ରବିବାର ବଡ଼ ଲଢ଼େଇ, ଇଡେନ୍‌ରେ ଭାରତ-ଇଣ୍ଡିଜ୍‌ ଟକ୍କର

କନକ ବ୍ୟୁରୋ: ଐତିହାସିକ ଇ‌ଡେନ୍‌ ଗାର୍ଡେନ୍ସ ରବିବାର ଭାରତ-ୱେଷ୍ଟଇଣ୍ଡିଜ୍‌ ହାଇଭୋଲ୍‌ଟେଜ୍‌ ସୁପର-୮ ମ୍ୟାଚ୍‌ ଆୟୋଜନ କରିବ । ଚଳିତ ଟ୍ବେଣ୍ଟି-୨୦ ବିଶ୍ବକପ୍‌ର ସେମିଫାଇନାଲ୍‌ ପ୍ରବେଶ ଦୃଷ୍ଟିରୁ ଏହି ମ୍ୟାଚ୍‌ ଉଭୟ ଦଳ ପାଇଁ କ୍ବାର୍ଟର ଫାଇନାଲ୍‌ ସଦୃଶ ହେବ । ସମୀରଣ ଦୁଇଟି ଯାକ ଦଳ ପାଇଁ ସମାନ ରହିବ । ଜିତିଲେ ସେମିଫାଇନାଲ୍‌ ଟିକେଟ୍‌ ମିଳିବ । ଯିଏ ହାରିବ ସିଏ କିନ୍ତୁ ବିଦାୟ ନେବ । କୌଣସି କାରଣରୁ ଯଦି ମ୍ୟାଚ୍‌ ବାତିଲ ହୁଏ, ଆୟୋଜକ ଭାରତ ଓ ଦୁଇ ଥର ବିଜେତା ଇଣ୍ଡିଜ୍‌ ୩ପଏଣ୍ଟ୍‌ ଲେଖାଏଁ ପାଇ ବରାବର ସ୍ଥିତିରେ ରହିବେ । ତେବେ ଉନ୍ନତ ନେଟ୍‌ ରେନ୍‌ ରେଟ୍‌ ଆଧାରରେ ୱେଷ୍ଟଇଣ୍ଡିଜ୍‌ ସେମିଫାଇନାଲ୍‌ ଖେଳିବ । ଭାରତ ଜିିତିଲେ ତା’ ପାଇଁ ପ୍ରଥମ ଆୟୋଜକ ଦେଶ ଭାବେ ବିଶ୍ବକପ୍‌ ଜିତିବାର ଆଶା ଅତୁଟ ରହିବ । 

ୱେଷ୍ଟଇଣ୍ଡିଜ୍‌ ଜିତିଲେ ପ୍ରଥମ ଦଳ ଭାବେ ତିନି ଥର ଟ୍ବେଣ୍ଟି-୨୦ ବିଶ୍ବକପ୍‌ ଜିିତିବାର ବିରଳ ରେକର୍ଡ ଦିଗରେ ଆଉ ଗୋଟିଏ ପାଦ ବଢ଼ାଇବ । ସୁପର-୮ର ପ୍ରଥମ ମ୍ୟାଚ୍‌ରେ ଦକ୍ଷିଣ ଆଫ୍ରିକାଠାରୁ ୭୬ ରନ୍‌ରେ ହାରିବା ପରେ ଭାରତର ଅପରାଜେୟ ଧାରା ଅଟକି ଥିଲା । ତା’ ସହିତ ସେମିଫାଇନାଲ୍‌ ପ୍ରବେଶ ଦୃଷ୍ଟିରୁ ଏହି ପର୍ଯ୍ୟାୟର ଶେଷ ଦୁଇଟି ମ୍ୟାଚ୍‌ରେ ଟିମ୍‌ ଇଣ୍ଡିଆ ପାଇଁ କର ବା ମରର ଆହ୍ବାନ ରହିଥିଲା । ଗତ ମ୍ୟାଚ୍‌ରେ ଜିମ୍ବାୱେକୁ ୭୨ ରନ୍‌ରେ ହରାଇ ସୂର୍ଯ୍ୟକୁମାର ସେନା ତା’ର ସେମିଫାଇନାଲ୍‌ ଆଶା ଅତୁଟ ରଖିଥିଲା । ଏବେ ଏହି ଲକ୍ଷ୍ୟର ଦ୍ବିତୀୟ ବାଧା ଅର୍ଥାତ୍ ୱେଷ୍ଟଇଣ୍ଡିଜ୍‌ ବିପକ୍ଷ ମ୍ୟାଚ୍‌କୁ ଜିତିବା ଭାରତୀୟ କ୍ରିକେଟ୍‌ ଦଳ ପାଇଁ ଅନୁରୂପ ଭାବେ ଏକାନ୍ତ ଅପରିହାର୍ଯ୍ୟ ହୋଇଛି । ଭାରତ ଗତ ମ୍ୟାଚ୍‌ ଭଳି  ରବିବାର ଏହି ମ୍ୟାଚ୍‌କୁ ଜିତି ଦଶମ ପ୍ରୟାସରେ ପଞ୍ଚମ ଥର ପାଇଁ ‌ସେମିଫାଇନାଲ୍‌ ଖେଳିବ ବୋଲି ୧୪୫ କୋଟି ଭାରତୀୟ ଆଶା ବାନ୍ଧିଛନ୍ତି । 

