ପ୍ରଥମରୁ ପଦାରେ ପଡିଲା ମଣ୍ଡି ଅବ୍ୟବସ୍ଥା:  ଦୁଇ ଦିନ ହେଲା ଖୋଲିଲାଣି ମଣ୍ଡି, ଉଠିପାରିଲାନି ମୁଠାଏ ଧାନ

କନକ ବ୍ୟୁରୋ: ମଣ୍ଡି ଖୋଲିଲା ହେଲେ ଚାଷୀ ବିକି ଉଠୁନି ଧାନ । ଚାଉଳ ଉଠାଣକୁ ନେଇ ସହ ପ୍ରଶାସନ ଓ ମିଲରଙ୍କ ମଧ୍ୟରେ ଛକା ପଞ୍ଜା ଯୋଗୁଁ ପେଶି ହେଉଛନ୍ତି ଚାଷୀ । ଚାଉଳ ନନେବା ପର୍ଯନ୍ତ ଧାନ ନଉଠାଇବାକୁ ସିଧାସଳଖ ଚେତାବନୀ ଦେଇଛି ମିଲର ସଂଘ ।   
   
ଖରିଫ ଧାନ କିଣା ଆରମ୍ଭରୁ ପଦାରେ ପଡିଛି ଅବ୍ୟବସ୍ଥା ।  ବରଗଡ଼, ସମ୍ବଲପୁର, କଳାହାଣ୍ଡି ଜିଲ୍ଲାରେ ମଣ୍ଡି ଖୋଲିଥିଲେ ବି ଉଠିପାରୁନି ଧାନ । ଚାଉଳ ଉଠାଣକୁ ନେଇ ପ୍ରଶାସନ ସହ ବିବାଦ ଯୋଗୁଁ ବରଗଡ଼, ସମ୍ବଲପୁରରେ ଦୁଇ ଦିନ ହେଲା ମଣ୍ଡି ଖୋଲିଥିଲେ ବି ଧାନ ବିକ୍ରି ହୋଇ ପାରୁନି। କଳହାଣ୍ଡିରେ ମଧ୍ୟ ସମାନ ଅବସ୍ଥା । ଗୋଲମୁଣ୍ଡା ବ୍ଲକରେ ଆଜି ମଣ୍ଡି ଖୋଲିଥିଲେ ବି ବସ୍ତାଏ ଧାନ ବିକି ପାରିନାହାନ୍ତି ଚାଷୀ । ଟ୍ରାକ୍ଟର, ଟ୍ରକ ଓ ବିଭିନ୍ନ ଗାଡ଼ିରେ ଧାନ ଆଣି ମଣ୍ଡିରେ ଅପେକ୍ଷା କରିଥିବା ଚାଷୀ ହତାଶ ହୋଇଛନ୍ତି ।

ଅଧିକ ପଢନ୍ତୁ : ମଣ୍ଡି ପାଇଁ ଚାଷୀଙ୍କ ମୁଣ୍ଡବିନ୍ଧା ; ନବରଙ୍ଗପୁରରେ ମଣ୍ଡି ଖୋଲିଲା ହେଲେ ଉଠୁନି ଧାନ
ଅସନ୍ତୋଷ ବଢ଼ୁଥିବାବେଳେ ସମ୍ବଲପୁରରେ ଚାଷୀଙ୍କ ସହ ବୈଠକ କରିଛି ପ୍ରଶାସନ । ଚାଷୀଙ୍କ ଧାନ ଉଠାଇବାକୁ ପ୍ରତିଶ୍ରୁତି ଦେଇଛନ୍ତି । କିନ୍ତୁ ଜିଦରେ ଅଟଳ ମିଲର ସଂଘ । ଚାଉଳ ନଉଠାଇବା ପର୍ଯ୍ୟନ୍ତ ଧାନ ଉଠାଇବେ ନାହିଁ ବୋଲି ସରକାରଙ୍କୁ ସିଧାସଳଖ ଚେତାବନୀ ଦେଇଛନ୍ତି । ଏଥିସହ ମିଲିଂ ଚାର୍ଜ ବୃଦ୍ଧି କରିବାକୁ ଦାବି କରିଛି ମିଲର ସଂଘ । ଏଭଳି ସ୍ଥିତିରେ ଧାନ ଉଠାଇବା ପ୍ରଶାସନ ପାଇଁ ବଡ ଚ୍ୟାଲେଞ୍ଜ ହୋଇଛି ।  ଧାନ କିଣିବାକୁ ସରକାର ଦୀର୍ଘ ଦିନ ହେଲା ପ୍ରସ୍ତୁତି ଚଳାଇଥିବାବେଳେ ଆରମ୍ଭରୁ ଏଭଳି ଅବ୍ୟବସ୍ଥା ବିରାଟ ପ୍ରଶ୍ନବାଚୀ ସୃଷ୍ଟି କରିଛି ।