ଚାଷ କାମ ଯାହାର କେଡ଼େ ସୁଖ ତାହାର ; ଚାଷୀ ପରା ଯୋଗାଉଛି ସବୁ ମୁଖେ ଆହାର

କନକ ବ୍ୟୁରୋ : କୃଷକ ଆମର ଅର୍ଣ୍ଣଦାତା... ତାଙ୍କ ଅବଦାନ ପାଇଁ ଆମ ଘରେ ଚୁଲି ଜଳେ, ତାଙ୍କ ପାଇଁ ଆମେ ଦିନକୁ ଦି ଓଳି ଖାଇ ପାରୁ । ଖରା, ବର୍ଷା, ଶୀତକୁ ଖାତିର ନକରି ସେମାନେ ବିଲରେ ଅହରହ ପରିଶ୍ରମ କରନ୍ତି କେବଳ ଆମକୁ ଅର୍ଣ୍ଣ ଦେବା ପାଇଁ । ସେଥିପାଇଁ ତ କୁହାଯାଏ ଜୟ ଯବାନ, ଜୟ କିଷାନ...

ଭାରତ ଏକ କୃଷି ପ୍ରଧାନ ଦେଶ, ଯେଉଁଠାରେ କୋଟି କୋଟି ଲୋକଙ୍କ ଜୀବିକା ଏବଂ ଦେଶର ଖାଦ୍ୟ ସୁରକ୍ଷା ସିଧାସଳଖ ଚାଷଜମି ସହିତ ଜଡ଼ିତ । ଏହି କୃଷି ସଂସ୍କୃତି ଏବଂ ଅନ୍ନଦାତାଙ୍କ ଅବଦାନକୁ ସମ୍ମାନ ଜଣାଇବା ପାଇଁ ପ୍ରତିବର୍ଷ ୨୩ ଡିସେମ୍ବରରେ ‘କୃଷକ ଦିବସ’ ପାଳନ କରାଯାଏ । ଏହି ଦିନଟି କେବଳ ଏକ ଆନୁଷ୍ଠାନିକ ଆୟୋଜନ ନୁହେଁ, ବରଂ ଭାରତୀୟ କୃଷକଙ୍କ ସଂଘର୍ଷ, ପରିଶ୍ରମ ଏବଂ ରାଷ୍ଟ୍ର ଗଠନରେ ତାଙ୍କର ଭୂମିକାକୁ ମନେ ପକାଇବାର ଏକ ସୁଯୋଗ । ୨୦୦୧ ମସିହାରେ କୃଷକ ଦିବସର ଶୁଭାରମ୍ଭ କରାଯାଇଥିଲା । ଭାରତ ସରକାର ଦେଶର ପୂର୍ବତନ ପ୍ରଧାନମନ୍ତ୍ରୀ ଚୌଧୁରୀ ଚରଣ ସିଂଙ୍କ ଜୟନ୍ତୀକୁ ଜାତୀୟ କୃଷକ ଦିବସ ଭାବେ ପାଳନ କରିବାକୁ ଏହି ନିଷ୍ପତ୍ତି ନେଇଥିଲେ । ଚୌଧୁରୀ ଚରଣ ସିଂଙ୍କୁ ଭାରତୀୟ ରାଜନୀତିରେ କୃଷକମାନଙ୍କର ଏକ ଶକ୍ତିଶାଳୀ ପ୍ରତିନିଧି ଏବଂ ଗ୍ରାମୀଣ ଭାରତର ସ୍ୱର ଭାବରେ ବିବେଚନା କରାଯାଏ । ତାଙ୍କର ସମଗ୍ର ରାଜନୈତିକ ଜୀବନ କୃଷକ, କୃଷି ଶ୍ରମିକ ଏବଂ ଗ୍ରାମୀଣ ଅର୍ଥନୀତିର ଉନ୍ନତି ପାଇଁ ଉତ୍ସର୍ଗୀକୃତ ଥିଲା ।

ଅଧିକ ପଢ଼ନ୍ତୁ---ବଡ଼ ବୟାନ ଦେଲେ ମୋହନ ଭାଗବତ ; ‘କହିଲେ RSS ହିନ୍ଦୁଙ୍କ ସଂରକ୍ଷଣ ପକ୍ଷରେ…’