ଏହା ବି ପଢ଼ନ୍ତୁ: ବ୍ୟାଟ୍ସମ୍ୟାନଙ୍କୁ ସୁହାଇବ ଇଡେନ୍‌ ପିଚ୍‌ !

ଏଥର ଇଡେନ୍‌ ଗାର୍ଡେନ୍ସରେ ଅଧିକ ମ୍ୟାଚ୍‌ ନଖେଳିବା ହୁଏତ ଏକ ଚିନ୍ତାର କାରଣ ହୋଇପାରେ । କାରଣ  ୱେଷ୍ଟଇଣ୍ଡିଜ୍‌ ଏଠାରେ ଚଳିତ ବିଶ୍ବକପ୍‌ର ଦୁଇଟି ମ୍ୟାଚ୍‌ ଖେଳି ସାରିଛି । ସ୍କଟଲାଣ୍ଡ୍‌ ଓ ଇଟାଲି ବିପକ୍ଷ ଦୁଇଟି ଗ୍ରୁପ୍‌ ପର୍ଯ୍ୟାୟ ଲଢ଼େଇ ଜିତି ବି ସାରିଛି । ଅନ୍ୟପକ୍ଷରେ ଭାରତ ପ୍ରଥମ ମୁକାବିଲା ଖେଳିବ । ୱେଷ୍ଟଇଣ୍ଡିଜ୍ ମଧ୍ୟ ୨୦୧୬ ବିଶ୍ବକପ୍‌ର ଫାଇନାଲ୍‌ରେ ଏଠାରେ ହିଁ ଇଣ୍ଡିଜ୍‌କୁ ହରାଇ ବିଜେତା ହୋଇଥିଲା ।  ସେହିଦୃଷ୍ଟିରୁ ଇଣ୍ଡିଜ୍ ସାମାନ୍ୟ ଫାଇଦାରେ ରହିବ । ତେବେ ଇଡେନ୍‌ ଗାର୍ଡେନ୍ସରେ ଭାରତକୁ କେବେବି ହରାଇ ନପାରିବାର ଚାପ ତା’ ଉପରେ ରହିପାରେ । ଇଡେନ୍ ଗାର୍ଡେନ୍ସରେ ଭାରତ-ଇଣ୍ଡିଜ୍‌ ଚାରିଟି ଟ୍ବେଣ୍ଟି-୨୦ ଖେଳିଛନ୍ତି । ପ୍ରତିଥର ଭାରତ ବିଜୟୀ ହୋଇଛି । 

ପାଗ ଶୁଖିଲା ରହିବ

ଭାରତ-ଇଣ୍ଡିଜ୍‌ ମହାଟକ୍କର ପୂର୍ବରୁ ଭାରତୀୟ ପାଣିପାଗ ବିଭାଗ କ୍ରିକେଟ୍‌ ପ୍ରଶଂସକଙ୍କୁ ଖୁସି ଖବର ଦେଇଛି । ରବିବାର ରାତିରେ କୋଲାକତା ପାଗ ମୁଖ୍ୟତଃ ଶୁଖିଲା ରହିବ ବୋଲି ବିଭାଗ ପୂର୍ବାନୁମାନ କରିଛି । ଦିନରେ ତାପମାତ୍ରା ୩୪ ଡିଗ୍ରୀ ଏବଂ ରାତିରେ ଅ‌ପେକ୍ଷାକୃତ କମ୍‌ ହୋଇ ୨୫ରୁ ୨୬ ଡିଗ୍ରୀ ମଧ୍ୟରେ ରହିବ । ମ୍ୟାଚ୍‌ ରାତି ୭ଟାରୁ ଆରମ୍ଭ ହେବାକୁ ଥିଲା ବେଳେ ଟସ୍‌ ୬.୩୦ରେ ପଡ଼ିବ । ରବିବାର ବର୍ଷା ହେବାର ସମ୍ଭାବନା ପ୍ରାୟ ନାହିଁ । ‌ତେବେ ଅଚାନକ ଯଦି ଅଦିନିଆ ବର୍ଷା ଏହି ପ୍ରତୀକ୍ଷିତ ମୁକାବିଲାକୁ ଧୋଇ ନିଏ, ତାହେଲେ ଇଣ୍ଡିଜ୍ ପାଇଁ ଏହା ବରଦାନ ଓ ଭାରତ ପାଇଁ ଅଭିଶାପ ସାବ୍ୟସ୍ତ ହେବ । 

