ବାରବାଟୀରେ କାହା ପଲ୍ଲା ଭାରି? ଭାରତ ନାଁରେ ରହିଛି ଲଜ୍ଜାଜନକ ରେକର୍ଡ

କନକ ବ୍ୟୁରୋ: ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ ସିରିଜରେ 'କ୍ଲିନ୍ ସୁଇପ୍'ର ସାମ୍ନା କରିବା ପରେ ଭାରତୀୟ ଦଳ ଦିନିକିଆ ସିରିଜରେ ଜବରଦସ୍ତ ପ୍ରତ୍ୟାବର୍ତ୍ତନ କରିଛି ଏବଂ ଭ୍ରମଣକାରୀ ଦଳକୁ ୨-୧ରେ ପରାସ୍ତ କରି ସିରିଜ୍ କବଜା କରିଛି । ବର୍ତ୍ତମାନ ଭାରତର ନଜର ଡିସେମ୍ବର ୯ ତାରିଖ ମଙ୍ଗଳବାରରୁ ଆରମ୍ଭ ହେବାକୁ ଥିବା ଟି-୨୦ ସିରିଜ୍ ଉପରେ ରହିବ । ସିରିଜର ପ୍ରଥମ ମ୍ୟାଚ୍ କଟକର ବାରବାଟୀ ଷ୍ଟାଡିୟମରେ ଖେଳାଯିବ। ଏଥିପାଇଁ ଭାରତୀୟ ଦଳ ନିଜର ପ୍ରସ୍ତୁତି ଶେଷ କରିସାରିଛି । ଆସନ୍ତୁ ଜାଣିବା ଏହି ଷ୍ଟାଡିୟମରେ ଖେଳାଯାଇଥିବା ଟି-୨୦ ମ୍ୟାଚରେ ଭାରତର ପ୍ରଦର୍ଶନ କିପରି ରହିଛି...

କଟକର ବାରବାଟୀ ଷ୍ଟାଡିୟମରେ ବର୍ତ୍ତମାନ ସୁଦ୍ଧା କେବଳ ତିନୋଟି ଟି-୨୦ ମ୍ୟାଚ୍ ଖେଳାଯାଇଛି । ଏଥିମଧ୍ୟରୁ ଦୁଇଟି ମ୍ୟାଚ୍ ଭାରତ ଦକ୍ଷିଣ ଆଫ୍ରିକା ବିପକ୍ଷରେ ଖେଳିଛି, ଯେଉଁଥିରେ ଭ୍ରମଣକାରୀ ଦଳର ଦବଦବା ରହିଛି । ଉଭୟ ମ୍ୟାଚ୍ ଆଫ୍ରିକୀୟ ଦଳ ଲକ୍ଷ୍ୟର ପିଛା କରି ଜିତିଛି । ୨୦୧୫ରେ ଏଠାରେ ପ୍ରଥମ ଅନ୍ତର୍ଜାତୀୟ ଟି-୨୦ ମ୍ୟାଚ୍ ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯାଇଥିଲା, ଯାହାକୁ ଆଫ୍ରିକୀୟ ଦଳ ୬ ୱିକେଟରେ ଜିତିଥିଲା । ୨୦୨୨ରେ ଉଭୟ ଦଳ ମଧ୍ୟରେ ହୋଇଥିବା ଅନ୍ୟ ଏକ ମ୍ୟାଚରେ ମଧ୍ୟ ଭ୍ରମଣକାରୀ ଦକ୍ଷିଣ ଆଫ୍ରିକା ଭାରତକୁ ୪ ୱିକେଟରେ ପରାସ୍ତ କରିଥିଲା । ଭାରତ ଏଠାରେ ଏକମାତ୍ର ଟି-୨୦ ମ୍ୟାଚ୍ ୨୦୧୭ରେ ଶ୍ରୀଲଙ୍କା ବିପକ୍ଷରେ ଜିତିଥିଲା । ଏହି ମ୍ୟାଚରେ ଭାରତ ଶ୍ରୀଲଙ୍କାକୁ ୯୩ ରନ୍‌ର ବିଶାଳ ବ୍ୟବଧାନରେ ପରାସ୍ତ କରିଥିଲା ।

