ବେଙ୍ଗାଲୁରୁ ନିକଟରେ ଭୟଙ୍କର ସିରିଜ ଦୁର୍ଘଟଣା; ୭ ଜଣଙ୍କ  ଗଲା ଜୀବନ

କନକ ବ୍ୟୁରୋ:  କର୍ଣ୍ଣାଟକରେ ଶୁକ୍ରବାର ସକାଳେ ଭୟଙ୍କର ସିରିଜ ଦୁର୍ଘଟଣାରେ ୭ ଜଣଙ୍କର ମୃତ୍ୟୁ ହୋଇଛି । ବେଙ୍ଗାଲୁରୁର ହୋସକୋଟ୍‌- ଦୋବ୍ସପେଟ୍‌ ନିକଟ ଏମ୍‌ ସତ୍ୟବାରା ନିକଟରେ ଦ୍ରୁତଗତିରେ ଯାଉଥିବା ଏସ୍‌ୟୁଭି କାର୍‌ ନିୟନ୍ତ୍ରଣ ହରାଇ ଏକ ମୋଟର ସାଇକେଲକୁ ପଛରୁ ଧକ୍କା ଦେଇଥିଲା । ଏସ୍‌ୟୁଭି ହୋସକୋଟରୁ ଦେବନାହଲ୍ଲି ଅଭିମୁଖେ ଯାଉଥିବାବେଳେ ଡ୍ରାଇଭର ନିୟନ୍ତ୍ରଣ ହରାଇ ମୋଟର ସାଇକେଲ ଓ ପରେ ଏକ କ୍ୟାଣ୍ଟର ଟ୍ରକ୍‌କୁ ଧକ୍କା ଦେଇଥିଲା । ଏହି ସମୟରେ ସେହି ରାସ୍ତାରେ ଯାଉଥିବା ଅନ୍ୟ ଏକ କାର୍‌ ସହିତ ମଧ୍ୟ ଧକ୍କା ହୋଇଥିଲା ।

ଅଧିକ ପଢନ୍ତୁ: ରାୟଗଡାରେ ବ୍ରେକ୍ ଫେଲ୍ ହେଲା ପୁଲିସ ବସ୍ , ଟଳିଲା ବଡ଼ ଦୁର୍ଘଟଣା

ଏସ୍‌ୟୁଭିରେ ବସିଥିବା ୬ ଜଣ ଲୋକ ଓ ମୋଟର ସାଇକେଲ ଚାଳକଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିବା ପୁଲିସ ସୂଚନା ଦେଇଛି  । ମୃତକମାନେ ବେଙ୍ଗାଲୁରୁର କୋଥାନୁରର ବାସିନ୍ଦା ବୋଲି ଅନୁମାନ କରାଯାଉଛି । ସେମାନଙ୍କ ପରିଚୟ ମିଳିପାରି ନାହିଁ । ମୃତଦେହଗୁଡ଼ିକୁ ବ୍ୟବଚ୍ଛେଦ ପାଇଁ ହୋସକୋଟ ସରକାରୀ ହସ୍ପିଟାଲକୁ ସ୍ଥାନାନ୍ତର କରାଯାଇଥିବା ପୁଲିସ ସୂଚନା ଦେଇଛି ।