କାକର ସୃଷ୍ଟି କରିପାରେ ସମସ୍ୟା

କର ବା ମର ମ୍ୟାଚ୍‌ରେ କାକର ଉଭୟ ଦଳ ପାଇଁ ବଡ଼ ସମସ୍ୟା ଭାବେ ଉଭା ହୋଇପାରେ । ଫଳରେ ଟସ୍‌ର ଢେର ମହତ୍ତ୍ବ ରହିଛି । ଟସ୍‌ ଜିତିଲେ ପଶ୍ଚାତଧାବନ କରିବା ଏକ ଭଲ ପଦକ୍ଷେପ ହୋଇପାରେ । ଏହି ବିଷୟରେ ଇଡେନ୍‌ ଗାର୍ଡେନ୍ସର ମୁଖ୍ୟ କ୍ୟୁରେଟର୍‌ ସୁଜନ ମୁଖାର୍ଜୀ ମଧ୍ୟ ଚେତାଇ ଦେଇଛନ୍ତି । ରାତିରେ ବଢ଼ିବା ଅନୁସାରେ କାକର ପଡ଼ିବା ବଢ଼ିବ ବୋଲି କହିଛନ୍ତି ସେ । ଏହା ପୂର୍ବରୁ ଚେନ୍ନାଇରେ ଖେଳାଯାଇଥିବା ଭାରତ-ଜିମ୍ବାୱେ ମ୍ୟାଚ୍‌ରେ କାକରର ପ୍ରଭାବକୁ ନିରସ୍ତ୍ର କରିବା ଲାଗି ଏକ ରାସାୟନିକ ଦ୍ରବଣ ଏମ୍‌ଏ ଚିଦାମ୍ବରମ୍‌ ଷ୍ଟାଡିୟମ୍‌ର ଆଉଟ୍‌ ଫିଲ୍‌ଡରେ ସିଂଚନ କରାଯାଇଥିଲା । ଇଡେନ୍‌ ଗାର୍ଡେନ୍ସରେ ଏଭଳି ପ୍ରତିଷେଧକ ବ୍ୟବସ୍ଥା ଗ୍ରହଣ କରାଯିବ କି ନାହିଁ, ସେ ବିଷୟରେ କିଛି କହି ନାହାନ୍ତି ଶ୍ରୀ ମୁଖାର୍ଜୀ ।

