କନକ ବ୍ୟୁରୋ : ସାଧାରଣତଃ ଶୀତଦିନେ ଶରୀର ଶୁଷ୍କ ହୋଇଯାଏ । ଯାହା ଆମକୁ ଅସହଜ ମନେହୁଏ ।  ସେହି କାରଣରୁ ଆମେ ଅନେକ ଖାଦ୍ୟ ଓ ପାନୀୟକୁ ନିଜ ଡାଏଟ୍ ଚାର୍ଟରେ ସାମିଲ କରିଥାଉ । ସେଥିରୁ ପଇଡ଼ ପାଣି ଅନ୍ୟତମ । ଏବେ ଜାଣନ୍ତୁ  ଶୀତଦିନେ  ପଇଡ଼ ପାଣି ପିଇବା ଶରୀର ପାଇଁ କେତେ ଭଲ ଆଉ କାହା ପାଇଁ ପଇଡ଼ ପାଣି ମନା । ଫଳରେ ଆପଣମାନେ ଶୀତଦିନେ  ପଇଡ଼ ପାଣି ପିଇବେ କି ନାହିଁ ଆଉ ମନରେ ଦ୍ବନ୍ଦ୍ବ ରହିବ ନାହିଁ । 

Advertisment

ଅଧିକ ପଢନ୍ତୁ  ... ସକାଳୁ ଖାଲି ପେଟରେ ଖାଆନ୍ତୁ ଏହି ଖାଦ୍ୟ : ଓଜନ କମିବାରେ ହେବ ସହାୟକ

ଆମେ ଜାଣିଛେ ଯେ ଖରାଦିନେ ପଇଡ଼ ପାଣିକୁ ମୁଖ୍ୟ ପାନୀୟ ରୂପେ ଗ୍ରହଣ କରାଯାଏ । ଲୋକମାନେ ଏହି ପାଣିକୁ ପିଇବା ପାଇଁ ବେଶ୍ ପସନ୍ଦ ମଧ୍ୟ କରିଥାଆନ୍ତି  ।   ଯାହା ଆମ ପେଟକୁ ଥଣ୍ଡା ରଖିଥାଏ । କିନ୍ତୁ ସ୍ବାସ୍ଥ୍ୟ ବିଶେଷଜ୍ଞ ଓ ଆର୍ୟୁବେଦ ଚିକିତ୍ସା ଅନୁସାରେ ଶୀତଦିନେ  ପଇଡ଼ ପାଣିକୁ ଯଦି ଠିକ୍ ଉପାୟରେ ଓ ସଠିକ୍ ସମୟରେ ପିଆଯାଏ ତେବେ ଏହା କୌଣସି ବରଦାନଠାରୁ କମ୍ ନୁହେଁ  ।  ୯୦ପ୍ରତିଶତରୁ ଅଧିକ ଲୋକେ  କେତେବେଳେ ଏହି ପାଣି ପିଇବେ  ,  କେମତି ପିଇବେ ସଠିକ୍ ଉପାୟ ନଜାଣି  ଶୀତଦିନେ ଏହାକୁ ପିଇନଥାନ୍ତି । 
ସାଧାରଣତଃ ଶୀତଦିନେ ଆମେ ପାଣି କମ୍ ପିଇଥାଉ  ।  ଯାହା ଫଳରେ ଶରୀରରେ ଜଳୀୟ ଅଂଶ କମିଯାଏ ଏବଂ ଚର୍ମ ଶୁଷ୍କ ହୋଇଯାଏ ।  ଏ ଦୃଷ୍ଟିରୁ ଦେଖିଲେ ପଇଡ଼ ପାଣି ଶରୀର ପାଇଁ ସବୁଠାରୁ ଲାଭଦାୟକ ଅଟେ ।  ଏହା ଆମ ଶରୀରକୁ ଉପଯୁକ୍ତ ପୋଷଣ ମଧ୍ୟ ଯୋଗାଇଥାଏ  । ପଇଡ଼ ପାଣିରେ  ପୋଟାସିୟମ୍, ମ୍ୟାଗ୍ନେସିୟମ୍, କ୍ୟାଲସିୟମ ଭଳି ପୋଷକତତ୍ତ୍ବ ଭରି ରହିଛି ।

ଯାହା ଆମ ଶରୀରର ଥକ୍କାପଣ ମେଣ୍ଟାଇବାରେ ସାହାଯ୍ୟ କରେ ଏବଂ ମାଂସପେଶୀକୁ ସୁସ୍ଥ ଭାବରେ ଗଠନ କରିବାକୁ ସାହାଯ୍ୟ ମଧ୍ୟ କରିଥାଏ । ପଇଡ଼ ପାଣିରେ ଆଣ୍ଟିଅକ୍ସିଡେଣ୍ଟ୍ ଥିବା ସହ ଶରୀରର ରୋଗ ପ୍ରତିରୋଧକ ଶକ୍ତି ବଢାଇବାରେ ବେଶ୍ ସହାୟକ ହୋଇଥାଏ ।  

ପେଟ ଗରମ ଯୋଗୁଁ ହେଉଥିବା କାଶରୁ  ମଧ୍ୟ ଉପଶମ ଦିଏ । ହେଲେ ଶୀତଦିନେ ପଇଡ଼ ପାଣି ପିଇବା ପୂର୍ବରୁ କିଛି ସର୍ତକତା ମଧ୍ୟ ଅବଲମ୍ବନ କରନ୍ତୁ ।  ଏହାକୁ ପିଇବାର କିଛି ସମୟ ଅଛି ଯେତେବେଳେ ଏହା ମହୌଷଧି ଭଳି କାମ କରେ  ।  ନଚେତ ଅସମୟରେ ଏହାର କୁପ୍ରଭାବ ବି ପଡ଼ିପାରେ  । 

ପୂରା ଭୋର ସମୟରେ କିମ୍ବା ରାତିରେ ପଇଡ଼ ପାଣି ପିଅନ୍ତୁ ନାହିଁ  ।  ଆପଣଙ୍କୁ ଯଦି ଅଧିକ ଥଣ୍ଡା, କାଶ, ସର୍ଦ୍ଦି ହୋଇଥାଏ ତେବେ ଡାକ୍ତରଙ୍କ ସହ ପରାମର୍ଶ କରନ୍ତୁ  । ଡାକ୍ତରଙ୍କୁ ପରାମର୍ଶ କଲେ ଏହା ସବୁଠୁ ଭଲହେବ ।  ତେବେ ପଇଡ଼ ପାଣି ସେବନ ଦ୍ବିପହରରେ କଲେ ଆପଣଙ୍କ  ଶରୀର ପାଇଁ ଲାଭବାନ୍ ହେବ । ଏହି ସମୟରେ ଶରୀରର ତାପମାତ୍ରା ସନ୍ତୁଳିତ  ଅବସ୍ଥାରେ ରହିଥାଏ  ।  ପଇଡ଼ପାଣି ପିଇବା ଦ୍ବାରା ଆମ ଶରୀରରେ ହୋଇଥିବା ଅନେକ ରୋଗ ଜନିତ ସମସ୍ୟାର ସମାଧାନ ମଧ୍ୟ ହୋଇଥାଏ  ।