ଆହୁରି ପଢ଼ନ୍ତୁ... ସରିଲା ଅପେକ୍ଷା, ଆଜି ବାରବାଟୀରେ ବଡ଼ ଲଢ଼େଇ

କଟକରେ ଖେଳାଯାଇଥିବା ତିନୋଟି ଯାକ ମ୍ୟାଚରେ ଟସ୍ ଜିତି ଦଳଗୁଡ଼ିକ ବୋଲିଂ କରିବାକୁ ନିଷ୍ପତ୍ତି ନେଇଛନ୍ତି । ତିନୋଟି ମଧ୍ୟରୁ ଦୁଇଟି ମ୍ୟାଚରେ ପରେ ବ୍ୟାଟିଂ କରୁଥିବା ଦଳ ବାଜି ମାରିଛି । ଏହି ଦୁଇଟି ମ୍ୟାଚ୍ କଥା କହିଲେ, ଦକ୍ଷିଣ ଆଫ୍ରିକା ଏହି ପଡ଼ିଆରେ ଭାରତ ଉପରେ ପ୍ରାଧାନ୍ୟ ବିସ୍ତାର କରିଛି । ଏହି ପଡ଼ିଆରେ ଅନ୍ତର୍ଜାତୀୟ ଟି-୨୦ର ସର୍ବାଧିକ ସ୍କୋର ହେଉଛି ୧୮୦ ରନ୍ । ଏହି ପିଚ୍‌ରେ ବୋଲରମାନଙ୍କୁ ସାହାଯ୍ୟ ମିଳିଥାଏ, ତେଣୁ ଏଠାରେ ବଡ଼ ସ୍କୋର କରିବା କଷ୍ଟକର । ସ୍ପିନରମାନେ ଏହି ପଡ଼ିଆରେ ପ୍ରଭାବଶାଳୀ ସାବ୍ୟସ୍ତ ହୁଅନ୍ତି । ଦ୍ରୁତ ବୋଲରମାନେ ମଧ୍ୟ ଏହି ପିଚ୍‌ର ଅସମାନ ବାଉନ୍ସର ଫାଇଦା ଉଠାଇ ୱିକେଟ୍ ନେଇପାରନ୍ତି ।

ବରାବାଟୀ ଟି-20 ପାଇଁ ଫ୍ୟାନ୍ସମାନଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଛି । ତେବେ ଏହି ମ୍ୟାଚରେ ଅଭିଷେକ ଶର୍ମାଙ୍କ ଉପରେ ନଜର ରହିବ । ଦର୍ଶକ ତାଙ୍କ ବିସ୍ଫୋରକ ବ୍ୟାଟିଂକୁ ଭରପୂର ଉପଭୋଗ କରିବେ । ସେହିପରି ଶୁବମନ ଗିଲ୍, ସୂର୍ଯ୍ୟକୁମାର ଯାଦବ ଓ ହାର୍ଦ୍ଦିକ ପାଣ୍ଡ୍ୟାଙ୍କ ଜଲଓ୍ୱା ମଧ୍ୟ ଦେଖିବାକୁ ମିଳିପାରେ । ଗୋଟିଏ ପଟେ ବାରବାଟୀରେ ଦକ୍ଷିଣ ଆଫ୍ରିକା 2ଟି ଯାକ ଟି-20ରେ ବିଜୟୀ ହୋଇ ନିଜ ଦବଦବା ରଖିଥିବା ବେଳେ ଭାରତ ଏହି ମ୍ୟାଚରେ ବିଜୟୀ ହୋଇ ବଦଲା ନେବାକୁ ଚେଷ୍ଟା କରିବ । ନଚେତ ପୁଣି ପରାଜୟ ସାମ୍ନା କରି ଏକ ଲଜ୍ଜାଜନକ ରେକର୍ଡ ନିଜ ନାଁରେ କରିବ ।