିଙ୍କ ମୋବାଇଲରୁ ବାହାରିଲା ସିକ୍ରେଟ୍ ନମ୍ବର

ପାକିସ୍ତାନ ପାଇଁ ଗୁଇନ୍ଦାଗିରି କାମ କରୁଥିବା ଭାରତୀୟ ୟୁଟ୍ୟୁବର୍ ଜ୍ୟୋତି ମାଲହୋତ୍ରାଙ୍କ କଲ୍ ଡିଟେଲ୍ସରେ ସବୁଠାରୁ ଅଧିକ ଇନକମିଙ୍ଗ୍ ଏବଂ ଆଉଟଗୋଇଙ୍ଗ୍ ଜଟ୍ ରନ୍ଧାୱା ନାମକ ଜଣେ ୟୁଜରଙ୍କର ରହିଛି । ଟେଲିଗ୍ରାମ୍ ଏବଂ ସ୍ନାପ୍ ଚାଟରେ ମଧ୍ୟ ଜ୍ୟୋତି ଏହି ବ୍ୟକ୍ତିଙ୍କ ସହ ଅଧିକ କଥାବାର୍ତ୍ତା କରିଛନ୍ତି । ଏହାକୁ ଦେଖି ପୁଲିସର ସନ୍ଦେହ ହେଲା ଏବଂ ପୁଲିସ ଜଟ୍ ରନ୍ଧାୱା ବିଷୟରେ ଜ୍ୟୋତିଙ୍କୁ ବାରମ୍ବାର ପ୍ରଶ୍ନ କରିଥିଲେ । ପ୍ରଥମେ ଜ୍ୟୋତି ପୁଲିସକୁ ଭୂଆଁ ବୁଲାଇବା ପାଇଁ ଜଟ୍ ରନ୍ଧାୱାକୁ ନିଜ ପ୍ରେମିକ ବୋଲି କହିଥିଲେ । କିନ୍ତୁ ପୁଲିସର ନାଲିଆଖିକୁ ଡ଼ରି ସତ ଉଗାଳିଥିଲେ ଜ୍ୟୋତି । 

ଜଟ୍ ରନ୍ଧାୱା ଓରଫ ଶାକିର ପାକ୍ ଇଣ୍ଟେଲିଜେନ୍ସର ଜଣେ ବରିଷ୍ଠ ଅଫିସର । କାହାକୁ କାଳେ ସନ୍ଦେହ ହେବ ବୋଲି ଭାବି ସେ ଫୋନରେ ଶାକିର ବଦଳରେ ଜଟ୍ ନାଁରେ ନମ୍ବର ସେଭ୍ କରିଥିଲେ । ଜ୍ୟୋତି ଦାନିଶର ମୋବାଇଲ୍ ନମ୍ବରକୁ ବି ଅନ୍ୟ କୌଣସି ନାଁରେ ସେଭ୍ କରିଥିଲେ । ପଡ଼ୋଶୀଙ୍କ କହିବା ମୁତାବକ ଯୁବତୀ ଜଣକ ଟିଙ୍ଗା ସ୍ବଭାବର ଥିଲେ । ପଡ଼ୋଶୀଙ୍କ ସହ ଆଦୌ କଥାବାର୍ତ୍ତା କରୁନଥିଲେ । ଜ୍ୟୋତିଙ୍କର ଏକାଧିକ ପ୍ରେମ ସମ୍ବନ୍ଧ ବିଷୟରେ ମଧ୍ୟ ପୁଲିସ ଖୁଲାସା କରିଛି । ସୂତ୍ରରୁ ଜଣାପଡିଛି ଯେ ଅନେକ ଅଧିକାରୀଙ୍କ ସହ ଜ୍ୟୋତିଙ୍କ ସମ୍ବନ୍ଧ ଥିଲା । ଯେଉଁଥିରେ କିଛି ବିଦେଶୀ ଅଧିକାରୀ ମଧ୍ୟ ସାମିଲ ଅଛନ୍ତି ଏବଂ ଏହି ଲିଷ୍ଟରେ ପାକିସ୍ତାନର ଦାନିଶ ଏବଂ ଶାକିର ମଧ୍ୟ ସାମିଲ୍ ଥିଲେ । 

କେଉଁ ଅଧିକାରୀଙ୍କ ସହ ସଂପର୍କରେ ଆସି କେଉଁ କେଉଁ ତଥ୍ୟ ଲିକ୍ କରିଛନ୍ତି ଜ୍ୟୋତି ଏହାକୁ ନେଇ ପୁଲିସ ଏବେ ଛାନଭିନ କରୁଛି । ଏହାଛଡ଼ା ଯୁବତୀଙ୍କ ସୋସିଆଲ୍ ମିଡିଆ ହ୍ୟାଣ୍ଡେଲକୁ ବି ତନ୍ନ ତନ୍ନ କରି ଯାଞ୍ଚ୍ କରୁଛି ପୁଲିସ । ଖାସ୍ କରି ପାକିସ୍ତାନ ଗସ୍ତ ବେଳେ ଶତ୍ରୁଦେଶର ହାଇକମିସନ୍ ଅଫିସରେ ଉଠାଇଥିବା କିଛି ଫଟୋକୁ ଜ୍ୟୋତି ଇନଷ୍ଟା ଏବଂ ୟୁଟ୍ୟୁବରେ ସେୟାର୍ କରିଥିଲେ । ପାକିସ୍ତାନର ହାଇକମିସନରେ ଚାଲିଥିବା ଏକ ପାର୍ଟିରେ ଜ୍ୟୋତିଙ୍କୁ ନିମନ୍ତ୍ରଣ କରିଥିଲେ ପାକିସ୍ତାନୀ ଅଧିକାରୀ । ସୂତ୍ର ଅନୁସାରେ ଶାକିର ଜ୍ୟୋତିକୁ କାମ ଦେଉଥିଲା ଏବଂ କାମକୁ ସଠିକ ଢଙ୍ଗରେ କରୁଥିଲା ଏହି ଯୁବତୀ । ଏଥିପାଇଁ ଜ୍ୟୋତି କିଛି ବି କରିବାକୁ ପଡିଲେ କରୁଥିଲେ । ମୋଟାଅଙ୍କର ଟଙ୍କା ଲାଳସାରେ ଜ୍ୟୋତି ଦେଶଦ୍ରୋହ କାମ କରିବାକୁ ପଛାଉ ନଥିଲେ ।