ଚୌଧୁରୀ ଚରଣ ସିଂଙ୍କ ବିଶ୍ୱାସ ଥିଲା ଯେ ଯେପର୍ଯ୍ୟନ୍ତ କୃଷକ ଆର୍ଥିକ ଏବଂ ସାମାଜିକ ସ୍ତରରେ ସୁଦୃଢ଼ ହୋଇନାହିଁ, ସେପର୍ଯ୍ୟନ୍ତ ଦେଶର ସାମଗ୍ରିକ ବିକାଶ ସମ୍ଭବ ନୁହେଁ । ଏହି ଚିନ୍ତାଧାରାକୁ ସମ୍ମାନ ଜଣାଇବା ଏବଂ ତାଙ୍କର ସ୍ମୃତିକୁ ଜୀବନ୍ତ ରଖିବା ଉଦ୍ଦେଶ୍ୟରେ ୨୩ ଡିସେମ୍ବରକୁ କୃଷକ ଦିବସ ଭାବରେ ପ୍ରତିଷ୍ଠା କରାଯାଇଥିଲା । କୃଷକ ଦିବସର ମୂଳ ଉଦ୍ଦେଶ୍ୟ ହେଉଛି କୃଷକମାନଙ୍କ ଅବଦାନକୁ ଜାତୀୟ ସ୍ତରରେ ମାନ୍ୟତା ଦେବା ଏବଂ କୃଷି ସମ୍ବନ୍ଧୀୟ ସମସ୍ୟାଗୁଡ଼ିକ ଉପରେ ସମାଜ, ସରକାର ଏବଂ ନୀତି ନିର୍ଦ୍ଧାରକମାନଙ୍କ ଦୃଷ୍ଟି ଆକର୍ଷଣ କରିବା । 

କୃଷକ ଦିବସ କେବଳ ଏକ ତାରିଖ ନୁହେଁ, ବରଂ ଏହା ଭାରତର କୃଷି ଚେତନାର ପ୍ରତୀକ। ଏହି ଦିନଟି ନୀତି ଏବଂ ମାଟି ମଧ୍ୟରେ ଥିବା ଦୂରତାକୁ ଦୂର କରିବାର ଏକ ସୁଯୋଗ ଦିଏ । ଏହା ସ୍ମରଣ କରାଇଦିଏ ଯେ ଅନ୍ନଦାତାଙ୍କୁ ଅବହେଳା କରିବା ଦେଶର ଆର୍ଥିକ ଏବଂ ସାମାଜିକ ସ୍ଥିରତାକୁ ପ୍ରଭାବିତ କରିପାରେ । ହେଲେ ବର୍ତ୍ତମାନ ସମୟରେ ଜଣେ କୃଷକ ଅନେକ ସମସ୍ୟା ଦେଇ ଗତି କରୁଛି । କେଉଁଠି ମଣ୍ଡିରୁ ଧାନ ଉଠି ପାରୁନି ତ କେଉଁଠି ଧାନ ପାଇଁ ଉପଯୁକ୍ତ ମୂଲ୍ୟ ପାଇ ପାରୁନି । ଯେଉଁଥିପାଇଁ ବାଧ୍ୟ ହୋଇ କୃଷକ ରାଜରାସ୍ତାକୁ ଓହ୍ଲାଉଛି । ଆଉ ନିଜ ଅଧିକାର ପାଇଁ ଲଢୁଛି । ଯେଉଁ ଦେଶରେ କୃଷି ପ୍ରଧାନ ସେହି ଦେଶରେ ଆଜି ଅବହେଳିତ ହେଉଛନ୍ତି ଚାଷୀ । ଫଳରେ କୃଷି ପ୍ରତି ମୁହଁ ଫେରାଇ ନେଉଛନ୍ତି କୃଷକ । ଆଉ କେତେ ଦିନ ଏ ସଂଘର୍ଷ, ଆଉ କେତେ ଦିନ ପ୍ରତାରଣା ବୋଲି ଏବେ ପ୍ରଶ୍ନ ପଚାରୁଛି କୃଷକ ।