ଚୂଡ଼ାନ୍ତ ଏକାଦଶରେ ପରିବର୍ତ୍ତନ ସମ୍ଭାବନା କମ୍‌

ଜିମ୍ବାୱେ ବିପକ୍ଷ ମ୍ୟାଚ୍‌ରେ ଭାରତ ଦୁଇଟି ପରିବର୍ତ୍ତନ କରିଥିଲା । ପିତାଙ୍କ ସ୍ବାସ୍ଥ୍ୟ ଖରାପ ଏବଂ ଅକାଳ ନିଧନ ପାଇଁ ରିଙ୍କୁ ସିଂହଙ୍କୁ ବାଦ୍ ଦେଇ ତାଙ୍କ ସ୍ଥାନରେ ସଞ୍ଜୁ ସାମସନ୍‌ଙ୍କୁ ଖେଳାଇଥିଲା । ସେହିଭଳି ଅଲରାଉଣ୍ଡର୍‌ ୱାସିଂଟନ୍‌ ସୁନ୍ଦରଙ୍କୁ ବାଦ୍‌ ଦେଇ ଅକ୍ଷର ପଟେଲଙ୍କୁ ଫେରାଇ ଆଣିଥିଲା । ଏହି ଦୁଇ ପରିବର୍ତ୍ତନ ଦଳର ସନ୍ତୁୂଳନକୁ ମଧ୍ୟ ବଢ଼ାଇ ଦେଇଥିଲା । ସବୁଠାରୁ ଭଲ କଥା ଭାବେ ଦଳର ଶୀର୍ଷ ୬ ବ୍ୟାଟର୍‌ ଭଲ ରନ୍‌ କରିଥିଲେ । ଅଭିଷେକ ଶର୍ମା ଫର୍ମକୁ ଫେରିଥିଲେ । ଅଲରାଉଣ୍ଡର୍‌ ହାର୍ଦିକ ପାଣ୍ଡ୍ୟା ବହୁଦିନ ପରେ ଅର୍ଦ୍ଧଶତକ ହାସଲ କରିଥିଲେ । ଏଣୁ କୋଲକାତାରେ ଭାରତର ଚୂଡ଼ାନ୍ତ ଏକାଦଶରେ ଅଦଦଳ ବଦଳ ସମ୍ଭାବନା ପ୍ରାୟ ନାହିଁ । ତେବେ ଦଳ ପାଇଁ ବୋଲିଂ ବିଭାଗର ମାତ୍ରାଧିକ ରନ୍‌ ବ୍ୟୟ ଚିନ୍ତାର କାରଣ ହୋଇଛି । ବିଶେଷ କରି ଷଷ୍ଠ ବୋଲର ବିକଳ୍ପ ଦଳ ପାଇଁ ସବୁବେଳେ ସମସ୍ୟା ସୃଷ୍ଟି କରି ଆସୁଛି । ମାଟିକୁ ପୂରା ଜାବୁଡ଼ି ଧରୁଥିବା ପିଚ୍‌ ପାଇଁ ଇଡେନ୍‌ରେ ଲାଇନ୍‌ ଲେନ୍‌ଥ ବିଶେଷ ଗୁରୁତ୍ବ ବହନ କରିବ । ଏଣୁ ଭାରତୀୟ ଦ୍ରୁତ ବୋଲରଙ୍କୁ ବିବିଧତା ଭରା ବୋଲିଂ କରିବାକୁ ହେବ । ସ୍ପିନର୍‌ଙ୍କୁ ଠିକ୍‌ ଜାଗାରେ ବଲ୍ ରଖିବାକୁ ହେବ । ସେହିଭଳି ୱେଷ୍ଟଇଣ୍ଡିଜ୍‌ ମଧ୍ୟ ତା’ ଦଳରେ ବଡ଼ ଧରଣର ପରିବର୍ତ୍ତନ କରିବା ସମ୍ଭାବନା ଏକବାର କମ୍ ରହିଛି । 

ସମ୍ଭାବ୍ୟ ଭାରତ: ଅଭିଷେକ ଶର୍ମା, ସଞ୍ଜୁ ସାମସନ୍‌, ଈଶାନ କିଶନ, ସୂର୍ଯ୍ୟକୁମାର ଯାଦବ(ଅଧିନାୟକ), ତିଳକ ବର୍ମା, ଶିବମ ଦୁବେ, ହାର୍ଦିକ ପାଣ୍ଡ୍ୟା, ଅକ୍ଷର ପଟେଲ, ଯଶପ୍ରୀତ୍‌ ବୁମ୍‌ରା, ଅର୍ଶଦୀପ ସିଂହ, ବରୁଣ ଚକ୍ରବର୍ତ୍ତୀ ।

ସମ୍ଭାବ୍ୟ ୱେଷ୍ଟଇଣ୍ଡିଜ୍‌: ବ୍ରାଣ୍ଡନ୍‌ କିଙ୍ଗ୍, ସାଇ ହୋପ୍‌ (ଅଧିନାୟକ), ସିମରନ୍‌ ହେଟମାୟର, ରୋଭମନ ପାୱେଲ, ସେରଫାନ୍‌ ରଦରଫୋର୍ଡ, ରୋମାରିଓ ସେପର୍ଡ, ଜାସନ ହୋଲ୍‌ଡର, ମାଥ୍ୟୁ ଫର୍ଡେ, ଅକିଲ ହୁସେନ, ଗୁଡ଼କେଶ ‌ମୋତି, ସମର ଯୋଶେଫ ।   

ଭାରତ-ୱେଷ୍ଟଇଣ୍ଡିଜ୍ ଟ୍ବେଣ୍ଟି-୨୦ ରେକର୍ଡ

ମ୍ୟାଚ୍‌: ୩୦

ଭାରତ ବିଜୟୀ: ୧୯

ୱେଷ୍ଟଇଣ୍ଡିଜ୍‌ ବିଜୟୀ: ୧୦

ଫଳାଫଳ ମିଳିନି-୦୧

ଶେଷ ୫

ଭାରତ ବିଜୟୀ: ୨

ୱେଷ୍ଟଇଣ୍ଡିଜ୍‌ ବିଜୟୀ: ୩